ក្រុមយុវជននិងសង្គមស៊ីវិលដែល «ជិះកង់ ៦០០គីឡូម៉ែត្រ ដើម្បីបរិស្ថាន» ស្នើរដ្ឋាភិបាលពង្រឹងការទប់ស្កាត់ការកាប់បំផ្លាញព្រៃឈើ និងការទន្ទ្រានយកដីក្នុងតំបន់ព្រៃឡង់ ក្រោយពួកគេបានប្រទះឃើញកំណាត់ឈើជាច្រើនតំបន់ក្នុងព្រៃឡង់ អំឡុងពេលធ្វើយុទ្ធនាការជិះកង់រយៈពេលជិត១០ថ្ងៃនេះ ។
ក្រុមយុវជននិងអង្គការសង្គមស៊ីវិលចំនួន២៥នាក់ បាននាំគ្នាធ្វើយុទ្ធនាការជិះកង់ក្នុងតំបន់ព្រៃឡង់ ដោយចាប់ចេញដំណើរពីទីរួមខេត្តកំពង់ធំ កាលពីថ្ងៃទី១០ ខែឧសភា ឆ្ពោះទៅកាន់ខេត្តព្រះវិហារ ស្ទឹងត្រែង ក្រចេះ និងបញ្ចប់នៅខេត្តកំពង់ធំវិញ ដែលមានចម្ងាយប្រមាណ៦០០គីឡូម៉ែត្រ។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង លើកឡើងនៅថ្ងៃទី១៩ ខែឧសភានេះថា អំឡុងពេលដែលពួកគាត់ជិះកង់នោះ អាជ្ញាធរមូលដ្ឋានបានចុះទៅសួរនាំ និងថតរូបសកម្មភាពរបស់ពួកគាត់ ដោយមានការប៉ះពាក្យសម្ដីគ្នាទៅវិញទៅមក ខណៈការជិះកង់ជុំវិញតំបន់ព្រៃឡង់នោះ ពួកគាត់បានប្រទះឃើញមានករណីកាប់បំផ្លាញព្រៃឈើជាច្រើនកន្លែង។
ក្រៅពីប្រទះឈើ និងគោយន្តដឹកឈើក្នុងតំបន់អភិរក្សមួយនេះហើយ លោកថា ពួកគាត់ក៏បានឃើញមានការកាប់ទន្រ្ទានដីព្រៃក្នុងតំបន់ព្រៃឡង់ដែរ។
លោកគូសបញ្ជាក់ថា៖ «យើងមានការបារម្ភមែនទែន នៅពេលដែលឈើឈ្លេចជាច្រើនត្រូវបានកាប់ និងឈើឈ្លេចជាច្រើនត្រូវបានគោយន្តដឹកជញ្ជូន នៅក្នុងដែនជម្រសត្វព្រៃព្រៃឡង់។ នេះយើងមិនទាន់បូកបញ្ចូលជាមួយនឹងការចូលទៅសាងសង់លំនៅឋានខុសច្បាប់ និងការបោះទីតាំង ដើម្បីកាប់បំផ្លាញដែលយើងរកឃើញទេ។ ទាំងអស់នេះជាកត្កាមួយបង្ហាញពីការព្រួយបារម្ភយ៉ាងខ្លាំងសម្រាប់យើងទាំងអស់គ្នាដែលជាសង្គមស៊ីវិល ដែលជាយុវជន ដែលចូលរួមក្នុងយុទ្ធនាការជិះកង់៦០០គីឡូម៉ែត្រដើម្បីបរិស្ថាន»។
លោក ហេង គឹមហុង បង្ហាញការសោកស្ដាយ និងយល់ថា បើសិនជាសកម្មភាពទាំងអស់នេះនៅតែមិនត្រូវបានរដ្ឋាភិបាលនិងអាជ្ញាធរទប់ស្កាត់ទេ នោះវាសនាព្រៃនិងដីក្នុងតំបន់ព្រៃឡង់នឹងបាត់បង់ ដោយសារតែសកម្មភាពកាប់និងទន្ទ្រានដោយខុសច្បាប់ពីសំណាក់ជនខិលខូច។
លោកបានគូសបញ្ជាក់ទៀតថា សកម្មភាពទាំងអស់នេះនៅមិនឆ្ងាយពីទីស្នាក់ការរបស់មន្ត្រីឧទ្យានុរក្សឡើយ ប៉ុន្តែមន្ត្រីបរិស្ថានទាំងនោះបែរជាមិនអើពើទប់ស្កាត់។ ករណីនេះ លោកស្នើទៅរដ្ឋាភិបាលពង្រឹងការទប់ស្កាត់បទល្មើស និងធ្វើការស៊ើបអង្កេតទៅលើមន្ត្រីបរិស្ថានដែលបណ្ដោយឱ្យមានការចូលកាប់ឈើ និងទន្ទ្រានដីក្នុងតំបន់ព្រៃឡង់។
លោកថា៖ «ខ្ញុំយល់ថា ការទន្ទ្រានដីព្រៃរាប់រយហិកតាបែបនេះ ការកាប់បំផ្លាញឈើ រណារយន្តឮពេញព្រៃបែបនេះ មិនមែនអាជ្ញាធរមិនដឹងទេ ប្រហែលជាគាត់ដឹង ប៉ុន្តែធ្វេសប្រហែសក្នុងការបំពេញមុខងារសាធារណៈរបស់ខ្លួន។ អ្វីដែលខ្ញុំចង់បាននិងស្នើសុំអំពាវនាវពេលនេះ អាជ្ញាធរគួរយកចិត្តទុកដាក់ ហើយថ្នាក់លើគួរតែស៊ើបអង្កេតជុំវិញករណីនេះ ជាពិសេសត្រួតពិនិត្យគុណភាពក្នុងការអនុវត្តការងារ ថាតើមានការប្ដេជ្ញាចិត្តកម្រិតណា ឬក៏មានពាក់ព័ន្ធសកម្មភាពការកាប់បំផ្លាញដូចម្ដេចដែរ។ បើសិនជាស៊ើបអង្កេតហើយមានការពាក់ព័ន្ធ អាជ្ញាធរទាំងអស់គួរតែទទួលខុសត្រូវចំពោះមុខច្បាប់»។
អ្នកនាំពាក្យក្រសួងបរិស្ថាន លោក នេត្រ ភក្ត្រា ចាត់ទុកការលើកឡើងរបស់ក្រុមយុវជននិងសង្គមស៊ីវិល ថាជារឿងដដែល។
លោកថា៖ «យើងមិនមានអ្វីឆ្លើយតប ហើយយើងក៏មិនមានចាប់អារម្មណ៍ទៅនឹងអ្វីដែលពួកគាត់លើកឡើងដដែលហ្នឹងទេ។ អ្វីដែលក្រសួងបរិស្ថាន ក៏ដូចមន្ត្រីបរិស្ថាន ដែលយើងបំពេញការងារ គឺយើងបន្តការងារជាធម្មតារបស់យើងដដែល នៅក្នុងការការពារនិងអភិរក្សធនធានធម្មជាតិ។ ទោះបីជាមិនមានពួកគាត់ក៏ដោយ ក៏យើងបំពេញការងារទៅតាមអ្វីដែលជាតួនាទីនិងភារកិច្ចដែលមាននៅក្នុងច្បាប់»។
ចំណែកនៅរាជធានីភ្នំពេញវិញ ក្រុមយុជនចំនួន៣៣នាក់បាននាំគ្នាជិះកង់ជុំវិញបឹងតាមោក ឬបឹងទំនប់កប់ស្រូវ ដែលបច្ចុប្បន្នបឹងធម្មជាតិមួយនេះ កំពុងត្រូវបានរដ្ឋាភិបាលកាត់ប្រគល់ទៅឱ្យក្រុមហ៊ុនឯកជន អ្នកអំណាច មន្ត្រីជាន់ខ្ពស់ និងស្ថាប័នរដ្ឋ ជាដើម។
ប្រធានគម្រោងសិទ្ធិលំនៅឋាន និងស្រាវជ្រាវ នៃអង្គការសមាគមធាងត្នោត លោក ស៊ាង មួយឡៃ ដែលបានជិះកង់ជាមួយក្រុមយុវជនផ្សេងទៀតជុំវិញបឹងតាមោក បង្ហាញការសោកស្តាយ ដែលទីតាំងនេះត្រូវបានគេកំពុងចាក់ដីលុបបឹង និងមិនត្រូវបានអនុញ្ញាតឱ្យពួកគាត់ចូលមើល។
លោកថា៖ «យើងមានគ្នាច្រើនដែលបានចូលរួមហ្នឹង គាត់មិនដែលបានឃើញ អត់ដែលបានស្គាល់ ធ្លាប់តែឮ! អ៊ីចឹងជាការចាប់ផ្ដើមមួយដែលគាត់អាចស្វែងយល់ពីទិដ្ឋភាពនិងស្ថានភាពនៃបឹងនេះ»។
និស្សិតនៅសាកលវិទ្យាល័យភូមិន្ទភ្នំពេញ កញ្ញា ម៉ែន ស្រីដាវ លើកឡើងថា មូលហេតុដែលកញ្ញាចូលរួមជិះកង់ ព្រោះចង់ដឹងនិងស្វែងយល់ពីផលប៉ះពាល់នៃការលុបបឹងតាមោក។ មួយវិញទៀត កញ្ញាថា ការជិះកង់នេះ ដើម្បីផ្សព្វផ្សាយពីសារៈសំខាន់នៃបឹង និងជំរុញឱ្យយុវជនចូលរួមធ្វើការងារសង្គម ជាពិសេសការពារបរិស្ថាននិងធនធានធម្មជាតិ។
កញ្ញាថា៖ «ខ្ញុំគិតថា យុវជនយើងគួរតែស្វែងយល់និងចូលរួមធ្វើសកម្មភាពការពារបរិស្ថាន ការពារធនធានធម្មជាតិ ការលុបបឹងនេះជាធំ ព្រោះអីបើសិនជាលុបបឹងអស់ ពេលទឹកភ្លៀងធ្លាក់មក ទឹកនឹងបង្ហូរទៅណា? អ៊ីចឹងវាលិចផ្ទះប្រជាពលរដ្ឋអស់ហើយ។ មួយទៀត ប្រជាពលរដ្ឋដែលគាត់រស់នៅជុំវិញបឹង គិតថាអត់មានកន្លែងរស់នៅបន្ត ព្រោះអីគេលុបអស់»។
កញ្ញា ស្រីដាវ បានស្នើទៅរដ្ឋាភិបាលបញ្ឈប់ការកាត់ដីនិងលុបផ្ទៃ «បឹងតាមោក» ដែលជាបឹងធម្មជាតិចុងក្រោយសម្រាប់រំដោះទឹកពីទីក្រុង និងជាកន្លែងដែលពលរដ្ឋបង្កបង្កើនផលនិងនេសាទត្រីបន្តទៀត ដើម្បីបញ្ចៀសផលប៉ះពាល់ផ្សេងៗ ជាពិសេសការជន់លិចដោយជំនន់ទឹកភ្លៀង។
គួរបញ្ជាក់ថា យុទ្ធនាការជិះកង់ដើម្បីបរិស្ថាននេះបែងចែកជា២ក្រុម ដោយក្រុមទី១ ជិះកង់ចម្ងាយ៦០០គីឡូម៉ែត្រ នៅខេត្តចំនួន៤ ដែលមានរយៈពេល១០ថ្ងៃ។ ចំណែកក្រុមទី២ ជិះកង់រយៈពេល១ថ្ងៃ នៅជុំវិញបឹងតាមោក រាជធានីភ្នំពេញ។
ក្រៅពីជិះកង់ ពួកគេក៏បានបែងចែកយុទ្ធនាការជា៣សកម្មភាព ដើម្បីអបអរទិវាបរិស្ថានពិភពលោក ឆ្នាំ២០២២ ក្នុងនោះ ពួកគេនាំគ្នាធ្វើយុទ្ធនាការតាមបណ្ដាញសង្គម ដើម្បីផ្សព្វផ្សាយបញ្ហាព្រៃឈើ និងការបម្រែបម្រួលអាកាសធាតុ និងរៀបចំសិក្ខាសាលាធំមួយនៅចុងខែនេះ នៅរាជធានីភ្នំពេញ ដើម្បីលើកកម្ពស់កិច្ចការពារធនធានធម្មជាតិ។
បើតាមសេចក្ដីប្រកាសព័ត៌មានរបស់ក្រុមអង្គការសង្គមស៊ីវិលនិងយុវជន ចេញផ្សាយនៅថ្ងៃទី១០ ខែឧសភា ឆ្នាំ២០២២ ឱ្យដឹងថា យុទ្ធនាការជិះកង់នេះធ្វើឡើងក្រោមមូលបទស្ដីពី «លើកកម្ពស់កិច្ចការពារបរិស្ថាន ដើម្បីចីរភាពធនធានធម្មជាតិ និងសុខុមាលភាពមនុស្សជាតិ» ដោយមានអង្គការសង្គមស៊ីវិលចូលរួមចំនួន១៥ស្ថាប័ន៕