ពលរដ្ឋដែលរងផលប៉ះពាល់ពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី ស្ថិតក្នុងស្រុកកណ្ដាលស្ទឹង ខេត្តកណ្ដាល អះអាងថា រហូតមកដល់ពេលនេះ ពួកគាត់នៅមិនទាន់ទទួលបានដំណោះស្រាយរឿងដីធ្លីនៅឡើយទេ ទោះបីមានបទបញ្ជាពីលោកស្រី ម៉ែន សំអន។
កាលពីថ្ងៃទី៩ ខែឧសភា ឆ្នាំ២០២២ រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច លោកស្រី ម៉ែន សំអន បានបញ្ជាទៅអភិបាលខេត្តកណ្ដាល លោក គង់ សុភ័ណ្ឌ ឱ្យពិនិត្យនិងដោះស្រាយសំណងជូនពលរដ្ឋជាង១០០គ្រួសារ រស់នៅឃុំបឹងខ្យាង ឃុំព្រែកស្លែង ស្រុកកណ្ដាលស្ទឹង ខេត្តកណ្ដាល ដែលកំពុងមានជម្លោះជាមួយក្រុមហ៊ុន OCIC និងក្រុមហ៊ុន CAIC ដែលជាក្រុមហ៊ុនម៉ៅការសាងសង់ព្រលានយន្តហោះអន្តរជាតិភ្នំពេញថ្មី។
តំណាងពលរដ្ឋនៅឃុំបឹងខ្យាង អ្នកស្រី ឃឹម ម៉ាលី ប្រាប់ វីអូឌី នៅថ្ងៃអង្គារនេះថា មានរយៈពេលជាង២០ថ្ងៃមកហើយដែលលោកស្រី ម៉ែន សំអន បានចេញលិខិតបញ្ជាទៅអភិបាលខេត្តកណ្ដាលឱ្យដោះស្រាយសំណងដីធ្លីជូនពលរដ្ឋ ប៉ុន្តែរហូតមកដល់ពេលនេះ អាជ្ញាធរខេត្តនៅមិនទាន់មានសកម្មភាពថ្មីណាមួយក្នុងការដោះស្រាយសំណងជូនពួកគាត់នៅឡើយទេ។
តំណាងពលរដ្ឋរូបនេះបានបង្ហាញការខកចិត្តចំពោះអាជ្ញាធរខេត្តកណ្ដាលដែលមិនអនុវត្តតាមបទបញ្ជាថ្នាក់លើ ខណៈពលរដ្ឋខ្លះកំពុងជួបការលំបាកក្នុងជីវភាពគ្រួសារដោយសារខ្វះដីបង្កបង្កើនផល និងខ្លះទៀតពិបាកចិត្តខ្លាចអាជ្ញាធរមិនដោះស្រាយឱ្យពួកគាត់។
អ្នកស្រីបន្ថែមថា៖ «ឥលូវនេះ អារម្មណ៍ពួកខ្ញុំពិបាកខ្លាំងណាស់ ដោយសារស្រែក៏អត់បានធ្វើ រាល់ឆ្នាំពួកខ្ញុំអាស្រ័យផលលើស្រែទាំងអស់ហ្នឹង ដល់ពេលឥលូវអាជ្ញាធរបិទ៣ទៅ៤ឆ្នាំហើយ។ ឥលូវនេះ លោកជំទាវ ម៉ែន សំអន បញ្ជាឱ្យដោះស្រាយហើយ អភិបាលខេត្តហ្នឹងគាត់អត់មានពន្លឿនដោះស្រាយជូនពួកខ្ញុំ គាត់នៅតែឱ្យតម្លៃ៨ដុល្លារ [ក្នុងមួយម៉ែត្រការ៉េ] ហ្នឹង! ហើយដីនៅជុំវិញហ្នឹងគិតតែឡើងថ្លៃរហូត ហើយពួកខ្ញុំទទួលយកម៉េចបាន ៨ដុល្លារហ្នឹង? បើដីគេនៅជិតហ្នឹងឡើងថ្លៃទ្វេមួយជាពីរជាបីហើយហ្នឹង»។
អភិបាលខេត្តកណ្ដាល លោក គង់ សុភ័ណ្ឌ ប្រាប់ វីអូឌី យ៉ាងខ្លីថា អាជ្ញាធរខេត្តនឹងពិគ្រោះគ្នាដោះស្រាយករណីនេះទៀត នៅក្រោយការបោះឆ្នោតជ្រើសរើសក្រុមប្រឹក្សាឃុំសង្កាត់។
លោកបន្ថែមថា៖ «អ្វីដែលយើងត្រូវដោះស្រាយ យើងកំពុងតែដោះ! ហើយអ្វីដែលកំពុងដោះ យើងនឹងពិគ្រោះគ្នាជាគោលការណ៍បន្តបន្ទាប់ទៀត»។
ក្នុងញត្តិរបស់អ្នកភូមិដាក់ទៅក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច កាលពីថ្ងៃទី១០ ខែមីនា ឆ្នាំ២០២២ បានឱ្យដឹងថា ពលរដ្ឋ១២១គ្រួសារសុំអន្តរាគមន៍ដោះស្រាយសំណងដីធ្លីសរុប ៦៣ហិកតា ៩២អា។
ញត្តិដដែលបន្តថា ដីរបស់ពួកគេមានបណ្ណកម្មសិទ្ធិស្របច្បាប់ ប៉ុន្តែអាជ្ញាធរដោះស្រាយដោយផ្ដល់សំណងត្រឹម «៨ដុល្លារក្នុង១ម៉ែត្រការ៉េ» ប៉ុណ្ណោះ ខណៈបច្ចុប្បន្ន តម្លៃដីនៅជុំវិញតំបន់នោះមានតម្លៃចន្លោះពី៥០ទៅ១០០ដុល្លារក្នុង១ម៉ែត្រការ៉េ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា អ្វីដែលថ្នាក់ដឹកនាំក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច ចេញលិខិតឱ្យអភិបាលខេត្តកណ្តាលដោះស្រាយផលប៉ះពាល់ជូនពលរដ្ឋនោះ គ្រាន់តែជាវិធីសាស្ត្រធ្វើឱ្យពលរដ្ឋស្ងប់ចិត្តប៉ុណ្ណោះ។ យ៉ាងណា លោកថា បញ្ហានេះ អាជ្ញាធរខេត្តមិនអាចដោះស្រាយបានទេ ព្រោះការអភិវឌ្ឍនោះជាការសម្រេចរបស់រដ្ឋាភិបាល។
លោកបន្ថែមថា៖ «លិខិតរបស់ក្រសួងស្នើឱ្យអភិបាលខេត្តពិនិត្យឡើងវិញ និងដោះស្រាយជូនពលរដ្ឋ វាអត់មានន័យអីទេ! វាគ្រាន់តែធ្វើឱ្យប្រជាពលរដ្ឋគាត់ស្ងប់ចិត្តមួយរយៈប៉ុណ្ណោះ។ ប៉ុន្តែជាសមត្ថកិច្ច មិនអាចដោះស្រាយបានទេ ព្រោះលោកអភិបាលខេត្ត លោកមានប្រសាសន៍ពេលថ្មីៗនេះថា ការអភិវឌ្ឍនេះសម្រាប់ជាតិទាំងមូល ហើយជាការសម្រេចចិត្តរបស់រដ្ឋាភិបាល។ អ៊ីចឹងអ្នកដែលសម្រេចក្នុងការដោះស្រាយរឿងនេះបាន គឺមានតែរដ្ឋាភិបាលទេ»។
មន្ត្រីសិទ្ធិមនុស្សរូបនេះឱ្យដឹងថា តាមច្បាប់រដ្ឋធម្មនុញ្ញ ច្បាប់ភូមិបាល និងច្បាប់អស្សាមិករណ៍ គឺរដ្ឋអាចដកហូតដីពលរដ្ឋមានបណ្ណកម្មសិទ្ធិស្របច្បាប់ទៅអភិវឌ្ឍបាន លុះត្រាតែមានការផ្ដល់សំណងសមរម្យ និងមានការយល់ស្របពីម្ចាស់អចលនវត្ថុ។
កាលពីថ្ងៃទី៣ ខែមិថុនា ឆ្នាំ២០២០ រដ្ឋាភិបាលបានចេញអនុក្រឹត្យមួយដោយផ្ដល់ដីរដ្ឋទំហំប្រមាណ២ ៦០០ហិកតា ដែលលាតសន្ធឹងលើស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ ទៅឱ្យក្រុមហ៊ុនវិនិយោគអាកាសយានដ្ឋានកម្ពុជា (CAIC) វិនិយោគរួមគ្នាជាមួយសាជីវកម្មក្រៅប្រទេស និងលេខាធិការដ្ឋានអាកាសចរណ៍ស៊ីវិល ដើម្បីអភិវឌ្ឍព្រលានយន្តហោះអន្តរជាតិភ្នំពេញថ្មីមួយនេះ។
កាលពីថ្ងៃទី៦ ខែកក្កដា ឆ្នាំ២០២១ ពលរដ្ឋបានចេញលិខិតចំហមួយដោយបញ្ជាក់ថា គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី បានធ្វើឱ្យប៉ះពាល់ប្រជាពលរដ្ឋ ៣៣០គ្រួសារ និងដីទំហំជាង១លានម៉ែត្រការ៉េ ដែលភាគច្រើនជាដីមានបណ្ណកម្មសិទ្ធិស្របច្បាប់ ស្ថិតក្នុងឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្តាលស្ទឹង និងឃុំពត់សរ ស្រុកបាទី៕