គណបក្សនយោបាយធំៗពីរ គឺគណបក្សប្រជាជនកម្ពុជា និងគណបក្សភ្លើងទៀន ហែក្បួនឃោសនាបោះឆ្នោតជាទ្រង់ទ្រាយធំ នៅថ្ងៃចុងក្រោយនៃយុទ្ធនាការឃោសនាបោះឆ្នោត នាថ្ងៃសុក្រនេះ នៅក្នុងភូមិសាស្ត្ររាជធានីភ្នំពេញ។
ប្រធានគណបក្សប្រជាជនកម្ពុជានៅរាជធានីភ្នំពេញ លោក ឃួង ស្រេង មានប្រសាសន៍នៅថ្ងៃទី២ ខែមិថុនានេះថា នៅថ្ងៃចុងក្រោយនៃយុទ្ធនាការឃោសនាបោះឆ្នោតឃុំសង្កាត់ គណបក្សប្រជាជនកម្ពុជានឹងមានអ្នកចូលរួមហែក្បួនចន្លោះពី៥ម៉ឺនទៅ៦ម៉ឺននាក់។ លោកបន្តថា ក្បួនឃោសនារបស់គណបក្សកាន់អំណាច ជួបជុំគ្នានៅផ្លូវ៦០ម៉ែត្រ រួចហែឆ្លងកាត់សង្កាត់ចំនួន៥ នៃរាជធានីភ្នំពេញ។
ចំណែក គណបក្សភ្លើងទៀន ដែលគេចាត់ទុកថាជាគណបក្សប្រឆាំង ក៏នឹងធ្វើយុទ្ធនាការឃោសនាបោះឆ្នោតនៅថ្ងៃចុងក្រោយ ដោយមានអ្នកចូលរួមជាង៥ម៉ឺននាក់។
អនុប្រធានគណបក្សភ្លើងទៀន លោក សុន ឆ័យ បានឱ្យដឹងថា ក្បួនយុទ្ធនាការឃោសនារបស់គណបក្សនេះជួបជុំគ្នានៅវេលាម៉ោង៧ព្រឹក ដោយចាប់ផ្តើមចេញដំណើរពីចំណុចមួយនៅជិតមន្ទីរពេទ្យជោរៃភ្នំពេញ ផ្លូវជាតិលេខ១ ក្នុងខណ្ឌច្បារអំពៅ ដោយទៅឈប់សម្រាកនៅសួនច្បារត្រើយម្ខាង ក្បែរសណ្ឋាគារសុខា ហើយក្បួននឹងចាប់ផ្តើមហែមកវិញនៅពេលរសៀល។
លោកបន្តថា យុទ្ធនាការនេះមានការចូលរួមពីថ្នាក់ដឹកនាំសំខាន់ៗរបស់គណបក្ស និងរចនាសម្ព័ន្ធគ្រប់លំដាប់ថ្នាក់របស់គណបក្សភ្លើងទៀន នៅទូទាំងរាជធានីភ្នំពេញ។
ក្រៅពីគណបក្សធំៗទាំងពីរ គណបក្សខ្មែររួបរួមជាតិរបស់លោក ញឹក ប៊ុនឆៃ ក៏ហែក្បួនឃោសនាបោះឆ្នោតនៅថ្ងៃចុងក្រោយនៅរាជធានីភ្នំពេញផងដែរ។ ប៉ុន្តែក្បួនឃោសនារបស់គណបក្សខ្មែររួបរួមជាតិ នឹងមានអ្នកចូលរួមប្រមាណជាង១ ០០០នាក់ប៉ុណ្ណោះ។
ទោះជាយ៉ាងនេះក្តី ប្រធានគណបក្សខ្មែររួបរួមជាតិ លោក ញឹក ប៊ុនឆៃ មានក្តីរំពឹងខ្ពស់ថា គណបក្សរបស់លោកនឹងទទួលបានការគាំទ្រមួយទ្វេជាពីរ បើធៀបនឹងការបោះឆ្នោតឃុំសង្កាត់ឆ្នាំ២០១៧។
ចំណែកគណបក្សប្រជាធិបតេយ្យមូលដ្ឋាន (GDP) មិនហែក្បួនធំនៅរាជធានីភ្នំពេញឡើយ។ ក៏ប៉ុន្តែថ្នាក់ដឹកនាំសំខាន់ៗរបស់គណបក្សនេះបានទៅហែក្បួនឃោសនាទ្រង់ទ្រាយធំនៅក្នុងឃុំខ្នាឆ្មារ ស្រុកសាមគ្គីមានជ័យ ខេត្តកំពង់ឆ្នាំង។
អគ្គលេខាធិការគណបក្សប្រជាធិបតេយ្យមូលដ្ឋាន លោក សាម អ៊ីន បានថ្លែងថា ឃុំខ្នាឆ្មារ គឺជាឃុំមួយក្នុងចំណោម៥ឃុំនៅទូទាំងប្រទេស ដែលគណបក្សនេះសង្ឃឹមថាឈ្នះ។
ក្រៅពីគណបក្សខាងលើនេះ គណបក្សហ៊្វុនស៊ិនប៉ិចរបស់ព្រះអង្គម្ចាស់ នរោត្ដម ចក្រាវុធ ក៏មិនហែក្បួនឃោសនាទ្រង់ទ្រាយធំនៅថ្ងៃឃោសនាចុងក្រោយទេ។ តែព្រះប្រធានគណបក្ស នឹងបន្តយាងទៅជួបអ្នកគាំទ្ររបស់ព្រះអង្គនៅក្នុងខេត្តកំពង់ឆ្នាំង។
អ្នកនាំពាក្យគណបក្សហ៊្វុនស៊ិនប៉ិច លោក ញឿន រ៉ាដែន បានប្រាប់វីអូឌីថា នៅក្នុងរយៈពេល១៣ថ្ងៃនៃយុទ្ធនាការឃោសនាបោះឆ្នោតឃុំសង្កាត់នេះ ព្រះអង្គម្ចាស់ នរោត្តម ចក្រាវុធ បានយាងទៅកាន់ខេត្តក្រុងមួយចំនួន រួមមាន ខេត្តកំពង់ធំ សៀមរាប បន្ទាយមានជ័យ បាត់ដំបង ពោធិ៍សាត់ ព្រះសីហនុ កំពង់ចាម ព្រៃវែង កណ្តាល និងចុងក្រោយ គឺខេត្តកំពង់ឆ្នាំង។
ចំណែកគណបក្សកែទម្រង់កម្ពុជារបស់លោក អ៊ូ ច័ន្ទរ័ត្ន ក៏មិនហែក្បួនឃោសនាឡើយនៅថ្ងៃចុងក្រោយនៃយុទ្ធនាការឃោសនាបោះឆ្នោត ដោយសារតែការដាក់បេក្ខជនឈរឈ្មោះរបស់គណបក្សនេះនៅរប៉ាត់រប៉ាយនៅឡើយ។
យុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ បានចាប់ផ្តើមកាលពីថ្ងៃទី២១ ខែឧសភា ហើយនឹងបញ្ចប់នៅត្រឹមថ្ងៃសុក្រ ទី៣ ខែមិថុនា ខណៈការបោះឆ្នោតឃុំសង្កាត់ នឹងត្រូវធ្វើនៅថ្ងៃអាទិត្យ ទី៥ ខែមិថុនា៕
