ប្រធានាធិបតីអ៊ុយក្រែន លោក វ្ល៉ាឌីមៀ ហ្សេលេនស្គី (Volodymyr Zelenskiy) បានឱ្យដឹងនៅថ្ងៃព្រហស្បតិ៍ម្សិលមិញថា កងកម្លាំងរបស់លោកបានទទួលជោគជ័យមួយចំនួនក្នុងការប្រយុទ្ធជាមួយទ័ពរុស្ស៊ី ដើម្បីដណ្ដើមយកទីក្រុង Sievierodonetsk ទាំងមូលមកគ្រប់គ្រងវិញ ប៉ុន្តែស្ថានភាពយោធាទាំងមូលក្នុងតំបន់ដុនបាស (Donbas) បច្ចុប្បន្ន មិនមានការប្រែប្រួលឡើយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
យោងតាមមន្ត្រីអ៊ុយក្រែន កងកម្លាំងរុស្ស៊ីដែលប្រើប្រាស់កាំភ្លើងធុនធ្ងន់ទាំងឡាយ បច្ចុប្បន្នកំពុងតែគ្រប់គ្រងទីតាំងភាគច្រើននៃទីក្រុងឧស្សាហកម្ម Sievierodonetsk ប៉ុន្តែការប្រយុទ្ធគ្នានៅតែកំពុងបន្តធ្វើឡើង។
ទាក់ទិននឹងករណីនេះ លោក វ្ល៉ាឌីមៀ ហ្សេលេនស្គី លើកឡើងថា៖ «ស្ថានភាពទូទៅនៅដុនបាសមិនមានការផ្លាស់ប្ដួរគួរឱ្យកត់សម្គាល់ណាមួយក្នុងរយៈពេល២៤ម៉ោងចុងក្រោយនេះទេ។ ទោះជាយ៉ាងណា យើងបានទទួលជោគជ័យមួយចំនួនក្នុងការប្រយុទ្ធនៅក្នុងតំបន់ Sievierodonetsk»។
លោកបន្តថា៖ «រាល់ទឹកដីរបស់យើងដែលបច្ចុប្បន្នត្រូវបានកាន់កាប់ជាបណ្តោះអាសន្ន [ដោយទ័ពរុស្ស៊ី] រងនូវការបំផ្លាញទាំងស្រុង។ រុស្ស៊ីត្រូវតែទទួលខុសត្រូវលើករណីនេះ»។
ក្នុងសុន្ទរកថាមួយតាមរយៈប្រព័ន្ធវីដេអូ ប្រធានាធិបតីអ៊ុយក្រែនរូបនេះក៏បានថ្លែងអំណរគុណដល់ប្រធានាធិបតីអាមេរិក លោក ចូ បៃឌិន ដែលបានសម្រេចអនុម័តផ្ដល់ឱ្យអ៊ុយក្រែននូវមីស៊ីលទំនើបៗ ខណៈលោករំពឹងថានឹងទទួលបានដំណឹងល្អបន្ថែមទៀតអំពីការផ្គត់ផ្គង់សព្វាវុធពីដៃគូដទៃទៀត។
គួរបញ្ជាក់ថា ការបាញ់គ្រាប់ផ្លោងរបស់រុស្ស៊ី កាលពីពេលថ្មីៗនេះ បានបំផ្លាញហេដ្ឋារចនាសម្ព័ន្ធសំខាន់ៗទាំងអស់ក្នុងទីក្រុង Sievierodonetsk ខណៈលោក វ្ល៉ាឌីមៀ ហ្សេលេនស្គី បានអះអាងថា ការវាយដណ្តើមយកទីក្រុងក្នុងតំបន់ភាគខាងកើតអ៊ុយក្រែនមួយនេះ បច្ចុប្បន្នគឺជាគោលដៅដ៏សំខាន់មួយរបស់រុស្ស៊ី។
ជាមួយគ្នានេះ ប្រធានាធិបតីអ៊ុយក្រែនក៏បានចោទប្រកាន់កងកម្លាំងរុស្ស៊ីពីការប៉ុនប៉ងសម្លាប់ជនជាតិអ៊ុយក្រែន ធ្វើឱ្យខូចខាតកាន់តែច្រើនតាមដែលអាចធ្វើទៅបាន និងចាត់ទុកសកម្មភាពរបស់រុស្ស៊ីនេះថាជាការប្រព្រឹត្តអំពើប្រល័យពូជសាសន៍ផងដែរ៕
