ជនជាតិដើមភាគតិចកួយដែលកំពុងមានជម្លោះដីធ្លីជាមួយក្រុមហ៊ុនចិននៅខេត្តព្រះវិហារ ស្នើទៅតុលាការឱ្យច្រានចោលការចោទប្រកាន់លើពួកគេទាំង៥នាក់វិញ ដោយថា ពួកគេមិនបានប្រព្រឹត្តដូចការចោទប្រកាន់របស់ឈ្មោះ លី គឹមស្រេង ឡើយ។
ការស្នើរបស់ជនជាតិដើមភាគតិចកួយទាំង៥នាក់ ធ្វើឡើងអំឡុងពេលពួកគេត្រូវបានសាលាដំបូងខេត្តព្រះវិហារកោះហៅ នាព្រឹកថ្ងៃពុធនេះ ដើម្បីសាកសួរពីដំណើររឿង «ការគំរាមកំហែងថានឹងសម្លាប់ និងគំរាមកំហែងថានឹងធ្វើឱ្យខូចខាត» ដែលប្រព្រឹត្តនៅភូមិស្រែព្រាង ឃុំប្រមេរ ស្រុកត្បែងមានជ័យ ខេត្តព្រះវិហារ កាលពីថ្ងៃទី៤ ទី១២ និងទី១៣ ខែកុម្ភៈ ឆ្នាំ២០២២។
ជនជាតិដើមភាគតិចកួយ ទាំង៥នាក់ ដែលតំណាងអយ្យការអមសាលាដំបូងខេត្តព្រះវិហារ លោក វុធ សាវី កោះហៅឱ្យចូលបំភ្លឺ រួមមាន លោក ថោង ស៊ុត, លោក ស៊ុត សាវន, លោក ថាប់ សុខឃី, លោក ងន ហ៊ីម និងអ្នកស្រី រឿន ខាត់ (ហៅខាន់)។
ជនជាតិដើមភាគតិចកួយ រស់នៅឃុំប្រមេរ លោក ស៊ុត សាវន ប្រាប់ វីអូឌី បន្ទាប់ពីចូលបំភ្លឺនៅតុលាការថា រូបលោកនិងអ្នកផ្សេងទៀតមិនបានទៅគំរាមកំហែងសម្លាប់បុគ្គលឈ្មោះ លី គឹមស្រេង ឡើយ។
លោកចាត់ទុកការប្ដឹងរូបលោកនិងអ្នកផ្សេងទៀតទៅតុលាការ ថាជាការគំរាមកំហែង ដើម្បីបំបាក់ស្មារតីមិនឱ្យពួកគាត់តវ៉ារឿងដីធ្លីទៀត ស្របពេលដែលកន្លងមក ពួកគាត់តែងតែចុះទៅហាមឃាត់ត្រាក់ទ័ររបស់បុគ្គលឈ្មោះ លី គឹមស្រេង មិនឱ្យភ្ជួរនៅលើដីដែលកំពុងមានទំនាស់ និងមិនទាន់បានដោះស្រាយ។
លោកថា៖ «ការចេញប្ដឹង វាជាលក្ខណៈគំរាមកំហែងដល់ពួកយើង។ បងប្អូននៅតែមានការទាមទារតវ៉ារហូតហ្នឹង ព្រោះដីគាត់នៅទីនោះ ហើយគាត់ឱ្យធ្វើអីនៅណា បើគាត់មិនធ្វើនៅដីស្រែគាត់ហ្នឹង?»
លោកបន្តថា៖ «យើងសំណូមពរឱ្យខាងតុលាការបញ្ចប់ការចោទប្រកាន់លើពួកខ្ញុំចាប់ពីថ្ងៃហ្នឹង។ វាអយុត្តិធម៌សម្រាប់យើងអ៊ីចឹង។ ហើយមួយទៀត វាចេះតែរំខាន ហើយមិនបានធ្វើការងារផ្សេងៗ រវល់តែឡើងតុលាការអ៊ីចឹង»។
វីអូឌី មិនអាចសុំការបំភ្លឺពីបុគ្គលឈ្មោះ លី គឹមស្រេង បានទេ នៅថ្ងៃពុធនេះ។
យ៉ាងណាក៏ដោយ អំឡុងពេលដែលជនជាតិដើមភាគកួយទាំង៥នាក់ចូលបំភ្លឺក្នុងតុលាការនោះ ប្រជាសហគមន៍ជនជាតិដើមភាគតិចកួយ ប្រមាណ១០០នាក់បាននាំគ្នាឡើងទៅប្រមូលផ្ដុំនៅមុខតុលាការ ដើម្បីតាមដាននិងលើកទឹកចិត្តអ្នកទាំង៥នាក់។
ប្រជាសហគមន៍ម្នាក់ លោក ស៊ឹម សារិត លើកឡើងថា ពួកគាត់ទៅមុខតុលាការ នាព្រឹកថ្ងៃនេះ ដោយបារម្ភខ្លាចមានការឃាត់ខ្លួនអ្នកទាំង៥នាក់។ លោកបញ្ជាក់ថា ការប្ដឹងអ្នកទាំង៥នាក់អាចជាការគំរាមកំហែង ដោយសារតែពួកគាត់តែងតែចុះជួយ និងហាមឃាត់មិនឱ្យមានការភ្ជួរដីស្រែពួកគាត់ដែលកំពុងអាស្រ័យផលនោះ។
លោកថា៖ «ពួកខ្ញុំរំពឹងលើអាជ្ញាធរ ទោះបីជាគាត់គំរាមយ៉ាងណា ក៏យើងនៅពឹងលើគាត់ដដែល។ ខ្ញុំភ័យ តែចេះតែធ្វើទៅ ទោះបីគាត់គំរាមម៉េច បើមិនធ្វើ គឺអត់មានដីធ្វើទៀតទេ»។
ពាក់ព័ន្ធនឹងរឿងដីធ្លីនេះ លោក ស៊ឹម សារិត បន្តថាអភិបាលខេត្តព្រះវិហារ ធ្លាប់ចេញលិខិតហាមប្រជាពលរដ្ឋកុំធ្វើស្រែចំការលើដីនេះ បើទោះបីជាដីពួកគាត់បានអាស្រ័យផលតាំងពីដូនតាមកហើយក្ដី។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត ចាត់ទុកការប្ដឹងនេះថា គ្មានមូលដ្ឋានច្បាស់លាស់។ លោកបន្តថា ការចុះហាមឃាត់ត្រាក់ទ័រមិនឱ្យភ្ជួរដីពីសំណាក់ជនជាតិដើមភាគតិចកួយ ថាគ្រាន់តែជាការការពារដីធ្លីពួកគេតែប៉ុណ្ណោះ។
លោកថា៖ «យើងមើលទៅ ជាទិដ្ឋភាពដដែល ដែលគេធ្លាប់ប្រើប្រាស់កន្លងមក ឱ្យតែរឿងដីធ្លីហ្នឹង ច្រើនតែយកតុលាការដើម្បីធ្វើជាកន្លែងដាក់ពាក្យបណ្ដឹងសម្រាប់ពួកគាត់ ដើម្បីគំរាមកំហែង ដើម្បីបំភិតបំភ័យសម្រាប់សកម្មជនដីធ្លី។ អ៊ីចឹងករណីនេះ ខ្ញុំយល់ថា មិនមានភស្តុតាងអីត្រូវបានប្ដឹង និងចោទប្រកាន់គាត់ទេ។ សង្ឃឹមថា តុលាការ ព្រះរាជអាជ្ញា លោកនឹងតម្កល់រឿងមិនចាត់ការសម្រាប់ពួកគាត់»។
លោក អំ សំអាត ស្នើអ្នកមានប្រាក់និងអំណាចបញ្ចប់វប្បធម៌ប្រើប្រាស់ប្រព័ន្ធតុលាការ ដើម្បីប្ដឹងផ្ដល់ទៅលើសហគមន៍ដោយគ្មានភស្តុតាងគ្រប់គ្រាន់ ដែលករណីនេះ លោកថា វានឹងធ្វើឱ្យប៉ះពាល់សិទ្ធិសេរីភាពជាមូលដ្ឋានរបស់ប្រជាពលរដ្ឋ និងប៉ះពាល់ដល់ប្រព័ន្ធតុលាការផងដែរ។
លោក ស៊ុត សាវន អះអាងថា ដីដែលបុគ្គលឈ្មោះ លី គឹមស្រេង យកត្រាក់ទ័រទៅភ្ជួរនោះ ជាដីដែលពួកគាត់កំពុងមានទំនាស់ជាមួយក្រុមហ៊ុនចិន ឡានហ្វេង និង រួយហ្វេង តាំងពីឆ្នាំ២០១២ ហើយមកដល់បច្ចុប្បន្ន វិវាទដីធ្លីនេះនៅមិនទាន់បានដោះស្រាយនៅឡើយ៕