ប្រជាសហគមន៍អះអាងថា កុដិលោកនៅអាស្រមព្រៃមេត្តាធម្មជាតិ ស្ថិតនៅឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ត្រូវបានទាហានដុតបំផ្លាញ ខណៈព្រៃសហគមន៍ «ឧត្ដមស្រែពស់ និងព្រៃមេត្តាធម្មជាតិ» កំពុងមានជម្លោះជាមួយក្រុមទាហានរថក្រោះកងទ័ពជើងគោក និងពលរដ្ឋមួយចំនួននៅតំបន់នោះ។
ព្រៃឈើក្នុងសហគមន៍ «ឧត្ដមស្រែពស់ និងព្រៃមេត្តាធម្មជាតិ» រងការកាប់បំផ្លាញ និងឈូសឆាយពីសំណាក់ក្រុមទាហាន «រថក្រោះកងទ័ពជើងគោក» និងពលរដ្ឋមួយចំនួនតាំងអំឡុងខែសីហា ឆ្នាំ២០២១ ក្រោយពួកគេទទួលបានដីសម្បទានសង្គមកិច្ចពីរដ្ឋាភិបាលជាង ២៦០ហិកតា នៅតំបន់នោះ។
ព្រះតេជព្រះគុណ ព្រំ សុជាតិ គង់នៅអាស្រមព្រៃមេត្តាធម្មជាតិមានថេរដីកាប្រាប់ វីអូឌី នៅថ្ងៃអង្គារនេះថា ព្រៃសហគមន៍ «ឧត្ដមស្រែពស់ និងព្រៃមេត្តាធម្មជាតិ» រងការកាប់ និងដឹកចេញស្ទើររាល់ថ្ងៃពីសំណាក់ទាហាន និងប្រជាពលរដ្ឋមួយចំនួននៅក្នុងឃុំត្រពាំងជោរ ហើយកាលពីម្សិលមិញនេះបានដុតកុដិលោកមួយខ្នងនៅក្នុងអាស្រមនេះផងដែរ។
ព្រះតេជព្រះគុណ ព្រំ សុជាតិ មានថេរដីកាបន្តថា ក្រៅពីចូលឈូសឆាយ និងកាប់ឈើនៅក្នុងសហគមន៍ គឺទាហានបានបាញ់គំរាមកំហែងមិនឱ្យពលរដ្ឋហ៊ានតវ៉ា ខណៈតំណាងពលរដ្ឋប្រមាញ ១០នាក់ កំពុងជាប់បណ្តឹងនៅតុលាការដោយសារតែការតវ៉ានេះ។
ព្រះអង្គមានថេរដីកាថា៖ «ដឹងសុវត្ថិភាពស្អីទេ រាប់ឆ្នាំមកហើយ គេបាញ់រំលងក្បាល គេបាញ់រំលងកេសារាប់មិនអស់។ អាត្មាឆ្អែតអស់ហើយ បើសុគតក៏សុគតទៅ ស្លាប់ក៏ស្លាប់ទៅ ដឹងធ្វើម៉េច បរិយាកាសអីចឹង បើស្រុកហ្នឹងវាអីចឹង។ ញោមខ្លះ ឱ្យអាត្មាចេញពីកន្លែងនេះឱ្យបាត់ទៅកុំឱ្យគេធ្វើបាបទៀត តែអាត្មាមិនទៅ»។
សមាជិកសហគមន៍ អ្នកស្រី ឃន ខន អះអាងថា អ្នកដែលដុតកុដិលោកនោះ គឺក្រុមទាហានដែលកំពុងមានជម្លោះជាមួយប្រជាសហគមន៍។ អ្នកស្រីបន្តថា ក្រុមទាហានមិនចង់ឱ្យមានអាស្រមលោកនៅក្នុងព្រៃកំពុងមានជម្លោះនោះទេ ដើម្បីងាយស្រួលពួកគេទន្ទ្រានយកធ្វើកម្មសិទ្ធិតែម្តង។
អ្នកស្រីបន្ថែមថា៖ «អ្នកដែលដុតកុដិលោកហ្នឹងគឺ ទាហានដែលកំពុងឈូសឆាយ និងកាប់បំផ្លាញដីព្រៃលោកហ្នឹង។ គេឈូសព្រៃហ្នឹងវាលហើយគេថា កុដិហ្នឹងនៅក្នុងដីគេ។ គេដុតចោលទៅ។ ការធ្វើនេះអត់ត្រឹមត្រូវទេ ដីព្រៃនេះប្រជាពលរដ្ឋ និងលោកបានការពារយូរហើយ។ ឥលូវនេះឮសំឡេងម៉ាស៊ីនអត់ គេអារ គេកាប់ ជិតដល់កុដិធំហើយ។ គេអារ[ឈើ]គាត់យកឈើធំ សល់ព្រៃតូចៗគេឈូសចោល»។
លោក អៀម ម៉ៅ ដែលពលរដ្ឋប្រាប់ថា ជាមន្ត្រីទាហានប្រចាំការនៅឃុំត្រពាំងជោរបានប្រាប់ វីអូឌី ថា កុដិលោក និងដីព្រៃឈើដែលក្រុមទាហានកំពុងឈូសឆាយ និងបំផ្លាញនោះ ជាដីដែលរដ្ឋាភិបាលបានផ្តល់ជូនពួកគាត់ដោយស្របច្បាប់ ហើយគ្រួសាររបស់លោកទទួលបាន ៥ហិកតា ផងដែរ។
មន្ត្រីទាហានរូបនេះ អះអាងថា ក្រុមទាហានដែលកំពុងធ្វើសកម្មភាពឈូសឆាយព្រៃសហគមន៍នោះ មិនមែនជាទាហាន «ង៧០» ដូចការលើឡើងរបស់ប្រជាពលរដ្ឋឡើយ ប៉ុន្តែពួកគាត់ជាក្រុមទាហានរថគ្រោះកងទ័ពជើងគោក។
លោកបន្ថែមថា៖ «សំខាន់ទីមួយ អូនសួរទៅអាជ្ញាធរភូមិឃុំរហូតដល់ខេត្តថា តើការឈូសឆាយនៅគេមានច្បាប់គ្រប់គ្រាន់ ឬមួយយ៉ាងណា? បើសិនអត់មានច្បាប់គ្រប់គ្រាន់ ហ៊ានដាក់គ្រឿងចក្រទៅឈូសឆាយ បើមិនជាប់ច្រវ៉ាក់តែឥលូវនេះ អត់ដល់ ២៤ម៉ោងទេ»។
កាលពីថ្ងៃទី២០ ខែសីហា ឆ្នាំ២០២១ រដ្ឋាភិបាលបានចេញអនុក្រឹត្យមួយកាត់ដីទំហំជាង ២៦០ហិកតា (២៦២.២៤ហិកតា) ពីដែនជម្រកសត្វព្រៃភ្នំឱរ៉ាល់ ស្ថិតភូមិសាស្ត្រភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ ដើម្បីបែងចែកទៅឱ្យគ្រួសារកងទ័ពនៃបញ្ជាការដ្ឋានរថក្រោះកងទ័ពជើងគោក និងពលរដ្ឋចំនួន ៤១គ្រួសារ សម្រាប់ធ្វើលំនៅឋាន និងបង្កបង្កើនផល។
ក្រោយទទួលបានដីសម្បទានសង្គមកិច្ចនេះ ក្រុមទាហានបានដាក់គ្រឿងចក្រឈូសឆាយ និងប្រើកម្លាំងកម្មករឱ្យចូលទៅកាប់រុករានព្រៃឈើនៅតំបន់នោះ ប៉ុន្តែត្រូវបានអ្នកភូមិរាប់រយនាក់នៅឃុំត្រពាំងជោរ តវ៉ាប្រឆាំង ដោយពួកគេអះអាងថា ព្រៃឈើតំបន់នោះជាព្រៃសហគមន៍ឧត្ដមស្រែពស់ និងព្រៃមេត្តាធម្មជាតិ ដែលពួកគេបានការពារជាង ២០ឆ្នាំមកហើយ។
កាលពីអំឡុងខែឧសភា ឆ្នាំ២០២២នេះ ប្រជាសហគមន៍រកកិច្ចអន្តរាគមន៍ពីកូនប្រុសពៅលោកនាយករដ្ឋមន្ត្រី ហ៊ុន សែន គឺ លោក ហ៊ុន ម៉ានី តំណាងរាស្ត្រមណ្ឌលខេត្តកំពង់ស្ពឺ ឱ្យជួយទប់ស្កាត់សកម្មភាពកាប់បំផ្លាញព្រៃឈើក្នុងសហគមន៍ «ឧត្ដមស្រែពស់ និងព្រៃមេត្តាធម្មជាតិ» ពីសំណាក់ក្រុមទាហានកងទ័ពជើងគោក និងពលរដ្ឋមួយចំនួនស្ថិតនៅឃុំត្រពាំងជោរ ស្រុកឱរ៉ាល់ ក្រោយគ្មានដំណោះស្រាយពីអាជ្ញាធរពាក់ព័ន្ធ។
ក្នុងញត្តិដែលបានលើកឡើងថា កាលពីឆ្នាំ២០០៣ ផ្ទៃដីព្រៃសហគមន៍ឧត្ដមស្រែពស់ មានទំហំ ២ ៤៣៣ហិកតា ដោយមានពលរដ្ឋអាស្រ័យផលចំនួន ២៥៣គ្រួសារ ហើយនៅចន្លោះឆ្នាំ២០០៨ និងឆ្នាំ២០១៧ អាជ្ញាធរបានកាត់ឆ្វៀលដីព្រៃសហគមន៍នេះទៅឱ្យក្រុមហ៊ុនឯកជន និងក្រុមគ្រួសារទាហាន«ង៧០» អស់ជាច្រើនហិកតា។
ប្រភពដដែលបន្តថា បច្ចុប្បន្ននេះ ដីព្រៃសហគមន៍នេះនៅសល់ប្រហែល ៩០០ហិកតាប៉ុណ្ណោះ និងកំពុងទទួលរងការកាប់ទន្ទ្រាន និងដុតបំផ្លាញយ៉ាងធ្ងន់ធ្ងរបំផុត ខណៈព្រៃសហគមន៍ទាំង២នេះជាប្រភេទតំបន់ព្រៃស្រោង ជាជម្រកសត្វព្រៃជាច្រើនប្រភេទកំពុងរស់នៅ ជាពិសេសប្រភេទសត្វព្រៃជិតផុតពូជដែលប្រជាពលរដ្ឋ និងព្រះសង្ឃបានការពារជាង២០ឆ្នាំទៅហើយ៕