លោកនាយករដ្ឋមន្រ្តី ហ៊ុន សែន និងភរិយា បានទៅបោះឆ្នោតជ្រើសរើសក្រុមប្រឹក្សាឃុំសង្កាត់ នៅវេលាម៉ោងប្រមាណ៧និង១៥នាទីព្រឹក ថ្ងៃទី៥ ខែមិថុនានេះ នៅការិយាល័យលេខ១៦៩៧ ដែលស្ថិតនៅក្នុងសាលាគរុកោសល្យភូមិភាគ ក្រុងតាខ្មៅ ខេត្តកណ្តាល។
គេសង្កេតឃើញថា បើទោះជាមានអ្នកសារព័ត៌មានជាច្រើនរូបបានទៅកាន់ទីនោះ ដើម្បីផ្ដិតយករូបភាព និងទិដ្ឋភាពអំពីការបោះឆ្នោតក្ដី លោកនាយករដ្ឋមន្រ្តី ហ៊ុន សែន នៅក្រោយពេលគូសសន្លឹកបោះឆ្នោតរួច លោកមិនបានធ្វើអត្ថាធិប្បាយអ្វីឡើយ។ លោកនិងភរិយាបានចាកចេញពីការិយាល័យបោះឆ្នោត រួចឡើងរថយន្តធ្វើដំណើរត្រលប់ទៅវិញ។
ការបោះឆ្នោតជ្រើសរើសក្រុមប្រឹក្សាឃុំ/សង្កាត់ អាណត្តិទី៥នេះ មានគណបក្សនយោបាយចំនួន១៧ បានចូលរួមប្រកួតប្រជែង ដោយបានដាក់បេក្ខជនក្រុមប្រឹក្សាឃុំ/សង្កាត់សរុប ៨៦ ០៩២នាក់ (ស្ត្រី ២៧ ៨១៣នាក់)។
ដោយឡែក ឃុំ/សង្កាត់ ក្នុងអាណត្តិទី៥នេះ មានចំនួន១ ៦៥២ ហើយចំនួនក្រុមប្រឹក្សាឃុំ/សង្កាត់ដែលនឹងត្រូវជ្រើសរើសមកបម្រើការងារក្នុងឃុំ/សង្កាត់ទាំងអស់នេះ មានចំនួន១១ ៦២២រូប។ យោងតាមគណៈកម្មាធិការជាតិរៀបចំការបោះឆ្នោត បានឱ្យដឹងថា ដំណើរការបោះឆ្នោតក្រុមប្រឹក្សាឃុំ/សង្កាត់ អាណត្តិទី៥នេះ មានការិយាល័យបោះឆ្នោតសរុបចំនួន២៣ ៦០២ការិយាល័យ។ ប្រជាពលរដ្ឋមានឈ្មោះក្នុងបញ្ជីបោះឆ្នោតសរុបចំនួន៩ ២០៥ ៦៨១នាក់ ស្មើនឹង៨៧,៩៤ភាគរយនៃប្រជាជនកម្ពុជាទាំងអស់ ក្នុងនោះមានស្រីចំនួន៤ ៩០៤ ៨៣២នាក់។
សម្រាប់ការបោះឆ្នោតនៅថ្ងៃនេះ គ.ជ.ប ត្រៀមប្រើទឹកថ្នាំជ្រលក់ជិត៥ម៉ឺនដប សន្លឹកឆ្នោតជិត១២លានសន្លឹក មានការក្រុមការងារ ឬមន្រ្តីបម្រើការបោះឆ្នោតជាង១៤ម៉ឺននាក់។ បើតាម គ.ជ.ប គណបក្សដែលមានបេក្ខជនឈរឈ្មោះនៅគ្រប់២៥ខេត្តក្រុង មានចំនួន៤គណបក្ស គឺគណបក្សប្រជាជនកម្ពុជា គណបក្សភ្លើងទៀន គណបក្សរាជានិយមហ្វ៊ុនស៊ិនប៉ិច និងគណបក្សខ្មែររួបរួមជាតិរបស់លោក ញឹក ប៊ុនឆៃ។
បើតាម គ.ជ.ប អ្នកសង្កេតការណ៍មកពីស្ថាប័នជាតិជាង៧០ស្ថាប័ន និងអ្នកសង្កេតការណ៍អន្តរជាតិមកពី៨ស្ថាប័នចូលរួមសង្កេតការបោះឆ្នោត។ ទោះជាយ៉ាងណា ចាប់តាំងពីការរំលាយគណបក្សសង្គ្រោះជាតិកាលពីឆ្នាំ២០១៧មក សហភាពអឺរ៉ុប សហរដ្ឋអាមេរិក និងអង្គការអន្តរជាតិមួយចំនួនបានប្រកាសផ្តាច់ជំនួយជាបន្តបន្ទាប់ដល់ស្ថាប័នរៀបចំការបោះឆ្នោត (គ.ជ.ប) និងអង្គការសង្គមស៊ីវិលដែលធ្វើការងារលើការបោះឆ្នោតនៅកម្ពុជា។
ប្រធានអង្គការសហប្រជាជាតិប្រចាំកម្ពុជា លោកស្រី ផូលីន តាម៉េស៊ីស (Pauline Tamesis) បានសរសេរសារលើបណ្ដាញសង្គម កាលពីថ្ងៃទី២៦ ខែឧសភា ឆ្នាំ២០២២ ថាអង្គការអន្តរជាតិមួយនេះមិនបានផ្ដល់ការគាំទ្រ ឬចូលរួមសង្កេតការណ៍បោះឆ្នោតជ្រើសរើសក្រុមប្រឹក្សាឃុំសង្កាត់នៅឆ្នាំ២០២២នេះទេ តែនឹងបន្តតាមដានដោយយកចិត្តទុកដាក់។
សហភាពអឺរ៉ុបប្រចាំនៅកម្ពុជា កាលពីថ្ងៃទី២០ ខែឧសភា ក៏បានប្រកាសស្រដៀងគ្នានេះដែរថា ខ្លួននឹងមិនដាក់អ្នកសង្កេតការណ៍បោះឆ្នោតឃុំសង្កាត់ អាណត្តិទី៥ ឆ្នាំ២០២២នេះទេ ក៏ប៉ុន្តែពួកគេនឹងបន្តតាមដានដោយយកចិត្តទុកដាក់ចំពោះដំណើរការបោះឆ្នោតឃុំសង្កាត់នៅកម្ពុជានេះ។
ក្រៅពីនេះ សភាសហភាពអឺរ៉ុបក៏បានអនុម័តលើញត្តិមួយថ្មីបន្ថែមទៀត ដោយអំពាវនាវឱ្យប្រទេសជាសមាជិកអឺរ៉ុបទាំង២៧ បន្តដាក់ទណ្ឌកម្មលើប្រទេសកម្ពុជា ដោយដកហូតប្រព័ន្ធអនុគ្រោះពន្ធ EBA ទាំងស្រុងពីកម្ពុជា ប្រសិនបើការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី៥ ខែមិថុនា ឆ្នាំ២០២២ និងការបោះឆ្នោតជ្រើសតាំងតំណាងរាស្រ្តនៅឆ្នាំ២០២៣ខាងមុខនេះ ត្រូវបានគេរកឃើញថា គ្មានភាពសេរី ត្រឹមត្រូវ និងយុត្តិធម៌។
ការប្រកាសលទ្ធផលបឋមអំពីការបោះឆ្នោតនឹងត្រូវធ្វើឡើងដោយគណៈកម្មាធិការជាតិរៀបចំការបោះឆ្នោត (គ.ជ.ប) ចាប់ពីម៉ោង៤រសៀល នៅថ្ងៃដដែលនេះ៕
