ផែនការកោះហៅមន្ត្រីការិយាល័យបោះឆ្នោត ទៅទទួលការបណ្ដុះបណ្ដាលពីសំណាក់បក្សកាន់អំណាចនេះ នាំឱ្យមានការរិះគន់ពីគណបក្សនយោបាយមួយចំនួន ដោយពួកគេចាត់ទុកថា ប្រសិនបើលិខិតអញ្ជើញដែលចេញដោយមន្ទីរគណៈកម្មាធិការនៃគណបក្សកាន់អំណាចដោយពិតប្រាកដមែន វានឹងឆ្លុះបញ្ចាំងអំពីលទ្ធផលឆ្នោតខាងមុខនេះ គ្មានសេរី ត្រឹមត្រូវ និងយុត្តិធម៌ទេ ខណៈយុទ្ធសាស្រ្តនេះកើតឡើងនៅចំពេលដែលគណបក្សនយោបាយទើបតែចាប់ផ្តើមបើកយុទ្ធនាការនៃការឃោសនាស្វែងរកសំឡេងឆ្នោត។
លោក សុន ឆ័យ អនុប្រធានគណបក្សភ្លើងទៀន ថ្លែងនៅថ្ងៃចន្ទនេះថា វាជារឿងដែលគួរឱ្យសង្ស័យបំផុត តើមានមូលហេតុអ្វីបានជាគណបក្សប្រជាជនកម្ពុជា ត្រូវកោះហៅមន្រ្តីការិយាល័យរៀបចំការបោះឆ្នោត មករៀន និងបើកវគ្គបំពាក់បំប៉នយ៉ាងដូច្នេះ។ លោកបន្តថា ប្រសិនបើផែនការ ដែលដាក់ចេញដោយមន្ទីរគណៈកម្មាធិការនៃបក្សកាន់អំណាចនេះកើតឡើងពិតមែន មានន័យថា នឹងនាំឱ្យមានផលប៉ះពាល់អាក្រក់ខ្លាំងចំពោះលទ្ធផលឆ្នោតខាងមុខនេះ។
បើតាមលោក សុន ឆ័យ មកដល់ពេលនេះ ខាងគណបក្សកំពុងតាមដាននិងអង្កេត មុននឹងត្រូវសម្រេចចិត្តថានឹងត្រូវធ្វើអ្វីបន្តទៀតនៅជំហានបន្ទាប់។
លោកបន្តថា៖ «ដូចខ្ញុំបានជម្រាបអ៊ីចឹង ថាគេនឹងមានការណែនាំអំពីអី! ឥលូនេះ តើ គ.ជ.ប ចាត់វិធានការយ៉ាងម៉េច បើមានគណបក្សនយោបាយទៅហៅសមាជិកដែលបំពេញការងារបោះឆ្នោតហ្នឹងឱ្យទៅជួបហើយណែនាំ? តើមានវិធានការយ៉ាងម៉េចខ្លះ? ហើយតើការណែនាំហ្នឹងមានតែខណ្ឌពីរបីហ្នឹងទេ ឬទូទាំងប្រទេស? ដូច្នេះ យើងនឹងតាមដានរាល់សកម្មភាពទាំងអស់នេះតទៅទៀត ទើបយើងសម្រេចថានឹងវាទៅជាយ៉ាងម៉េច»។
ចំណែក ប្រធានគណបក្សកម្ពុជានិយម លោក យ៉ែម បុញ្ញឫទ្ធិ បា្រប់ វីអូឌី នៅថ្ងៃទី២៣ ខែឧសភានេះថា តាមពិតទៅ កិច្ចការទាំងនេះ វាគឺជាភារៈរបស់ស្ថាប័នជាតិរៀបចំការបោះឆ្នោតជាអ្នករៀបចំទេ។ ជាងនេះទៀត ប្រសិនបើផែនការនេះពិតជាត្រូវបានដាក់លេចចេញជារូបរាងមែន វាជារឿងដែលគ្រោះថ្នាក់បំផុត ជាពិសេសពាក់ព័ន្ធនឹងដំណើរការបោះឆ្នោតនិងលទ្ធផលឆ្នោតខាងមុខនេះ។
លោកបន្តថា៖ «ពិតជាគួរឱ្យព្រួយបារម្ភ និងគួរឱ្យសោកស្តាយ ប្រសិនបើរឿងនេះកើតឡើង វាហាក់ដូចជាគណបក្សនយោបាយហ្នឹងលូកដៃទៅក្នុងស្ថាប័នដែលឯករាជ្យនិងអព្យាក្រឹត្យមួយ»។
វីអូឌី បានទទួលលិខិតចំនួន២ច្បាប់ដែលចេញដោយមន្ទីរគណៈកម្មាធិការនៃគណបក្សប្រជាជនកម្ពុជា ហើយមានកាលបរិច្ឆេទខុសគ្នា។ លិខិតទី១ ចេញកាលពីថ្ងៃទី១៩ ខែឧសភា ហើយមួយថ្ងៃបន្ទាប់ លិខិតមួយទៀតត្រូវបានគេបញ្ជូនចេញបន្ត។ នៅក្នុងខ្លឹមសារលិខិតដែលចាត់ឱ្យខណ្ឌចំនួន ៣ រួមមាន ខណ្ឌទួលគោក ខណ្ឌ៧មករា និងខណ្ឌសែនសុខ ត្រូវរៀបចំនិងចាត់ចែងប្រធាន អនុប្រធាន និងលេខាធិការ នៃការិយាល័យបោះឆ្នោត ចូលរួមវគ្គបំពាក់បំប៉នមន្រ្តីការិយាល័យបោះឆ្នោតក្រុមប្រឹក្សាឃុំ-សង្កាត់ សម្រាប់អាណត្តិទី៥ ឆ្នាំ២០២២។
ឆ្លើយតបរឿងនេះ ប្រធានមន្ទីរគណបក្ស[ប្រជាជនកម្ពុជា]រាជធានីភ្នំពេញ លោក ង៉ែត ចដ្ឋាវី ប្រាប់ វីអូឌី ថាវគ្គបំប៉ននេះ គឺរៀបចំសម្រាប់តែផ្ទៃក្នុងប៉ុណ្ណោះ ហើយជាមន្រ្តីការិយាល័យសម្រាប់តែគណបក្សដែរ។ លោកបន្តថា ការងារនេះមិនជាប់ពាក់ព័ន្ធណាមួយជាមួយនឹងស្ថាប័នជាតិរៀបចំការបោះឆ្នោតទេ ព្រោះជាការងារផ្ទៃក្នុងរបស់គណបក្សប៉ុណ្ណោះ។
លោកបន្តថា៖ «ទេ! អានេះគឺជាផ្ទៃក្នុងរបស់គណបក្សទេ មានក្រុមអ្នកច្បាប់ គេជាអ្នកបំពាក់បំប៉ន វាប្រៀបដូចជាយើងបង្រៀនកូនសិស្សត្រៀមប្រឡង។ អត់មានជាប់ពាក់ព័ន្ធនឹង គ.ជ.ប ទេ។ នេះប្រៀបដូចគ្រូគេបង្រៀនកូនសិស្សឱ្យបានជាប់អ៊ីចឹង។ បាទ! សុទ្ធតែសមាជិកគណបក្សទាំងអស់»។
អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បដិសេធថា ស្ថាប័នជាតិមួយនេះមិនមានជាប់ទាក់ទិនណាមួយនឹងលិខិត ដែលចេញដោយមន្ទីរបក្សនៃគណបក្សប្រជាជនកម្ពុជានេះទេ។ មួយវិញទៀត សម្រាប់មន្រ្តីការិយាល័យបោះឆ្នោត គឺ គ.ជ.ប មិនទាន់បានប្រកាសជ្រើសរើសជាផ្លូវការនៅឡើយផង មកដល់ពេលនេះ។
លោកបន្តថា៖ «គ.ជ.ប មិនមានទំនាក់ទំនងអ្វីជាមួយនឹងលិខិតនោះទេ។ ហើយទី២ មិនដឹងថាលិខិតហ្នឹងពិតឬមិនពិតកម្រិតណានោះដែរ។ ទី៣ទៀត គ.ជ.ប អត់បានជ្រើសរើសបានមន្រ្តីការិយាល័យបោះឆ្នោតនៅឡើយ ទាល់តែថ្ងៃទី២៥ ទើបបានប្រឡងជ្រើសរើស។ ដូច្នេះ បញ្ហានេះ វាដូចជាផ្ទុយពីអ្វីដែលច្បាប់បានកំណត់»។
នាយកប្រតិបត្តិនៃអង្គការនិចហ្វិក លោក សំ គន្ធាមី យល់ឃើញថា វាមិនទាស់ខុសអ្វីទេ ប្រសិនបើចូលរួមត្រឹមវគ្គសិក្ខាសាលាដែលរៀបចំដោយគណបក្សនយោបាយណាមួយ ប៉ុន្តែដើម្បីឱ្យវាមានភាពសុក្រឹត្យនិងតម្លាភាព ស្ថាប័នជាតិរៀបចំការបោះឆ្នោតគួរនៅឱ្យឆ្ងាយពីគណបក្សនយោបាយ ជាពិសេសនៅអំឡុងពេលដាក់ឱ្យដំណើរការនៃការបោះឆ្នោតនេះ។
លោកបន្តថា៖ «បើគេគ្រាន់តែហៅមកចូលរួមមកអី អាហ្នឹងជារឿងរបស់គណបក្សទេ។ គ.ជ.ប បើសិនជាអញ្ជើញទៅ គ.ជ.ប មិនចូលរួម អាហ្នឹងកាន់តែល្អណាស់ កុំឱ្យវាប៉ះពាល់ទៅដល់ការងាររបស់ គ.ជ.ប។ បើគ្រាន់តែថាមកចូលរួមវគ្គបណ្តុះបណ្តាលមន្រ្តីរបស់គេ អាហ្នឹងវាជារឿងរបស់គេ»។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ សម្រាប់អាណត្តិទី៥នេះ មានគណបក្សនយោបាយចំនួន១៧គណបក្សបានចុះឈ្មោះចូលរួមការប្រកួតប្រជែង សម្រាប់តំណែងជាមេឃុំចៅសង្កាត់ និងក្រុមប្រឹក្សាឃុំសង្កាត់។ ប្រតិទិនដែលចេញដោយ គ.ជ.ប ការបោះឆ្នោតជ្រើសរើសក្រុមប្រឹក្សាឃុំសង្កាត់នេះ នឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២៕
