ក្រសួងព័ត៌មាន ណែនាំទៅប្រព័ន្ធផ្សព្វផ្សាយទាំងអស់ឱ្យបញ្ឈប់គ្រប់សកម្មភាពឃោសនាផ្សព្វផ្សាយព័ត៌មាន ពាក់ព័ន្ធនឹងការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២ នៅថ្ងៃទី០៤ ខែមិថុនា ឆ្នាំ២០២២ មុនថ្ងៃបោះឆ្នោតមួយថ្ងៃ ឬហៅថា «ថ្ងៃស»។
ក្នុងសេចក្ដីជូនដំណឹងរបស់ក្រសួងព័ត៌មាន ចុះថ្ងៃទី១ ខែមិថុនា ឆ្នាំ២០២២ បានឱ្យដឹងថា យុទ្ធនាការឃោសនាបោះឆ្នោតនឹងប្រព្រឹត្តទៅរយៈពេល១៤ថ្ងៃ គឺចាប់ពីថ្ងៃទី២១ ខែឧសភា ដល់ថ្ងៃទី០៣ ខែមិថុនា ឆ្នាំ២០២២ ហើយគ្រប់សកម្មភាពឃោសនាផ្សព្វផ្សាយព័ត៌មានទាំងអស់ត្រូវបញ្ឈប់ត្រឹម២៤ម៉ោងមុនថ្ងៃបោះឆ្នោតនៅថ្ងៃទី០៥ ខែមិថុនា ឆ្នាំ២០២២។
ករណីនេះ ក្រសួងបានណែនាំដល់ម្ចាស់ស្ថានីយវិទ្យុ ទូរទស្សន៍ និងម្ចាស់ប្រព័ន្ធផ្សព្វផ្សាយទាំងអស់ ត្រូវបញ្ឈប់គ្រប់សកម្មភាពឃោសនារបស់គណបក្សនយោបាយនានា នៅថ្ងៃទី៤ ខែមិថុនា ឆ្នាំ២០២២។
ក្រសួងបន្តថា ការដែលក្រសួងឱ្យបញ្ឈប់សកម្មភាពបែបនេះ ដើម្បីរក្សាភាពស្ងៀមស្ងាត់ឱ្យប្រជាពលរដ្ឋដែលជាម្ចាស់សំឡេងឆ្នោតធ្វើការសម្រេចចិត្តជ្រើសរើសតំណាងស្របច្បាប់ទៅតាមឆន្ទៈរបស់ខ្លួន តាមបទប្បញ្ញត្តិច្បាប់ បទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ឆ្នាំ២០២២។
ចំពោះស្ថានីយវិទ្យុដែលបានលក់ឬជួលម៉ោងផ្សាយជាអចិន្ត្រៃយ៍ឱ្យវិទ្យុបរទេស ឬសមាគម អង្គការក្រៅរដ្ឋាភិបាល ឬគណបក្សនយោបាយ ចាក់ផ្សាយកម្មវិធីព័ត៌មាននៅតាមស្ថានីយរបស់ខ្លួនកន្លងមក ក៏ត្រូវផ្អាករយៈពេលមួយថ្ងៃដូចគ្នាដែរ។
ការណែនាំរបស់ក្រសួងព័ត៌មាននេះ ធ្វើឡើងខណៈកម្ពុជានឹងរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នៅថ្ងៃទី៥ ខែមិថុនា ឆ្នាំ២០២២នេះ ដែលមានគណបក្សនយោបាយចំនួន១៧ បានចូលរួមប្រកួតប្រជែង៕
