កម្មករសំណង់ប្រមាណ៣០០នាក់ បម្រើការងារនៅការដ្ឋានសំណង់ចិនមួយកន្លែងស្ថិតភូមិ៣ សង្កាត់លេខ៤ ក្រុងព្រះសីហនុ បានផ្ទុះការតវ៉ា ក្រោយម្ចាស់សំណង់ជាជនជាតិចិនមិនបានបើកប្រាក់ឈ្នួលជូនពួកគេ។
កម្មករសំណង់មួយរូបដែលអះអាងថាកំពុងតវ៉ាជាមួយកម្មករសំណង់ផ្សេងទៀត អ្នកស្រី ម៉ែន និត ប្រាប់វីអូឌីនៅថ្ងៃចន្ទនេះថា ក្រុមកម្មករប្រមាណ៣០០នាក់បានផ្ទុះការតវ៉ា កាលពីថ្ងៃម្សិលមិញ និងនៅថ្ងៃចន្ទនេះ ដើម្បីទាមទារប្រាក់ឈ្នួលដែលម្ចាស់សំណង់ជាជនជាតិចិនបានខកខានបើកជូនពួកគាត់រយៈពេល៤ខែមកហើយ។ អ្នកស្រីអះអាងថា ម្ចាស់សំណង់បានជំពាក់ប្រាក់ឈ្នួលកម្មករ និងអ្នកម៉ៅការសំណង់រាប់ម៉ឺនដុល្លារ។
អ្នកស្រីបញ្ជាក់ថា ក្នុងរយៈពេល៤ខែមកនេះ ម្ចាស់សំណង់ជំពាក់ប្រាក់ឈ្នួលអ្នកស្រីប្រហែល៣ ០០០ដុល្លារ។ ស្ត្រីរូបនេះអះអាងទៀតថា ពេលកម្មករផ្ទុះការតវ៉ា ជនជាតិចិនបានបាញ់គំរាមនិងប្រើហិង្សាលើកម្មករថែមទៀត ខណៈការតវ៉ានោះពុំមានអាជ្ញាធរឬសមត្ថកិច្ចណាចុះជួយដោះស្រាយឡើយ។
អ្នកស្រីបន្ថែមថា៖ «ចិនវាបានបង្ខំពួកខ្ញុំឱ្យធ្វើការងារទាំងយប់ទាំងថ្ងៃ ឱ្យធ្វើការឱ្យវាឱ្យឆាប់ហើយ ចាំវាបើកលុយសរុបមកឱ្យ ប៉ុន្តែពេលដល់ថ្ងៃដល់ខែ វាអត់បើកលុយឱ្យពួកខ្ញុំទេ បង្ខំពួកខ្ញុំឱ្យធ្វើការយប់ ជួលកាលដល់ម៉ោង១ឬម៉ោង២[ទៀបភ្លឺ]។ បងចាំជួយប្រាប់ឱ្យចុះមកមើលតិចមក ព្រោះមិញហ្នឹងចិនវាបានវាយកម្មករខ្មែរយើង ហើយមុនហ្នឹងវាបានបាញ់កាំភ្លើងចុះមកក្រោម»។
អ្នកស្រី សុខ សេរីសោភ័ណ្ឌ ដែលអះអាងថាជាមេការសំណង់នៅអគារការដ្ឋានរបស់ជនជាតិចិននោះ បានឱ្យដឹងដែរថា ម្ចាស់សំណង់ជាជនជាតិចិនបានជំពាក់លុយអ្នកស្រីចំនួន៤៥ម៉ឺនដុល្លារ ដែលធ្វើឱ្យអ្នកស្រីគ្មានលុយសម្រាប់បើកជូនកម្មករបន្ត។ អ្នកស្រីថា មន្ត្រីមន្ទីរការងារខេត្តព្រះសីហនុបានចុះទៅដោះស្រាយដែរកាលពីថ្ងៃម្សិលមិញ ប៉ុន្តែពុំមានដំណោះស្រាយណាមួយសម្រាប់កម្មករឡើយ។
មេការសំណង់រូបនេះបានស្នើដល់អាជ្ញាធរខេត្តព្រះសីហនុចុះសម្របសម្រួល និងជួយរកដំណោះស្រាយជូនកម្មករ ដោយថាពួកគេកំពុងជួបការខ្វះខាតលើការចំណាយផ្សេងៗក្នុងគ្រួសារ។
អ្នកស្រីបន្ថែមថា៖ «ចិនគាត់អត់បើកលុយក្រុមហ៊ុនខ្ញុំទេ ឥលូវកម្មករតវ៉ាហើយ ខ្ញុំក៏អត់មានលុយបើកឱ្យកម្មករដែរ»។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ មានប្រសាសន៍ថា ពិតជាមានករណីកម្មករសំណង់ផ្ទុះការតវ៉ាមែន ប៉ុន្តែពុំមានហិង្សានិងផ្ទុះអាវុធដូចការលើកឡើងរបស់កម្មករឡើយ។ លោកថា មន្ត្រីជំនាញកំពុងដោះស្រាយករណីនេះ។
ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តព្រះសីហនុ លោក យ៉ូវ ខេមរា មានប្រសាសន៍ថា វិវាទការងារនេះកើតឡើងរវាងម្ចាស់ការដ្ឋាននិងអ្នកម៉ៅការបន្ត ហើយកម្មករដែលកំពុងតវ៉ានោះជាកម្មកររបស់អ្នកម៉ៅការបន្ត។
លោកបន្តថា អ្នកដែលតវ៉ាមួយចំនួនបានបន្លំខ្លួនធ្វើជាកម្មករ ដើម្បីទាមទារប្រាក់ឈ្នួលដែរ ដែលបញ្ហានេះធ្វើឱ្យមន្ទីរការងារពិបាកក្នុងការដោះស្រាយ។ ទោះយ៉ាងណា លោកថា អាជ្ញាធរកំពុងស្រាវជ្រាវរកអ្នកដែលបន្លំខ្លួន ដើម្បីឈានទៅរកការដោះស្រាយបញ្ចប់។
លោកបន្ថែមថា៖ «ដល់ពេលអ៊ីចឹងទៅ យើងត្រូវចំណាយពេលសម្ភាសម្នាក់៤ទៅ៥នាទី ដើម្បីញែកថា កម្មករណាធ្វើការងារនៅហ្នឹង កម្មករណាមកពីខាងក្រៅបន្លំ។ អ៊ីចឹងយើងរកឃើញប្រហែល៥ទៅ៦នាក់ ហើយខាងសមត្ថកិច្ចគាត់ហៅទៅសួរនាំបន្ថែមតាមនីតិវិធីហ្នឹង។ បើយើងអត់ប្រើវិធីសាស្ត្រញែកហ្នឹងទេ គឺដោះស្រាយអត់ចប់ទេ។ ក្រោយពីញែកឃើញអស់ហើយ ម្ចាស់ការដ្ឋានគាត់នឹងវាស់ទៅលើទំហំការងារដែលអ្នកម៉ៅការគាត់បានធ្វើ ហើយគាត់នឹងទូទាត់លុយឱ្យកម្មករមុនជាបឋម»។
ប្រធានសហព័ន្ធសហជីពកម្មករសំណង់ និងព្រៃឈើកម្ពុជា (BWTUC) លោក សុខ គីន យល់ថា ករណីម្ចាស់ការដ្ឋានមិនបើកប្រាក់ឈ្នួលជូនកម្មករសំណង់នេះ ជាការធ្វេសប្រហែស និងជាការមិនសូវយកចិត្តទុកដាក់របស់អាជ្ញាធរពាក់ព័ន្ធ ដែលនេះជាបញ្ហាប្រឈមមួយទៀតរបស់កម្មករសំណង់។
លោ សុខ គីន ស្នើដល់អាជ្ញាធរពាក់ព័ន្ធ ជាពិសេសមន្ទីរការងារខេត្តដោះស្រាយបញ្ហានេះឱ្យមានតម្លាភាពយុត្តិធម៌សម្រាប់កម្មករដែលរងទុក្ខលំបាក។ លោកថា បើដោះស្រាយមិនបានល្អទេ នោះនឹងបង្កជាទម្លាប់អាក្រក់របស់និយោជកក្នុងការកេងប្រវ័ញ្ចកម្លាំងពលកម្មកម្មករ។
លោកបន្ថែមថា៖ «នេះវាជាបញ្ហាប្រឈមមួយរបស់កម្មករសំណង់ គាត់ធ្វើការមួយថ្ងៃ គាត់ហូបមួយថ្ងៃ ហើយរហូតដល់៣ទៅ៤ខែ អត់បើកប្រាក់ឈ្នួលឱ្យគាត់ ហើយថែមទាំងប្រើអំពើហិង្សាលើគាត់ទៀត។ អានេះខ្ញុំថាវាជាអំពើមួយខុសច្បាប់ទាំងស្រុងតែម្តង។ កម្មករសំណង់គាត់ធ្វើការដោយដូរកម្លាំងពលកម្មយកប្រាក់ឈ្នួល អ៊ីចឹងគាត់អត់ទាមទារអីឱ្យលើសពីប្រាក់ឈ្នួលរបស់ពួកគាត់ទេ»។
បើតាមប្រធានសហព័ន្ធសហជីពរូបនេះ បច្ចុប្បន្ននេះ កម្មករសំណង់កំពុងប្រឈមបញ្ហាចំនួន៣ រួមមាន បញ្ហាប្រាក់ឈ្នួល បញ្ហាគ្រោះថ្នាក់ការងារ និងប្រព័ន្ធគាំពារសង្គម ដូចជា គ្មានបណ្ណ ប.ស.ស ជាដើម៕