រដ្ឋាភិបាលកម្ពុជា និងអូស្ត្រាលី បានរួមគ្នាដាក់ឱ្យដំណើរការនូវគោលការណ៍ណែនាំស្ដីពី «សុខភាព និងសុវត្ថិភាពនៅការដ្ឋានសំណង់» ដែលនឹងក្លាយជាធាតុផ្សំដ៏សំខាន់នៃច្បាប់សំណង់របស់កម្ពុជា ក្នុងការជួយកាត់បន្ថយហានិភ័យ និងធ្វើឱ្យប្រសើរឡើងនូវសុវត្ថិភាពក្នុងវិស័យសំណង់នៅកម្ពុជា។
សេចក្ដីប្រកាសព័ត៌មានរបស់ស្ថានទូតអូស្តា្រលីប្រចាំនៅរាជធានីភ្នំពេញ នៅថ្ងៃទី២៤ ខែឧសភា ឆ្នាំ២០២២ បានឱ្យដឹងថា គោលការណ៍ណែនាំនេះ ត្រូវបានចែកចេញជា៣ផ្នែក និងគ្របដណ្ដប់លើប្រធានបទជាច្រើន រួមមាន ទំនួលខុសត្រូវលើសុខភាព និងសុវត្ថិភាពនៅការដ្ឋានសំណង់ ការប្រើប្រាស់ឧបករណ៍ការពារផ្ទាល់ខ្លួន ព្រមទាំងការសង្គ្រោះបឋម និងការការពារកុមារនិងកម្មករវ័យក្មេង។
សេចក្តីប្រកាសព័ត៌មានបន្តថា៖ «គោលការណ៍ណែនាំនេះក៏ផ្តល់ការការពារបន្ថែមដល់កម្មករសំណង់ជាស្ត្រី រួមទាំងនីតិវិធីសម្រាប់ការយល់ដឹង និងដោះស្រាយអំពើហិង្សា និងការបៀតបៀនផ្អែកលើយេនឌ័រ នៅតាមការដ្ឋានសំណង់។ ឯកសារគោលការណ៍ណែនាំដែលត្រូវបានអនុម័តនេះ នឹងក្លាយជាធាតុផ្សំដ៏សំខាន់នៃច្បាប់សំណង់របស់កម្ពុជា»។
សេចក្តីប្រកាសព័ត៌មានបន្ថែមថា៖ «ការរីកលូតលាស់យ៉ាងឆាប់រហ័សនៃវិស័យសំណង់ និងទីក្រុង [នៅកម្ពុជា] ទាមទារឱ្យមានការអភិវឌ្ឍ និងការអនុវត្តស្តង់ដារផ្លូវការនានា ទាក់ទងនឹងគុណភាពសំណង់ ការរចនាគ្រឿងបង្គុំសំណង់ និងសុវត្ថិភាពនៅកន្លែងធ្វើការ»។
រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ត្រូវបានស្រង់ប្រសាសន៍ដាក់ក្នុងសេចក្តីប្រកាសព័ត៌មាននេះថា ការដាក់ឱ្យមានគោលការណ៍ណែនាំស្តីពី «សុខភាព និងសុវត្ថិភាពនៅការដ្ឋានសំណង់» នេះ បានដើរតួនាទីសំខាន់់ក្នុងការជួយកាត់បន្ថយហានិភ័យ និងធានាឱ្យបាននូវសុវត្ថិភាពប្រសើរនៅតាមការដ្ឋានសំណង់ និងទីតាំងក្បែរការដ្ឋានសំណង់។
លោកបន្ថែមថា៖ «ខ្ញុំសូមលើកទឹកចិត្តយ៉ាងមុតមាំដល់អ្នកវិនិយោគ និយោជក និងនិយោជិត បុគ្គល អង្គភាព និងស្ថាប័នពាក់ព័ន្ធនានា យកចិត្តទុកដាក់លើគោលការណ៍ណែនាំនេះ និងជួយអប់រំសមាជិកពាក់ព័ន្ធទាំងឡាយរបស់ខ្លួនអំពីគោលការណ៍ណែនាំនេះ និងសូមចូលរួមអនុវត្តគោលការណ៍ណែនាំនេះប្រកបដោយប្រសិទ្ធភាពខ្ពស់នៅការដ្ឋានសំណង់របស់ខ្លួន»។
ចំណែក ឯកអគ្គរាជទូតអូស្ត្រាលីប្រចាំនៅកម្ពុជា លោក Pablo Kang បានលើកឡើងក្នុងសេចក្តីប្រកាសព័ត៌មាននោះដែរថា ការដាក់ចេញនូវគោលការណ៍ណែនាំនេះ ជាជំហានសំខាន់មួយក្នុងការលើកកម្ពស់សុខភាពនិងសុវត្ថិភាពប្រជាពលរដ្ឋដែលចូលរួមក្នុងវិស័យសំណង់ ខណៈវិស័យនេះជាវិស័យដ៏មានសក្តានុពលមួយនៅកម្ពុជា។
លោកបន្តថា៖ «ក្រៅពីការផ្តោតយកចិត្តទុកដាក់ទៅលើសុវត្ថិភាពនៅការដ្ឋានសំណង់ គោលការណ៍ណែនាំនេះក៏គ្របដណ្តប់លើបញ្ហាសំខាន់ៗនានាផងដែរ ដូចជា សុវត្ថិភាពសាធារណៈ និងវិធានការទប់ស្កាត់ការឆ្លងរាលដាលជំងឺកូវីដ-១៩ ជាដើម»។
យោងតាមទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ ក្នុងរយៈពេល២ទស្សវត្សន៍ចុងក្រោយនេះ លិខិតអនុញ្ញាតសាងសង់ជាង៥៧ ០០០ ត្រូវបានចេញឱ្យការដ្ឋានសំណង់នៅទូទាំងប្រទេសកម្ពុជា។ តម្លៃប៉ាន់ស្មានទុនវិនិយោគសរុបនៅក្នុងវិស័យសំណង់នេះ មានប្រមាណជាង៦៦ពាន់លានដុល្លារអាមេរិក ហើយវិស័យនេះផ្តល់ការងារជាមធ្យមដល់ពលរដ្ឋប្រមាណ១៥០ ០០០នាក់ក្នុងមួយថ្ងៃ។
ក្នុងរយៈពេលចុងក្រោយនេះ ហេតុការណ៍គ្រោះថ្នាក់នៅតាមការដ្ឋានសំណង់បានកើតឡើងជាញឹកញាប់។ កាលពីថ្ងៃទី២០ ខែឧសភា ឆ្នាំ២០២២ កម្មករសំណង់ចំនួន៤នាក់បានស្លាប់ និងម្នាក់ទៀតរងរបួសធ្ងន់ បន្ទាប់ពីជួបគ្រោះថ្នាក់ដាច់ខ្សែកាបយោងជណ្ដើរយន្តនៅក្នុងអគារកំពុងសាងសង់ដែលមានកម្ពស់១៥ជាន់ ស្ថិតនៅចំណុចផ្លូវសេតេ ក្រុមទី១១ ភូមិ២ សង្កាត់លេខ៣ ក្រុងព្រះសីហនុ៕
