គណបក្សនយោបាយមួយចំនួននៅកម្ពុជា បានត្រៀមខ្លួនបើកយុទ្ធនាការឃោសនាបោះឆ្នោតឃុំសង្កាត់អាណត្តិទី៥ ដែលនឹងចាប់ផ្ដើមនៅថ្ងៃសៅរ៍ចុងសប្ដាហ៍នេះ ខណៈគណបក្សនយោបាយមួយចំនួនទៀតនឹងបើកធ្វើនៅថ្ងៃបន្តបន្ទាប់នៅតាមមូលដ្ឋានរៀងៗខ្លួន។
តាមប្រតិទិនដែលបង្ហាញដោយគណៈកម្មាធិការជាតិរៀបចំការបោះឆ្នោត (គ.ជ.ប) ការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ នឹងប្រព្រឹត្តទៅចាប់ពីថ្ងៃទី២១ ខែឧសភា ដល់ថ្ងៃទី០៣ ខែមិថុនា ឆ្នាំ២០២២ ខណៈការបោះឆ្នោតនឹងប្រព្រឹត្តទៅនៅថ្ងៃទី០៥ ខែមិថុនា ឆ្នាំ២០២២។
នៅថ្ងៃទី១ នៃយុទ្ធនាការឃោសនាបោះឆ្នោត នៅថ្ងៃសៅរ៍នេះ «គណបក្សភ្លើងទៀន» ដែលទើបចូលរួមការបោះឆ្នោតឃុំសង្កាត់ជាថ្មីនៅឆ្នាំ២០២២នេះ នឹងបើកយុទ្ធនាការឃោសនាបោះឆ្នោតទ្រង់ទ្រាយធំនៅរាជធានីភ្នំពេញ ហើយបន្ទាប់មក ថ្នាក់ដឹកនាំគណបក្សនៅតាមខេត្តនីមួយៗ នឹងរៀបចំយុទ្ធនាការឃោសនាបោះឆ្នោតនៅតាមខេត្តរៀងៗខ្លួន។
អនុប្រធានគណបក្សភ្លើងទៀន លោក សុន ឆ័យ បានថ្លែងនៅថ្ងៃពុធនេះថា គណបក្សប្រឆាំងមួយនេះបានត្រៀមខ្លួនរួចរាល់អស់ហើយ ដើម្បីធ្វើយុទ្ធនាការឃោសនាបោះឆ្នោត បើទោះបីជាសកម្មជនរបស់ខ្លួនមួយចំនួនកំពុងជាប់ពន្ធនាគារ និងមួយចំនួនទៀតកំពុងរត់គេចខ្លួនក្ដី។ លោកលើកឡើងថា គណបក្សនេះនឹងរៀបចំយុទ្ធនាការហែក្បួនតាមដងផ្លូវនៅក្នុងរាជធានីភ្នំពេញ និងបណ្ដាខេត្តទូទាំងប្រទេស រួមទាំងរៀបចំសកម្មភាពចាក់មេក្រូតាមភូមិ ចែកខិត្តបណ្ណស្ដីពីគោលនយោបាយ៧ចំណុចរបស់គណបក្ស នៅតាមខ្នងផ្ទះប្រជាពលរដ្ឋ ដើម្បីឱ្យម្ចាស់ឆ្នោតបានយល់ពីសារនយោបាយទាំងនោះ។ គណបក្សភ្លើងទៀនបានដាក់បេក្ខជនឈរឈ្មោះចំនួន១ ៦២៣ឃុំសង្កាត់ ក្នុងចំណោមឃុំសង្កាត់ទាំងអស់១ ៦៥២ នៅទូទាំងប្រទេស។
លោកថា៖ «ជាធម្មតា យើងនឹងហែ [ក្បួន] ដែលមានរថយន្តចំនួន៥០គ្រឿង កង់បី [រ៉ឺម៉កកង់បី] ប្រហែលជា៥០អីដែរ ហើយមានឡាននាំផ្លូវរូបសញ្ញាភ្លើងទៀនមួយ ហើយមានការចូលរួមដោយម៉ូតូជាដើម»។
ទន្ទឹមគ្នានឹងការខិតជិតមកដល់នៃយុទ្ធនាការឃោសនាបោះឆ្នោតឃុំសង្កាត់នេះ គណបក្សភ្លើងទៀន បានចេញសេចក្តីណែនាំមួយដោយអំពាវនាវដល់ថ្នាក់ដឹកនាំនិងសមាជិករបស់ខ្លួនឱ្យគោរពរដ្ឋធម្មនុញ្ញ ច្បាប់ និងលិខិតបទដ្ឋាននានា រួមទាំងហាមឃាត់ការប្រើប្រាស់មធ្យោបាយឃោសនាទាំងឡាយណាដែលច្បាប់ហាមឃាត់។
ទន្ទឹមគ្នានេះ គណបក្សភ្លើងទៀន បានណែនាំឱ្យសកម្មជនរបស់ខ្លួនចៀសវាងការប្រើប្រាស់ពាក្យឬឃ្លាប្រយោគទាំងឡាយណាដែលបង្ហាញពីការរើសអើងពូជសាសន៍ និងការញុះញង់ដែលនាំដល់ការបែកបាក់សង្គមជាតិ ក្នុងរយៈពេលនៃយុទ្ធនាការឃោសនាបោះឆ្នោតនេះ។
ដោយឡែក សម្រាប់គណបក្សកាន់អំណាចវិញ គណបក្សនេះនឹងមិនរៀបចំបើកយុទ្ធនាការឃោសនាបោះឆ្នោតទ្រង់ទ្រាយធំនោះទេ ដោយសារការបោះឆ្នោតនេះជាការបោះឆ្នោតនៅថ្នាក់មូលដ្ឋាន ខណៈដែលប្រធានគណបក្សនឹងចេញទៅបំពេញបេសកកម្មនៅក្រៅប្រទេស។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា នៅក្នុងយុទ្ធនាការឃោសនាបោះឆ្នោតរយៈពេល១៤ថ្ងៃនេះ ថ្នាក់ដឹកនាំគណបក្សប្រជាជនកម្ពុជា នឹងចុះទៅតាមមូលដ្ឋានរៀងខ្លួន ដើម្បីដឹកនាំការធ្វើយុទ្ធនាការឃោសនាបោះឆ្នោតនៅតាមស្រុកនិងឃុំសង្កាត់។ បើតាមការបញ្ជាក់ពីលោក សុខ ឥសាន គណបក្សកាន់អំណាចបានត្រៀមខ្លួនរួចរាល់អស់ហើយ ហើយសង្ឃឹមថា គណបក្សនេះនឹងបន្តឈ្នះការបោះឆ្នោតភ្លូកទឹកភ្លូកដីទៀត។
លោកថា៖ «និយាយរួម គណបក្សប្រជាជនម្ចាស់ការក្នុងការត្រៀមលក្ខណៈគ្រប់លក្ខណៈសម្បត្តិទាំងអស់ ដើម្បីអនុវត្តនូវយុទ្ធនាការឃោសនាបោះឆ្នោតនេះ។ យើងអត់វាស់បានទេ បើសិនជាមិនទាន់មានការរាប់សន្លឹកឆ្នោត តែក្តីសង្ឃឹមរបស់យើង គឺយើងសង្ឃឹមថា នឹងឈ្នះឆ្នោតភ្លូកទឹកភ្លូកដីដូចការបោះឆ្នោតមុនៗដែរ»។
ចំណែក «គណបក្សហ្វ៊ុនស៊ិនប៉ិច» វិញ នឹងមិនបើកយុទ្ធនាការឃោសនាបោះឆ្នោតទ្រង់ទ្រាយធំនៅថ្ងៃទី១នៃយុទ្ធនាការឃោសនាបោះឆ្នោតនេះទេ។
ក៏ប៉ុន្តែបើតាមការបញ្ជាក់ពីអ្នកនាំពាក្យគណបក្សហ៊្វុនស៊ិនប៉ិច លោក ញឿន រ៉ាដែន គណបក្សរាជានិយមនេះនឹងបើកយុទ្ធនាការឃោសនាបោះឆ្នោតទ្រង់ទ្រាយធំនៅថ្ងៃទី២ នៅក្រុងតាខ្មៅ ខេត្តកណ្ដាល ដែលដឹកនាំដោយព្រះអង្គម្ចាស់ នរោត្ដម ចក្រាវុធ ព្រះប្រធានគណបក្ស។
លោកថា៖ «គណបក្សហ៊្វុនស៊ិនប៉ិចយើងបានត្រៀម គឺទី១បើក បន្ទាប់មកយើងធ្វើទៅតាមស្រុក-ឃុំ។ ហើយយើងដឹងហើយថា យើងមានក្រុមការងាររហូតថ្នាក់ស្រុក ថ្នាក់ឃុំហ្នឹង ជាអ្នកទទួលបន្ទុកផ្ទាល់ ជាអ្នកចែកខិត្តបណ្ណនិងគោលនយោបាយ ដោយអនុលោមទៅតាមការកំណត់របស់គណៈកម្មាធិការជាតិរៀបចំការបោះឆ្នោត ព្រោះឃុំមួយៗគាត់ទទួលបានការកំណត់ ជាពិសេសការទទួលកាលបរិច្ឆេទច្បាស់លាស់ពីគណៈកម្មការរៀបចំការបោះឆ្នោតនៅតាមឃុំសង្កាត់ហ្នឹង»។
សម្រាប់ «គណបក្សកែទម្រង់កម្ពុជា» ដែលជាគណបក្សទើបបង្កើតឡើងថ្មីថ្មោង ក៏នឹងមិនរៀបចំបើកយុទ្ធនាការឃោសនាបោះឆ្នោតទ្រង់ទ្រាយធំនៅថ្ងៃដំបូងដែរ។
ស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន បានថ្លែងថា គណបក្សនេះនឹងមិនហែក្បួនឃោសនាទ្រង់ទ្រាយធំណាមួយទេ ក៏ប៉ុន្តែថ្នាក់ដឹកនាំគណបក្សនេះនឹងចុះរៀបចំធ្វើវេទិកាសាធាណៈជាមួយប្រជាពលរដ្ឋនៅតាមខេត្តមួយចំនួន ដូចជា ខេត្តត្បូងឃ្មុំ កំពង់ចាម កំពង់ធំ ព្រះវិហារ សៀមរាប និងបន្ទាយមានជ័យ ជាដើម។ ចំណែកថ្ងៃផ្សេងទៀត លោកថា គណបក្សនឹងធ្វើសកម្មភាពមិនខុសពីគណបក្សផ្សេងទៀតឡើយ ដូចជា ការចុះចែកខិត្តបណ្ណ និងការចាក់មេក្រូផ្សព្វផ្សាយពីគោលនយោបាយរបស់គណបក្ស ជាដើម។
លោកថា៖ «ខ្ញុំមិនទាន់បានពិនិត្យមើលកាលវិភាគនៅក្នុងខែខ្លះ ប៉ុន្តែឥលូវនេះ យើងសម្រេចចាប់ពីថ្ងៃស្អែកនេះទៅ យើងចាប់ផ្ដើមពីត្បូងឃ្មុំ, ថ្ងៃទី២០ កំពង់ចាម, ហើយថ្ងៃទី២១ កំពង់ធំ, ថ្ងៃទី២២ ព្រះវិហារ, ថ្ងៃ២៣-២៤ សៀមរាប [និងថ្ងៃទី]២៥ នៅបន្ទាយមានជ័យ។ យើងចាប់ផ្ដើមមុនយុទ្ធនាការនេះ គ្រាន់តែយើងជួប ថ្ងៃទី១៩ យើងគ្រាន់តែជួបបេក្ខជនអ្នកឈរឈ្មោះទេ នៅត្បូងឃ្មុំ ព្រោះមាន៤ឃុំ។ យើងគ្រាន់តែដឹងថា ថ្ងៃ២០ យើងអាចមានវេទិកាសាធារណៈជាមួយប្រជាពលរដ្ឋនៅត្បូងឃ្មុំ»។
ងាកមក «គណបក្សប្រជាធិបតេយ្យមូលដ្ឋាន» ឯណេះវិញ គណបក្សនេះនឹងមិនបើកយុទ្ធនាការឃោសនាបោះឆ្នោតទ្រង់ទ្រាយធំនៅរាជធានីភ្នំពេញនោះទេ។ ក៏ប៉ុន្តែថ្នាក់ដឹកនាំសំខាន់ៗរបស់គណបក្សនេះនឹងចុះទៅកាន់ឃុំសង្កាត់សំខាន់ៗដែលគណបក្សបានដាក់បេក្ខជនឈរឈ្មោះ។
ប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ បានអះអាងថា នៅថ្ងៃដំបូងនៃយុទ្ធនាការឃោសនាបោះឆ្នោតនេះ លោកនឹងធ្វើដំណើរទៅកាន់ឃុំជើងព្រៃ ស្រុកបាធាយ ខេត្តកំពង់ចាម ដើម្បីធ្វើយុទ្ធនាការឃោសនាបោះឆ្នោតនៅទីនោះ ខណៈលោកបណ្ឌិត យ៉ង សាំងកុមារ ប្រធានគណៈកម្មាធិការនាយក និងលោក សាម អ៊ីន ជាអគ្គលេខាធិការ នឹងចុះទៅសង្កាត់កោះដាច់ ខណ្ឌជ្រោយចង្វារ រាជធានីភ្នំពេញ។
បើតាមលោក យ៉េង វីរៈ ក្នុងរយៈពេល១៤ថ្ងៃនៃយុទ្ធនាការឃោសនាបោះឆ្នោតនេះ គណបក្សនឹងធ្វើសកម្មភាពសំខាន់ៗចំនួន២ គឺទី១ ការហែក្បួនរបស់ឃុំសង្កាត់នីមួយៗ និងទី២ គឺការចុះចែកខិត្តបណ្ណឃោសនាបោះឆ្នោតនៅតាមផ្ទះរបស់ប្រជាពលរដ្ឋ។ គណបក្សប្រជាធិបតេយ្យមូលដ្ឋាន បានដាក់បេក្ខជនឈរឈ្មោះ ៤៨១នាក់ នៅក្នុងឃុំសង្កាត់ចំនួន៣២។
លោកថា៖ «និយាយទៅ តាមឃុំទាំងអស់នឹងមានការឃោសនាធំ គ្រប់ឃុំ២ដង! ចង់និយាយថា ការហែក្បួនឃោសនា។ អីចឹងគ្រប់ឃុំទាំងអស់នឹងមានការហែក្បួនឃោសនា ត្រង់ធំប៉ុន្មាន វាអាស្រ័យលើសមត្ថភាពលទ្ធភាពរបស់ឃុំមួយៗ។ ដោយឡែក ថ្ងៃបន្ទាប់ ខ្ញុំទៅខ្នាឆ្មា នៅខេត្តកំពង់ឆ្នាំង ស្រុកសាមគ្គីមានជ័យ»។
ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២នេះ មានគណបក្សនយោបាយចំនួន១៧ចូលរួម ហើយក្នុងនោះមានតែគណបក្សប្រជាជនកម្ពុជាមួយប៉ុណ្ណោះដែលបានដាក់បេក្ខជនឈរឈ្មោះនៅគ្រប់ឃុំសង្កាត់ទាំង១ ៦៥២ ខណៈគណបក្សភ្លើងទៀនបានដាក់បេក្ខជនឈរឈ្មោះស្ទើរតែគ្រប់ឃុំសង្កាត់គឺ ១ ៦២៣ឃុំសង្កាត់។
ពាក់ព័ន្ធនឹងយុទ្ធនាការឃោសនាបោះឆ្នោតដែលនឹងចាប់ផ្តើមនៅចុងសប្តាហ៍នេះដែរ គណៈកម្មាធិការជាតិរៀបចំការបោះឆ្នោត (គ.ជ.ប) កាលពីថ្ងៃម្សិលមិញ ក៏បានអំពាវនាវដល់គណបក្សនយោបាយ បេក្ខជន និងអ្នកគាំទ្រគណបក្សនយោបាយទាំងអស់ ត្រូវគោរពតាមវិធាន បទប្បញ្ញត្តិ និងគោលការណ៍ដែលមានចែងក្នុងច្បាប់ស្ដីពីការបោះឆ្នោតក្រុមប្រឹក្សាឃុំសង្កាត់ ដើម្បីឱ្យការឃោសនាបោះឆ្នោតប្រព្រឹត្តទៅដោយសន្តិវិធី សន្តិសុខ សុវត្ថិភាព និងអហិង្សា។
ជាមួយគ្នានោះដែរ គ.ជ.ប ក៏បានអំពាវនាវដល់អាជ្ញាធរដែនដី ត្រូវប្រកាន់ជំហរអព្យាក្រឹត្យ ឥតលម្អៀងក្នុងសកម្មភាពការងាររបស់ខ្លួន និងត្រូវសម្របសម្រួលទីកន្លែង ផ្លូវ ពេលវេលា ដើម្បីឱ្យគណបក្សនយោបាយនីមួយៗអាចអនុវត្តកម្មវិធីឃោសនាបោះឆ្នោត និងការហែក្បួនឃោសនាបោះឆ្នោតរបស់ខ្លួនប្រព្រឹត្តទៅដោយស្មើភាពគ្នា៕
