មេធាវីតំណាងឱ្យក្រុមហ៊ុន GFX (GoldFX Investment) អះអាងថា ពលរដ្ឋជាង៤០០នាក់ដែលបានដាក់លុយវិនិយោគនៅក្នុងក្រុមហ៊ុន GoldFX បានព្រមព្រៀងទទួលយកប្រាក់សំណងនូវទឹកប្រាក់ចំនួន៣០ភាគរយនៃទឹកប្រាក់សរុបដែលពួកគេបានបាត់បង់។
លោកស្រី ទី គឹមស្រាន មេធាវីរបស់ក្រុមហ៊ុន GoldFX បានប្រាប់ វីអូឌី នៅថ្ងៃទី០២ ខែឧសភា ឆ្នាំ២០២២ ថាវិនិយោគិនជាង៤០០នាក់បានទទួលយកកិច្ចព្រមព្រៀងនេះ និងសំណងត្រូវបានផ្តល់ជូនកាលពីចុងសប្តាហ៍មុន និងនៅថ្ងៃចន្ទដើមសប្តាហ៍នេះ។
លោកស្រីបន្តថា ក្រុមហ៊ុនបានផ្តល់ប្រាក់ដែលបានបាត់បង់ចំនួន ៣០ភាគរយ ដូចដែលក្រុមហ៊ុនបានផ្តល់ជូនកន្លងមក ហើយអ្នកដែលព្រមទទួលយកសំណងទាំងនោះ បានបញ្ចប់រឿង ដោយព្រមដកពាក្យបណ្ដឹងទាំងអស់វិញផងដែរ។
យ៉ាងណា អ្នកស្រីថា ប្រសិនបើមានអ្នកមិនទាន់បានទទួលយកសំណងទេ គឺពួកគេអាចទាក់ទងទៅនិយ័តករមូលបត្រកម្ពុជា ដើម្បីឱ្យក្រុមហ៊ុនផ្តល់ប្រាក់សំណងជូនពួកគេ។
លោកស្រីបន្ថែមថា៖ «ពួកគាត់បានទទួលយកអស់ហើយ គាត់អត់មាននិយាយអីផង គាត់ដូចជាយកចង់អស់ហើយ។ ប្រសិនបើមានអ្នកនៅសល់ សុំឱ្យគាត់ដាក់ពាក្យទៅខាងនិយ័តករមូលបត្រ»។
វិនិយោគិន ឬពលរដ្ឋដែលបានដាក់លុយវិនិយោគជាមួយក្រុមហ៊ុន GFX លោក សិទ្ធ ស៊ីវត្ថា មានប្រសាសន៍ថា លោកបានបោះបង់ការតវ៉ា និងព្រមទទួលយកលុយសំណងទាំងមិនពេញចិត្ត ដែលក្រុមហ៊ុនផ្តល់ឱ្យវិញត្រឹមតែ៣០ភាគរយនៃប្រាក់សរុបរបស់ខ្លួន។ លោកថា ការទទួលយកសំណងទាំងបង្ខំនេះ ដោយសារពួកគាត់អស់ជំនឿលើការដោះស្រាយរបស់អាជ្ញាធរ និងមិនសង្ឃឹមឈ្នះក្រុមហ៊ុន ដោយសារថ្នាក់ដឹកនាំក្រុមហ៊ុននេះជាមន្ត្រីធំមានលុយមានអំណាច។
លោកបន្ថែមថា៖ «យើងទទួលយកនេះ ដោយសារយើងអស់សង្ឃឹមលើការដោះស្រាយផ្លូវច្បាប់។ យើងបានពាក្យបណ្តឹងទៅអាជ្ញាធរ គេក៏មិនសូវខ្វល់ពីយើង ហើយយើងធ្លាប់ដាក់បណ្តឹងទៅសម្តេច [ហ៊ុន សែន] ដែរ តែនៅតែគ្មានដំណោះស្រាយ។ ហើយយើងមើលទៅធ្វើអីមិនឈ្នះគេ ព្រោះគេសុទ្ធតែអ្នកធំៗ។ ហើយមួយទៀត ពេលកូនក្រុមយើងផុសរឿងហ្នឹងទៅតាមហ្វេសប៊ុក ត្រូវបានប៉ូលិសគេហៅយើងទៅគំរាម មិនឱ្យធ្វើសកម្មភាពអ្វីទាំងអស់»។
កាលពីដើមខែមិថុនា ឆ្នាំ២០២១ ជំនួយការផ្ទាល់លោកនាយករដ្ឋមន្រ្តី ហ៊ុន សែន គឺលោក ដួង តារា បានចូលខ្លួនជួយសម្របសម្រួលរកដំណោះស្រាយដល់ពលរដ្ឋដែលបានបាត់លុយវិនិយោគរបស់ពួកគេសរុបប្រមាណជាង២០លានដុល្លារ ដោយបញ្ហានេះត្រូវបានក្រុមហ៊ុនដាក់ការទទួលខុសត្រូវលើគណៈគ្រប់គ្រងជាជនបរទេស៣នាក់ដែលកំពុងរត់គេចខ្លួន។
លោក ដួង តារា ដែលជាជំនួយការនាយករដ្ឋមន្ត្រី ប្រាប់ វីអូឌី នៅថ្ងៃព្រហស្បតិ៍ម្សិលមិញថា កន្លងមក លោកធ្លាប់បានសម្របសម្រួលដោះស្រាយបញ្ហាជម្លោះនេះ ខណៈពលរដ្ឋជំរុញឱ្យមានការផ្តល់សំណងច្រើងជាង៣០ភាគរយ ប៉ុន្តែពេលនេះលោកមិនជាប់ពាក់ព័ន្ធទៀតឡើយ។
លោកបន្ថែមថា៖ «អ៊ីចឹងខ្ញុំអត់ដឹងពីរឿងការ Update ថាតើខាងក្រុមហ៊ុនមានការទូទាត់ទៅខាងប្រជាពលរដ្ឋ ឬអតិថិជនរបស់ខ្លួនឯងប៉ុន្មានទេ គឺខ្ញុំអត់បានក្ដាប់រឿងហ្នឹងច្បាស់ទេ»។
តាមការចុះផ្សាយលើគេហទំព័រក្រុមហ៊ុន GFX បានឱ្យដឹងថា ក្រុមហ៊ុនវិនិយោគរូបិយវត្ថុតាមប្រព័ន្ធ Forex មួយនេះ មានប្រធានក្រុមហ៊ុនឈ្មោះ កែ សួនសុភី ត្រូវជាកូនស្រីលោកឧបនាយករដ្ឋមន្រ្តី កែ គឹមយ៉ាន និងជាភរិយាលោក ស សុខា ដែលត្រូវជាកូនប្រុសលោកឧបនាយករដ្ឋមន្រ្តី ស ខេង រដ្ឋមន្ត្រីក្រសួងមហាផ្ទៃ និងមាននាយកគ្រប់គ្រងឈ្មោះ ស ចាន់ណែត ត្រូវជាក្មួយស្រីលោកឧបនាយករដ្ឋមន្រ្តី ស ខេង និងជាភរិយាលោក លី សុភ័ក្ត អនុប្រធាននាយកប្រតិបត្តិក្រុមហ៊ុន លីហួរគ្រុប។
កាលពីចុងខែមីនា ឆ្នាំ២០២១ គណនីរបស់អតិថិជនដែលបានដាក់លុយវិនិយោគលើការជួញដូរតាមប្រព័ន្ធ Forex របស់ក្រុមហ៊ុន GFX ទាំងអស់ ត្រូវបានបាត់ ដោយក្រុមហ៊ុនថា បញ្ហានេះបង្កឡើងដោយគណៈគ្រប់គ្រងរបស់ក្រុមហ៊ុនដែលជាជនបរទេសចំនួន៣នាក់ ហើយស្នើឱ្យអតិថិជនទាំងអស់ ចូលរួមដាក់ពាក្យបណ្ដឹងជាមួយក្រុមហ៊ុន ដើម្បីតាមស្វែងរកជនបង្កមកដោះស្រាយតាមនីតិវិធីច្បាប់។
កាលពីថ្ងៃទី១៦ ខែសីហា ឆ្នាំ២០២១ ពលរដ្ឋប្រមាណ១០០នាក់ តំណាងឱ្យពលរដ្ឋ ៧៧៥នាក់ ដែលមានបញ្ហាបាត់លុយវិនិយោគនៅក្រុមហ៊ុន GFX បាននាំគ្នាទៅដាក់ញត្តិនៅខុទ្ទកាល័យនាយករដ្ឋមន្ត្រី ដើម្បីស្នើដល់លោក ហ៊ុន សែន ជួយអន្តរាគមន៍ដោះស្រាយដោយផ្តល់សំណងដែលពួកគេបានបាត់បង់លុយសរុបជាង១០លានដុល្លារ ប៉ុន្តែពលរដ្ឋអះអាងថា រហូតដល់ពេលនេះពុំមានដំណោះស្រាយល្អឡើយ៕