ក្រសួងប្រៃសណីយ៍ និងទូរគមនាគមន៍ អំពាវនាវដល់វិស័យឯកជនឱ្យមានការប្រុងប្រយ័ត្នខ្ពស់ ខណៈការវាយប្រហារបោកបញ្ឆោតប្រភេទ Business Email Compromise (BEC) ទៅលើវិស័យឯកជនមានការកើនឡើង។
សេចក្តីជូនដំណឹងរបស់ក្រសួងប្រៃសណីយ៍ និងទូរគមនាគមន៍ ចុះថ្ងៃទី២៣ ខែឧសភា ឆ្នាំ២០២២ បានលើកឡើងថា ការវាយប្រហារបោកបញ្ឆោតប្រភេទ Business Email Compromise (BEC) ត្រូវបានចោរព័ត៌មានវិទ្យា ប្រើប្រាស់ក្នុងគោលបំណងលួចសាច់ប្រាក់ តាមរូបភាពទាក់ទងផ្ញើព័ត៌មានតាមរយៈអ៊ីមែល សម្រាប់ប្រតិបត្តិការទូទាត់សាច់ប្រាក់ទៅក្រុមហ៊ុននៅក្រៅប្រទេស។
ក្រសួងបន្តថា៖ «ការបោកបញ្ឆោតនេះកើតឡើងជាពិសេសទៅលើវិស័យឯកជន ដោយចោរព័ត៌មានវិទ្យាធ្វើការវាយប្រហារទៅកាន់អង្គភាពដែលជាគោលដៅ តាមរយៈការផ្ញើសារអ៊ីមែល ដែលសារនោះមើលទៅហាក់ដូចជាមកពីប្រភពដែលស្គាល់និងត្រឹមត្រូវ»។
ក្រសួងប្រៃសណីយ៍ បន្តទៀតថា ចោរព័ត៌មានវិទ្យាបានធ្វើពុតជាក្រុមហ៊ុនផលិត ឬដៃគូអាជីវកម្ម ដែលធ្លាប់ទាក់ទងជាទៀងទាត់ ក្នុងរូបភាពជានាយកប្រតិបត្តិក្រុមហ៊ុន ឬនាយកផ្នែកហិរញ្ញវត្ថុ ឬជំនួយការនិងបុគ្គលិកជាន់ខ្ពស់ដែលទាក់ទងនឹងហិរញ្ញវត្ថុ ឬពាក់ព័ន្ធនឹងការផ្ទេរប្រាក់ទៅកាន់ដៃគូអាជីវកម្មនៅក្រៅប្រទេស ដើម្បីស្នើសុំឱ្យមានការទូទាត់ថ្លៃទំនិញឬសេវាទៅកាន់គណនីធនាគារថ្មីមួយ ខុសពីគណីសម្រាប់ទូទាត់កន្លងមក ដោយផ្ញើវិក្កយបត្រតាមរយៈអាសយដ្ឋានអ៊ីមែលរបស់ក្រុមហ៊ុនផលិត ឬដៃគូអាជីវកម្មនោះ ដែលត្រូវបានចោរព័ត៌មានវិទ្យាលួចចូលគ្រប់គ្រងប្រើប្រាស់ ឬអាសយដ្ឋានអ៊ីមែលមួយផ្សេងខុសពីអាសយដ្ឋានអ៊ីមែលដែលធ្លាប់ប្រើ ឬអាស័យដ្ឋានដែលមានលក្ខណៈប្រហាក់ប្រហែល។
ដើម្បីការពារខ្លួនពីបញ្ហានេះ ក្រសួងបានណែនាំដល់អ្នកប្រើប្រាស់គួរមានការប្រុងប្រយ័ត្នជាមួយនឹងវិធានការមួយចំនួន ក្នុងនោះ ត្រូវពិនិត្យនិងផ្ទៀងផ្ទាត់មើលឈ្មោះ និងអាសយដ្ឋានអ៊ីមែលដែលផ្ញើមកឱ្យបានច្បាស់ ឬអាចសាកសួរតាមទូរសព្ទបន្ថែមទៀតក្នុងករណីដែលមានការសង្ស័យ ទោះបីជាអ៊ីមែលនោះមកពីអ្នកដែលយើងស្គាល់ក៏ដោយ។
ជាមួយគ្នានេះ ក្រសួងក៏បានណែនាំឱ្យប្រុងប្រយ័ត្នខ្ពស់ចំពោះសារអ៊ីមែលដែលស្នើសុំផ្លាស់ប្ដូរព័ត៌មានគណនីសម្រាប់ការផ្ទេរប្រាក់ និងត្រូវបញ្ជាក់និងផ្ទៀងផ្ទាត់ចំពោះការស្នើសុំផ្លាស់ប្តូរព័ត៌មានគណនីដោយផ្ទាល់ទៅកាន់បុគ្គលឬដៃគូអាជីវកម្ម តាមរយៈមធ្យោបាយផ្សេងក្រៅពីអ៊ីមែល ព្រមទាំងទាក់ទងទៅកាន់ធនាគារជាបន្ទាន់ ប្រសិនបើដឹងខ្លួនថាបានចាញ់បញ្ជោតនិងផ្ទេរសាច់ប្រាក់រួចរាល់។ ក្រៅពីនោះ គួរដាក់ពាក្យបណ្តឹងទៅកាន់សមត្ថកិច្ចពាក់ព័ន្ធ ប្រសិនបើចង់ធ្វើការស្វែងរកចោរព័ត៌មានវិទ្យាមកផ្តន្ទាទោស៕