ព្រឹទ្ធសភា នៅព្រឹកថ្ងៃពុធនេះ បានអនុម័តគាំទ្រទាំងស្រុងលើសេចក្ដីព្រាងច្បាប់ស្ដីពី «សុវត្ថិភាពម្ហូបអាហារ» ដោយសំឡេង៥៩សំឡេងនៃចំនួនសមាជិកព្រឹទ្ធសភាទាំងមូល។
សេចក្ដីប្រកាសព័ត៌មាន ស្តីពី លទ្ធផលនៃសម័យប្រជុំវិសាមញ្ញព្រឹទ្ធសភា នីតិកាលទី៤ ចុះថ្ងៃទី១៨ ខែឧសភា ឆ្នាំ២០២២ លើកឡើងថា សេចក្តីព្រាងច្បាប់ស្តីពីសុវត្ថិភាពម្ហូបអាហារ ត្រូវបានអង្គប្រជុំព្រឹទ្ធសភា បានពិនិត្យ និងឱ្យយោបល់ដោយឯកភាពទាំងស្រុង ដោយសំឡេង៥៩ លើ៥៩សំឡេង ក្រោយពីបានស្ដាប់ការបង្ហាញ និងបំភ្លឺដោយទេសរដ្ឋមន្ត្រីទទួលបន្ទុកបេសកកម្មពិសេស អមដោយថ្នាក់ដឹកនាំ មន្ត្រីជាន់ខ្ពស់ និងមន្ត្រីជំនាញនៃក្រសួងពាណិជ្ជកម្ម។
ប្រភពដដែលបញ្ជាក់ថា៖ «សេចក្តីព្រាងច្បាប់នេះនឹងផ្ដល់សារៈសំខាន់ក្នុងការកំណត់គោលការណ៍ជាមូលដ្ឋាន ដើម្បីជំរុញឱ្យផលិតផលម្ហូបអាហារមានសុវត្ថិភាព និងអនុលោមតាមច្បាប់ និងលិខិតបទដ្ឋានជាតិជាធរមាន សំដៅលើកកម្ពស់សុខុមាលភាព និងប្រសិទ្ធភាព នៃការការពារផលប្រយោជន៍អ្នកប្រើប្រាស់»។
សេចក្តីព្រាងច្បាប់ស្តីពីសុវត្ថិភាពម្ហូបអាហារ តាក់តែងឡើងមាន១១ជំពូក និង៤៣មាត្រា ត្រូវបានរដ្ឋសភាអនុម័តយល់ព្រមចំនួន១០២សំឡេង នៃចំនួនសមាជិករដ្ឋសភា កាលពីថ្ងៃទី១១ ខែឧសភា ឆ្នាំ២០២២។
ក្រសួងពាណិជ្ជកម្ម បានផ្សព្វផ្សាយលើទំព័រហ្វេសប៊ុករបស់ខ្លួននៅថ្ងៃនេះដែរថា ក្នុងអង្គប្រជុំព្រឹទ្ធសភានោះ លោក អង្គ វង្សវឌ្ឍនា បានថ្លែងថា សេចក្ដីព្រាងច្បាប់ស្ដីពីសុវត្ថិភាពម្ហូបអាហារនេះមានសារៈសំខាន់ក្នុងការធានាការពារសុខភាព និងអាយុជីវិតរបស់ប្រជាពលរដ្ឋ តាមរយៈការទទួលទានអាហារប្រកបដោយគុណភាព សុវត្ថិភាព និងអនាម័យល្អ។
លោកបន្តថា សេចក្ដីព្រាងច្បាប់នេះបង្កើតឱ្យមានយន្តការទទួលខុសត្រូវរបស់ក្រសួង-ស្ថាប័នជាតិ ដើម្បីគ្រប់គ្រងប្រតិបត្តិករអាជីវកម្មម្ហូបអាហារនៅគ្រប់ដំណាក់កាលនៃខ្សែចង្វាក់ផលិតកម្ម ចាប់ពីកសិដ្ឋានផលិតរហូតដល់តុអាហារ និងធានាថាផលិតផលម្ហូបអាហារទាំងអស់ដែលចរាចរនៅកម្ពុជា មានគុណភាព សុវត្ថិភាព និងអនាម័យល្អ សម្រាប់ប្រជាពលរដ្ឋ។
លោក អង្គ វង្សវឌ្ឍនា បន្តទៀតថា៖ «សេចក្ដីព្រាងច្បាប់នេះក៏កំណត់គោលការណ៍ជាមូលដ្ឋាន ដើម្បីជំរុញផលិតផលម្ហូបអាហារត្រូវបានផលិត កែច្នៃ វេចខ្ចប់ និងចែកចាយ ផ្អែកទៅតាមស្តង់ដារ និងបទប្បញ្ញត្តិបច្ចេកទេសជាតិ សំដៅធានាឱ្យបាននូវការការពារអាយុជីវិតនិងសុខភាពប្រជាពលរដ្ឋ ព្រមទាំងជំរុញឱ្យមានប្រសិទ្ធភាពខ្ពស់ក្នុងការអនុវត្តពាណិជ្ជកម្មស្មើភាព សំដៅការពារផលប្រយោជន៍អ្នកប្រើប្រាស់ រួមចំណែកយ៉ាងសំខាន់ក្នុងការកាត់បន្ថយភាពក្រីក្ររបស់ប្រជាពលរដ្ឋ»។
លោកបន្ថែមថា សេចក្ដីព្រាងច្បាប់នេះនឹងបង្កលក្ខណៈឱ្យប្រទេសកម្ពុជារៀបចំបាននូវប្រព័ន្ធសុវត្ថិភាពម្ហូបអាហារដែលមានលក្ខណៈទំនើប តាមរយៈការកសាងវិធីសាស្រ្តទប់ស្កាត់ជាមុន និងការត្រួតពិនិត្យខ្សែចង្វាក់ផលិតកម្ម ដែលជាគោលការណ៍សំខាន់មួយក្នុងការជំរុញផលិតផលកម្ពុជាឱ្យមានការទទួលស្គាល់ក្នុងទីផ្សារពិភពលោក៕
