ធនាគារពិភពលោក (The World Bank-WB) ផ្ដល់ជំនួយជាទឹកប្រាក់ចំនួន១៦៩លានដុល្លារអាមេរិក ដល់គម្រោងគ្រប់គ្រងហានិភ័យគ្រោះធម្មជាតិអាស៊ីអាគ្នេយ៍នៅកម្ពុជា ដើម្បីបង្កើនភាពធន់នៃបណ្ដាញផ្លូវជនបទទៅនឹងគ្រោះធម្មជាតិនិងកត្តាអាកាសធាតុ។
សេចក្ដីប្រកាសព័ត៌មានរបស់ធនាគារពិភពលោក ចុះថ្ងៃទី២៥ ខែឧសភា ឆ្នាំ២០២២ បានលើកឡើងថា គម្រោងនេះជួយដល់ការសាងសង់ផ្លូវនិងស្ពាននៅតាមតំបន់រងការជន់លិចទឹក និងជួយបង្កើនសមត្ថភាពរបស់រដ្ឋាភិបាលកម្ពុជា ក្នុងការឆ្លើយតបទៅនឹងគ្រោះធម្មជាតិបង្កដោយអាកាសធាតុ។
សេចក្ដីប្រកាសព័ត៌មានបន្តថា៖ «គម្រោងនេះនឹងនាំអត្ថប្រយោជន៍ដល់ប្រជាជនប្រហែល៥,៥លាននាក់ ក្នុងនោះ ៥២ភាគរយជាស្ត្រី នៅក្នុងខេត្តចំនួន៧ និងដល់អ្នកដែលប្រើប្រាស់បណ្ដាញផ្លូវទាំងនេះ»។
ប្រធានគ្រប់គ្រងនៃធនាគារពិភពលោកប្រចាំប្រទេសកម្ពុជា លោកស្រី ម៉ារីយ៉ាម សាលីម (Maryam Salim) បានលើកឡើងក្នុងសេចក្ដីប្រកាសព័ត៌មានថា៖ «ជាមួយនឹងការប្ដេជ្ញាចិត្តមោះមុតរបស់ក្រសួងអភិវឌ្ឍន៍ជនបទនៃរាជរដ្ឋាភិបាលកម្ពុជា គម្រោងនេះនឹងជួយធ្វើយ៉ាងណាឱ្យហេដ្ឋារចនាសម្ព័ន្ធផ្លូវជនបទឱ្យនៅមានភាពរឹងមាំ និងធន់ទៅនឹងការប្រែប្រួលអាកាសធាតុ ហើយទន្ទឹមគ្នានោះ ជួយការពារផងដែរដល់ប្រជាជនងាយរងគ្រោះពីហេតុការណ៍គ្រោះធម្មជាតិដែលគ្មានអ្នកណាអាចដឹងមុន»។
ធនាគារពិភពលោក លើកឡើងទៀតថា កម្ពុជាជាប្រទេសមួយដែលងាយរងគ្រោះណាស់ពីផលប៉ះពាល់អវិជ្ជមាននានាដែលបណ្ដាលមកពីការប្រែប្រួលអាកាសធាតុ ជាពិសេសទឹកជំនន់ និងភាពរាំងស្ងួត ហើយហេដ្ឋារចនាសម្ព័ន្ធផ្លូវជនបទក៏ងាយរងគ្រោះខ្លាំងពីហានិភ័យនៃគ្រោះធម្មជាតិបង្កដោយអាកាសធាតុ។
ប្រភពដដែលបន្តថា គម្រោងនេះនឹងត្រូវអនុវត្តដោយក្រសួងអភិវឌ្ឍន៍ជនបទ ដែលបានដើរតួសកម្មនៅក្នុងការបង្កើនភាពធន់លើការសាងសង់ និងស្តង់ដារថែទាំផ្លូវ។ គម្រោងនេះនឹងបន្តធ្វើពីដំណាក់កាលទី១ នៃគម្រោងគ្រប់គ្រងហានិភ័យគ្រោះធម្មជាតិអាស៊ីអាគ្នេយ៍នៅកម្ពុជា ដោយផ្តោតសំខាន់លើការពង្រីកបណ្ដាញតភ្ជាប់ផ្លូវជនបទដែលធន់នឹងកត្តាអាកាសធាតុ និងលើការពង្រឹងការរៀបចំផែនការហិរញ្ញវត្ថុរបស់ក្រសួងអភិវឌ្ឍន៍ជនបទសម្រាប់ទ្រទ្រង់ភាពធន់នឹងគ្រោះធម្មជាតិ។
បើតាមសេចក្ដីប្រកាសព័ត៌មានរបស់ធនាគារពិភពលោក កញ្ចប់ហិរញ្ញប្បទានថ្មីនេះនឹងពង្រឹងសមត្ថភាពរបស់ក្រសួងក្នុងការត្រៀមលក្ខណៈ ការឆ្លើយតប និងការស្ដារស្ថានភាពក្រោយមានគ្រោះធម្មជាតិ ព្រមទាំងទ្រទ្រង់ដល់ការរៀបចំផែនការទុកជាមុន និងការគ្រប់គ្រងហានិភ័យទឹកជំនន់នៅក្នុងតំបន់ទន្លេសាបដែលរងការខូចខាតខ្លាំងក្នុងឆ្នាំ២០២០។
ប្រភពដដែលបន្តថា ថវិកានេះគឺជាឥណទានពីសមាគមអភិវឌ្ឍន៍អន្តរជាតិនៃធនាគារពិភពលោក ហើយក៏មានជំនួយទឹកប្រាក់ចំនួន៤៥០ ០០០ដុល្លារអាមេរិកទៀត ពីកម្មវិធីរួមគ្នារវាងប្រទេសជប៉ុន និងធនាគារពិភពលោក សម្រាប់បញ្ជ្រាបការគ្រប់គ្រងហានិភ័យគ្រោះធម្មជាតិនៅតាមប្រទេសកំពុងអភិវឌ្ឍន៍ (Japan-Bank Program for Mainstreaming DRM in Developing Countries) ដែលកម្មវិធីនេះទទួលថវិកាពីរដ្ឋាភិបាលជប៉ុន និងគ្រប់គ្រងដោយមូលនិធិសកលសម្រាប់កាត់បន្ថយនិងស្តារឡើងវិញពីគ្រោះធម្មជាតិ។ កម្ពុជានឹងរួមចំណែកថវិកាបដិភាគចំនួន២លានដុល្លារអាមេរិកទៅក្នុងកញ្ចប់ហិរញ្ញប្បទានថ្មីនេះ៕