ប្រធានក្រុមប្រឹក្សាសហភាពអឺរ៉ុប (EU) លោក Charles Michel បានឱ្យដឹងថា ថ្នាក់ដឹកនាំទាំងឡាយរបស់ប្លុកនេះ បានសម្រេចយល់ព្រមគ្នាកាលពីថ្ងៃចន្ទម្សិលមិញ ក្នុងការហាមឃាត់ការនាំចូលប្រេងរបស់រុស្ស៊ីមកកាន់ប្លុកដែលមានប្រទេសចំនួន២៧របស់ខ្លួនមួយនេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
តាមរយៈការបង្ហោះសារក្នុងបណ្តាញសង្គម ធ្វីតទ័រ (Twitter) ប្រធានក្រុមប្រឹក្សារូបនេះ បន្ថែមថា៖ «វិធានដែលគ្របដណ្តប់ច្រើនជាងពីរភាគបីនៃការនាំចូលប្រេងពីប្រទេសរុស្ស៊ីនេះ នឹងមានផលប៉ះពាល់ភ្លាមៗដល់ប្រភពហិរញ្ញប្បទានដ៏ធំរបស់រុស្ស៊ីក្នុងការផ្គត់ផ្គង់ដល់សង្គ្រាមរបស់ពួកគេ»។
ជាមួយគ្នានេះ លោក Charles Michel បន្តថា ថ្នាក់ដឹកនាំនានារបស់ប្លុកប្រទេសទាំងនោះ ក៏បានយល់ព្រមកាត់ផ្តាច់ធនាគាររុស្ស៊ីដ៏ធំបំផុតឈ្មោះ Sberbank ចេញពីប្រព័ន្ធទូទាត់សកល SWIFT និងហាមឃាត់ប្រព័ន្ធផ្សព្វផ្សាយរបស់រដ្ឋរុស្ស៊ីចំនួន៣បន្ថែមទៀតផងដែរ។
គួរបញ្ជាក់ថា សហភាពអឺរ៉ុបបានបើកកិច្ចពិភាក្សាគ្នាជាបន្តបន្ទាប់ ដើម្បីសម្រេចដាក់ទណ្ឌកម្មថ្មីមួយចំនួនទៀតលើប្រទេសរុស្ស៊ី ទាក់ទងនឹងសង្រ្គាមឈ្លានពានរបស់ខ្លួនលើអ៊ុយក្រែន ដែលក្នុងនោះ គេសង្កេតឃើញមានការផ្តោតសំខាន់លើឧស្សាហកម្មប្រេងរបស់រុស្ស៊ីផងដែរ។
ទោះជាយ៉ាងណា មន្ត្រីមួយរូបរបស់ក្រសួងការបរទេសរុស្ស៊ី ធ្លាប់បានឱ្យដឹងកាលពីពេលកន្លងទៅថាប្រទេសរបស់ខ្លួនមិនមានគម្រោងក្នុងការស្នើសុំឱ្យសហភាពអឺរ៉ុប (EU) បញ្ចប់ការដាក់ទណ្ឌកម្មទាំងឡាយមកលើខ្លួននោះទេ ដោយលោកអះអាងថា សហភាពអឺរ៉ុបមិនមែនជាមជ្ឈមណ្ឌលនៃសកលលោក [ដែលមិនអាចខ្វះបាន] ឡើយ៕
