ក្រសួងការងារ និងបណ្ដុះបណ្ដាលវិជ្ជាជីវៈ អះអាងថា គិតមកដល់ថ្ងៃម្សិលមិញ បុគ្គលិកក្រុមហ៊ុនណាហ្គាវើលដ៍ជិត២០០នាក់បានទទួលយកដំណោះស្រាយ តាមរយៈការធ្វើលិខិតព្រមព្រៀងទទួលយកប្រាក់ដំណាច់បញ្ចប់កិច្ចសន្យាការងារពីក្រុមហ៊ុនរួចហើយ។
សេចក្ដីប្រកាសព័ត៌មានរបស់ក្រសួងការងារ ចុះថ្ងៃទី២៥ ខែឧសភា ឆ្នាំ២០២២ បានលើកឡើងថា មន្ត្រីជំនាញរបស់ក្រសួងបានធ្វើការពិនិត្យផ្ទៀងផ្ទាត់ការទូទាត់ប្រាក់ដំណាច់បញ្ចប់កិច្ចសន្យាការងារជាមួយតំណាងក្រុមហ៊ុន ហើយក្រសួងពិនិត្យឃើញថា ការទូទាត់ចំនួន៤ចំណុចនោះត្រឹមត្រូវស្របតាមច្បាប់និងលិខិតបទដ្ឋានគតិយុត្តិ ពាក់ព័ន្ធនឹងការបញ្ឈប់ពីការងាររួម។
ក្រសួងបន្តថា នៅថ្ងៃទី២៥ ខែឧសភា ម្សិលមិញ មានអតីតបុគ្គលិកចំនួន៥រូបបន្ថែមទៀតបានទទួលយកដំណោះស្រាយ តាមរយៈការធ្វើលិខិតព្រមព្រៀងទទួលយកប្រាក់ដំណាច់បញ្ចប់កិច្ចសន្យាការងារពីក្រុមហ៊ុន។
ក្រសួងបានគូសបញ្ជាក់ថា៖ «ដូច្នេះ គិតមកដល់ថ្ងៃនេះ [ថ្ងៃទី២៥ ខែឧសភា] មានអតីតបុគ្គលិកសរុបចំនួន១៩២រូប ក្នុងចំណោម៣៧៣រូប ដែលបានទទួលយកនូវប្រាក់ដំណាច់បញ្ចប់កិច្ចសន្យាការងារ ដែលធ្វើឱ្យចំនួនអតីតបុគ្គលិកដែលមិនព្រមទទួលយកសំណងនៅសល់ត្រឹម១៨១រូប»។
បើតាមក្រសួងការងារ បច្ចុប្បន្ន ទីភ្នាក់ងារជាតិមុខរបរនិងការងារ បានទទួលយកប្រវត្តិរូបសង្ខេបពីអតីតបុគ្គលិកទាំងនោះ ហើយក៏បាននិងកំពុងជួយស្វែងរកការងារថ្មីសម្រាប់អតីតបុគ្គលិកទាំងនោះផងដែរ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ លើកឡើងនៅថ្ងៃព្រហស្បតិ៍នេះថា សហជីពនៅតែគោរពតាមការសម្រេចចិត្តរបស់បុគ្គលិកដែលទទួលយកសំណង។
កញ្ញាថា៖ «យើងគោរពតាមការសម្រេចចិត្តរបស់សាម៉ីខ្លួន បើគាត់មិនអាចបន្តទៅមុខទៀតបាន គាត់ចង់យកលុយ ដើម្បីបញ្ឈប់ការតវ៉ាអី គឺគាត់មានសិទ្ធិក្នុងការដូរចិត្តបានទាំងអស់ ហ្នឹងជាគោលការណ៍យើងដំបូង! អ៊ីចឹងហើយបានបុគ្គលិកជាង៣០០នាក់ ពួកគាត់អាចធ្វើការផ្លាស់ប្ដូរចិត្តបានគ្រប់ពេលវេលា»។
កញ្ញា ឈឹម ស៊ីថរ បន្ថែមថា៖ «ទី២ ធម្មតាការតស៊ូរយៈពេលវែងអ៊ីចឹង ហើយរហូតដល់អ្នកខ្លះជាប់ពន្ធនាគារអ៊ីចឹង គាត់មិនអាចទប់ទល់នឹងស្ថានភាពសេដ្ឋកិច្ច ក៏ដូចជាសម្ពាធពីគ្រួសារ អ៊ីចឹងចង់មិនចង់ ពួកគាត់បង្ខំចិត្តទទួលយកសំណង ហើយបញ្ឈប់ការតវ៉ា អាហ្នឹងយើងមិនទាន់ដឹងអ្វីនៅពីក្រោយហ្នឹង អាចមានការគំរាមកំហែងពួកគាត់ទៀតអត់ យើងក៏មិនដឹងដែរ»។
កញ្ញា ស៊ីថរ បន្តថា ទោះបីបច្ចុប្បន្នបុគ្គលិកដែលចេញធ្វើកូដកម្មមួយចំនួនទទួលយកប្រាក់ដំណាច់បញ្ចប់កិច្ចសន្យាការងារក៏ដោយ ប៉ុន្តែសម្រាប់កូដករដែលនៅសល់ជាង១០០នាក់នោះ ពួកគាត់នៅតែបន្តធ្វើកូដកម្មទៀត ដើម្បីទាមទារឱ្យថៅកែទទួលយកសហជីព និងដោះស្រាយបញ្ហារបស់កូដករ។
វិវាទការងារនៅក្នុងក្រុមហ៊ុនកាស៊ីណូណាហ្គាវើលដ៍ បានកើតឡើងជាង១ឆ្នាំមកហើយ បន្ទាប់ពីភាគីក្រុមហ៊ុនបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ដោយលើកហេតុផលថា ក្រុមហ៊ុនជួបវិបត្តិហិរញ្ញវត្ថុដោយសារជំងឺកូវីដ-១៩។ ក៏ប៉ុន្តែតំណាងសហជីពប្រចាំនៅក្នុងក្រុមហ៊ុនកាស៊ីណូនេះយល់ថា ផែនការបញ្ឈប់បុគ្គលិកទ្រង់ទ្រាយធំនេះ គឺជាការគាស់រំលើងសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូណាហ្គាវើលដ៍ ចេញពីក្រុមហ៊ុនឱ្យអស់ ត្បិតបុគ្គលិកដែលបញ្ឈប់ភាគច្រើនលើសលប់ គឺជាសមាជិកនិងថ្នាក់ដឹកនាំសហជីព។
គិតមកដល់បច្ចុប្បន្ន កូដករណាហ្គាវើលដ៍មួយចំនួននៅបន្តការតវ៉ារបស់ពួកគេ ដើម្បីទាមទារឱ្យថៅកែណាហ្គាចេញមុខមកដោះស្រាយវិវាទការងារនេះជាមួយកម្មករនិយោជិត បញ្ឈប់ការរើសអើងសហជីព ហើយទទួលយកបុគ្គលិកដែលកំពុងធ្វើកូដកម្មទាំងមានឈ្មោះកាត់និងមិនមានឈ្មោះកាត់ ព្រមទាំងបុគ្គលិកហាត់ការ (ETP) ឱ្យចូលធ្វើការងារវិញ និងចរចាជាមួយតំណាងរបស់បុគ្គលិកកម្មករ ជាដើម៕
