ជំនួយការផ្ទាល់របស់លោក កឹម សុខា បានអះអាងប្រាប់វីអូឌីថា លោក កឹម សុខា មិនចេញទៅបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃអាទិត្យនេះទេ ដោយសារមិនមានជម្រើសគណបក្សនយោបាយដែលលោកពេញចិត្ត។
ជំនួយការផ្ទាល់របស់លោក កឹម សុខា គឺលោក មុត ចន្ថា បានថ្លែងថា មូលហេតុដែលលោក កឹម សុខា មិនចេញទៅបោះឆ្នោត ដោយសារតែលោក កឹម សុខា មិនមានជម្រើសគណបក្សនយោបាយណាមួយដែលលោកពេញចិត្តនោះឡើយ ក្នុងចំណោមគណបក្សនយោបាយចំនួន១៧ដែលបានដាក់បេក្ខភាពឈរឈ្មោះបោះឆ្នោតឃុំសង្កាត់ អាណត្តិទី៥ ឆ្នាំ២០២២នេះ។
មិនមែនតែលោក កឹម សុខា ទេដែលមិនទៅបោះឆ្នោតនៅថ្ងៃនេះ សហការីរបស់លោកក៏មិនទៅបោះឆ្នោតដែរ ក្នុងនោះក៏មានលោក មុត ចន្ថា និងក្រុមគ្រួសាររបស់លោកផងដែរ។
លោកថា៖ «ឯកឧត្ដម កឹម សុខា លោកបានសម្រេចមិនអញ្ជើញទៅបោះឆ្នោតក្រុមប្រឹក្សាឃុំនៅថ្ងៃនេះ ពីព្រោះការបោះឆ្នោតនេះមិនមានជម្រើសសម្រាប់លោកដើម្បីជ្រើសរើស និយាយឱ្យខ្លី គឺលោកមិនមានជម្រើសសម្រាប់ជ្រើសរើស»។
លោកបន្ថែមថា៖ «ខ្ញុំមិនធ្វើការអះអាងចំពោះអ្នកដទៃ ឬសហការីរបស់ខ្ញុំទេ ប៉ុន្តែខ្លួនខ្ញុំផ្ទាល់និងគ្រួសារខ្ញុំ គឺមិនបានទៅធ្វើការបោះឆ្នោតទេ ដូចខ្ញុំបានបញ្ជាក់អ៊ីចឹង គឺខ្ញុំមិនមានជម្រើសដើម្បីទៅជ្រើសរើស ហ្នឹងគឺជាការសម្រេចចិត្ត ជាសិទ្ធិស្វ័យសម្រេចរបស់ខ្ញុំក្នុងនាមជាពលរដ្ឋ ថ្វីត្បិតតែខ្ញុំមានសិទ្ធិបោះឆ្នោត តែការបោះឆ្នោតគឺដោយស្ម័គ្រចិត្ត»។
បើតាមបញ្ជីឈ្មោះបោះឆ្នោតរបស់គណៈកម្មាធិការជាតិរៀបចំការបោះឆ្នោត (គ.ជ.ប) ឱ្យដឹងថា លោក កឹម សុខា ស្ថិតនៅលេខរៀងទី២ នៃបញ្ជីឈ្មោះបោះឆ្នោត នៅការិយាល័យលេខ០៩៩៦ ក្នុងមណ្ឌលបោះឆ្នោតវត្តចាក់អង្រែលើ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ មណ្ឌលបោះឆ្នោតនេះមាន២៦ការិយាល័យ មានប្រជាពលរដ្ឋមានឈ្មោះក្នុងបញ្ជីបោះឆ្នោតចំនួន១០ ៨២០នាក់។
ចំណែកលោក មាជ សុវណ្ណារ៉ា ដែលគេស្គាល់ថាជាអតីតមន្ត្រីស្និទ្ធនឹងលោក កឹម សុខា ដែរ បានប្រាប់ VOD នៅថ្ងៃអាទិត្យនេះថា ជាទស្សនៈផ្ទាល់ខ្លួន លោក កឹម សុខា នឹងមិនប្រថុយចេញទៅបោះឆ្នោតក្នុងស្ថានភាពបែបនេះទេ ដោយសម្អាងថា បើលោកចេញទៅបោះឆ្នោតនៅពេលនេះ ហាក់ដូចទទួលស្គាល់ភាពស្របច្បាប់នៃវិធានការរំលាយគណបក្សសង្គ្រោះជាតិអំឡុងចុងឆ្នាំ២០១៧ និងការចោទប្រកាន់ទៅលើរូបលោកពាក់ព័ន្ធនឹងបទ «គប់គិតជាមួយបរទេសចង់ផ្តួលរំលំរដ្ឋាភិបាល»។
លោកគូសបញ្ជាក់ថា មួយវិញទៀត ការជាប់ពន្ធនាគាររបស់លោក កឹម សុខា និងការព្យាយាមតតាំងក្តីនៅតុលាការបច្ចុប្បន្ន ជាការទាមទាររកយុត្តិធម៌ជុំវិញបញ្ហានយោបាយនេះ។
លោកថា៖ «បើលោក[កឹម សុខា]ទៅបោះឆ្នោត មានន័យថា លោកទទួលស្គាល់ថាគណបក្សសង្គ្រោះជាតិដែលត្រូវបានគេរំលាយ គឺគេរំលាយស្របច្បាប់ហើយ […] ហើយលោក កឹម សុខា ដែលត្រូវគេចាប់ដាក់មន្ទីរឃុំឃាំង អាចរដ្ឋាភិបាលថាគេធ្វើត្រូវហើយ»។
ប្រធានសមាគមការពារសិទ្ធិមនុស្សអាដហុក លោក នី សុខា បានចាត់ទុកការសម្រេចចិត្តរបស់លោក កឹម សុខា គឺជាសិទ្ធិស្វ័យសម្រេចរបស់លោកផ្ទាល់ក្នុងនាមជាពលរដ្ឋ។ លោកបន្តថា នៅក្នុងប្រទេសកម្ពុជាមិនមានការចាប់បង្ខំថាត្រូវទៅបោះឆ្នោតនោះទេ។
លោកថា៖ «ខ្ញុំថា នេះវាគឺជាការសម្រេចចិត្តមួយដែលជាការប្រើប្រាស់នូវសិទ្ធិ ពីព្រោះថានៅប្រទេសកម្ពុជាយើងមិនមានកាតព្វកិច្ចក្នុងការតម្រូវឱ្យត្រូវតែទៅបោះឆ្នោតទេ ដូច្នេះអ្នកដែលអាចទៅបោះឆ្នោតក៏បាន អ្នកមិនទៅបោះឆ្នោតក៏បាន អ៊ីចឹងអានេះគឺជាសិទ្ធិរបស់លោកទេ។ បើលោកមើលឃើញថា បើសិនជាលោកមិនមានគណបក្សណាមួយដែលជាជម្រើសដែលលោកអាចទៅបោះជូនបាន អាហ្នឹងគឺលោកមានសិទ្ធិមិនទៅបោះជូនបាន។ ប្រសិនបើលោកទៅបោះ ក៏មិនដឹងទៅបោះឱ្យនរណាដែរ ពីព្រោះគណបក្សរបស់លោកត្រូវបានរំលាយ ហើយមិនត្រូវបានដោះស្រាយឱ្យបានចប់សព្វគ្រប់ផង»។
លោក កឹម សុខា ត្រូវបានតុលាការដកសិទ្ធិធ្វើនយោបាយជាង៤ឆ្នាំមកហើយ ចាប់ពីថ្ងៃដែលលោកត្រូវបានសមត្ថកិច្ចឆ្មក់ចូលចាប់ខ្លួនទាំងយប់ នៅគេហដ្ឋានក្នុងរាជធានីភ្នំពេញ អំឡុងថ្ងៃទី៣ ខែកញ្ញា ឆ្នាំ២០១៧ ក្រោមបទចោទថា «គប់គិតជាមួយបរទេសចង់ផ្តួលរំលំរដ្ឋាភិបាល» ខណៈគណបក្សប្រឆាំងមួយនេះទទួលបានសំឡេងឆ្នោតគាំទ្រជាង៤៣ភាគរយ ប្រហាក់ប្រហែលគណបក្សប្រជាជនកម្ពុជាដែរនោះ។
បច្ចុប្បន្ន លោក កឹម សុខា ត្រូវបានតុលាការដាក់ឱ្យស្ថិតក្រោមការតាមដាន មិនឱ្យចេញទៅក្រៅប្រទេសនិងធ្វើសកម្មភាពនយោបាយ ដែលការណ៍នេះជំរុញឱ្យក្រុមប្រទេសលោកសេរី ដែលនាំមុខគេដោយសហរដ្ឋអាមេរិក និងសហភាពអឺរ៉ុប ចង់ឃើញកម្ពុជាវិលទៅរកការផ្សះផ្សាជាតិ ដើម្បីស្តារប្រជាធិបតេយ្យឡើងវិញ តាមរយៈការបើកផ្លូវឱ្យគណបក្សប្រឆាំងធំមួយនេះបានចូលរួមប្រកួតការបោះឆ្នោតឡើងវិញ៕
