អង្គការសហប្រជាជាតិ (អ.ស.ប) ប្រចាំកម្ពុជា អះអាងថា អង្គការអន្តរជាតិមួយនេះមិនបានផ្ដល់ការគាំទ្រ ឬចូលរួមសង្កេតការណ៍បោះឆ្នោតជ្រើសរើសក្រុមប្រឹក្សាឃុំសង្កាត់នៅឆ្នាំ២០២២នេះទេ តែនឹងបន្តតាមដានដោយយកចិត្តទុកដាក់។
ប្រធានអង្គការសហប្រជាជាតិប្រចាំកម្ពុជា លោកស្រី ផូលីន តាម៉េស៊ីស (Ms Pauline Tamesis) បានសរសេរសារបែបនេះ ដែលត្រូវបានផ្សព្វផ្សាយនៅលើបណ្ដាញសង្គមរបស់អង្គការសហប្រជាជាតិប្រចាំនៅកម្ពុជា កាលពីថ្ងៃទី២៦ ខែឧសភា។
យ៉ាងណាក្តី លោកស្រីបានអំពាវនាវឱ្យរាជរដ្ឋាភិបាលកម្ពុជា មេដឹកនាំគណបក្សនយោបាយ ព្រមទាំងអ្នកគាំទ្ររបស់ពួកគេទាំងអស់ ចូលរួមធានាឱ្យមានដំណើរការបោះឆ្នោតមួយប្រកបដោយបរិយាបន្ន ស្មោះត្រង់ និងសន្តិវិធី ក្នុងក្របខណ្ឌនៃការគោរពសិទ្ធិមនុស្សឱ្យបានពេញលេញ។ លោកស្រីបន្តថា នៅក្នុងបរិការណ៍នេះ មានសារៈសំខាន់ណាស់សម្រាប់ឆ្លុះបញ្ចាំងពីការសម្ដែងឆន្ទៈដោយសេរីរបស់ប្រជាពលរដ្ឋកម្ពុជា។
អ្នកសម្របសម្រួលផ្នែកអង្កេតនិងតស៊ូមតិ នៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្រ្វែល) លោក កន សាវាង្ស ថ្លែងថា លោកមិនបានដឹងពីមូលហេតុនៅពីក្រោយនៃការប្រកាសរបស់ប្រធានអង្គការសហប្រជាជាតិប្រចាំកម្ពុជានេះទេ។ ប៉ុន្តែលោកថា ការប្រកាសបែបនេះទំនងបណ្ដាលមកពីការបាត់បង់ទំនុកចិត្តលើការរៀបចំការបោះឆ្នោតនៅកម្ពុជា ចាប់តាំងពីមានការរំលាយគណបក្សសង្គ្រោះជាតិដែលជាគណបក្សប្រឆាំងកាលពីឆ្នាំ២០១៧មក។
លោកថា៖ «ខ្ញុំពិបាកក្នុងការបកស្រាយនូវដើមហេតុរបស់គេ [អ.ស.ប] ណាស់ ប៉ុន្តែជាទូទៅ អង្គការសហប្រជាជាតិ ទាំងសហគមន៍អឺរ៉ុប ទាំងសហរដ្ឋអាមេរិក ឬក៏ប្រទេសអន្តរជាតិផ្សេងៗ គេតែងតែដិតដល់ក្នុងការតាមដាននៅក្នុងដំណើររឿងទាក់ទងលទ្ធិប្រជាធិបតេយ្យនៅកម្ពុជា ជាពិសេសក្រោយពីមានការរំលាយគណបក្សនយោបាយ ជាពិសេសគណបក្សសង្គ្រោះជាតិ ដែលទាំងសហគមន៍អន្តរជាតិក៏ដោយ ទាំងអង្គការសិទ្ធិមនុស្សក៏ដោយ តែងតែរម្លឹកឱ្យរាជរដ្ឋាភិបាលមានការស្ដារឬងាកមករកគន្លងលទ្ធិប្រជាធិបតេយ្យ ឬការបោះឆ្នោតហ្នឹងឱ្យមានការចូលរួមពីគណបក្សដែលប្រឆាំងហ្នឹង ជាពិសេសឱ្យដំណើរការហ្នឹងគោរពតាមលទ្ធិប្រជាធិបតេយ្យ»។
សហភាពអឺរ៉ុបប្រចាំនៅកម្ពុជា កាលពីថ្ងៃទី២០ ខែឧសភា ក៏បានប្រកាសស្រដៀងគ្នានេះដែរថា សហភាពអឺរ៉ុបនឹងមិនដាក់អ្នកសង្កេតការណ៍បោះឆ្នោតឃុំសង្កាត់ អាណត្តិទី៥ ឆ្នាំ២០២២នេះទេ ក៏ប៉ុន្តែពួកគេនឹងបន្តតាមដានដោយយកចិត្តទុកដាក់ចំពោះដំណើរការបោះឆ្នោតឃុំសង្កាត់នៅកម្ពុជានេះ។
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា ថ្លែងថា ការប្រកាសរបស់ភាគីអង្គការសហប្រជាជាតិនេះ មិនប៉ះពាល់ដល់ដំណើរការបោះឆ្នោតនៅកម្ពុជានោះទេ។
លោកថា៖ «ជាការពិត ភាគីអន្តរជាតិជាភាគីសំខាន់ ប៉ុន្តែអ្វីដែលកំណត់ពីជោគវាសនារបស់ប្រទេសកម្ពុជា គឺប្រជាពលរដ្ឋកម្ពុជា ដែលលោកជាម្ចាស់ឆ្នោតផ្ទាល់ គណបក្សនយោបាយដែលលោកជាអ្នកឈរឈ្មោះ លោកពេញចិត្តក្នុងការប្រកួតប្រជែង ហើយការរៀបចំបម្រើសេវាបោះឆ្នោតរបស់គណៈកម្មាធិការជាតិរៀបចំការបោះឆ្នោត និងភាគីពាក់ព័ន្ធផ្សេងទៀត នោះគឺជាស្ថានភាពចាំបាច់ដែលត្រូវធ្វើការវាយតម្លៃថាតើការបោះឆ្នោតនេះប្រព្រឹត្តទៅដូចម្តេច។ អ៊ីចឹងចំពោះទស្សនៈឬក៏ការប្រកាសព័ត៌មានរបស់ស្ថាប័នផ្សេងៗ ឬក៏ស្ថាប័នអន្តរជាតិណាមួយនោះ នោះគឺជាការលើកឡើងជាមតិដោយឡែក មិនធ្វើឱ្យប៉ះពាល់ដល់ដំណើរការបោះឆ្នោតនោះទេ»។
បើតាមលោក ហង្ស ពុទ្ធ កម្ពុជាបានចំណាយថវិកាសម្រាប់រៀបចំការបោះឆ្នោតក្រុមប្រឹក្សាឃុំសង្កាត់ឆ្នាំ២០២២នេះជាង៤០លានដុល្លារ។
ចាប់តាំងពីការរំលាយគណបក្សសង្គ្រោះជាតិកាលពីឆ្នាំ២០១៧មក សហភាពអឺរ៉ុប សហរដ្ឋអាមេរិក និងអង្គការអន្តរជាតិមួយចំនួនបានប្រកាសផ្តាច់ជំនួយជាបន្តបន្ទាប់ដល់ស្ថាប័នរៀបចំការបោះឆ្នោត (គ.ជ.ប) និងអង្គការសង្គមស៊ីវិលដែលធ្វើការងារលើការបោះឆ្នោតនៅកម្ពុជាផងដែរ។
ដោយឡែក កាលពីថ្ងៃទី៥ ខែឧសភា សភាសហភាពអឺរ៉ុបក៏បានអនុម័តលើញត្តិមួយថ្មីបន្ថែមទៀត ដោយអំពាវនាវឱ្យប្រទេសជាសមាជិកអឺរ៉ុបទាំង២៧ ឱ្យបន្តដាក់ទណ្ឌកម្មលើប្រទេសកម្ពុជា ដោយដកហូតប្រព័ន្ធអនុគ្រោះពន្ធ EBA ទាំងស្រុងពីកម្ពុជា ប្រសិនបើការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃអាទិត្យ ទី៥ ខែមិថុនា ឆ្នាំ២០២២ និងការបោះឆ្នោតជ្រើសតាំងតំណាងរាស្រ្តនៅឆ្នាំ២០២៣ខាងមុខនេះ ត្រូវបានគេរកឃើញថា គ្មានភាពសេរី ត្រឹមត្រូវ និងយុត្តិធ៌ម។
គិតត្រឹមថ្ងៃទី២៧ ខែឧសភានេះ គ.ជ.ប មិនទាន់មានអ្នកសង្កេតការណ៍អន្តរជាតិស្នើសុំចូលរួមសង្កេតការណ៍បោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០២២នេះទេ គឺមានតែភ្ញៀវពិសេស [ឃ្លាំមើលតែមិនវាយតម្លៃ] មកពីស្ថានទូតជប៉ុន សហភាពអឺរ៉ុប និងស្ថានទូតអូស្ត្រាលី តែប៉ុណ្ណោះ៕
