ប្រធានាធិបតីអ៊ុយក្រែនលោក វ្ល៉ាឌីមៀ ហ្សេលេនស្គី (Volodymyr Zelenskiy) បានអះអាងឱ្យដឹងថា កងទ័ពរបស់លោក គឺមិនបោះបង់ជំហរយោធាក្នុងការវាយដណ្ដើមទីក្រុង Sievierodonetsk យកមកគ្រប់គ្រងវិញឡើយ ខណៈតំបន់នេះបច្ចុប្បន្នកំពុងតែមានការប្រយុទ្ធគ្នាខ្លាំង។ នេះបើតាមការចុះផ្សាយដោយ ទីភ្នាក់ងារសារព័ត៌មាន Reuters។
ថ្លែងក្នុងសុន្ទរកថាមួយតាមរយៈប្រព័ន្ធវីដេអូ កាលពីថ្ងៃចន្ទម្សិលមិញ ប្រធានាធិបតីរូបនេះ បានឱ្យដឹងថា៖ «វីរបុរសរបស់យើងនានា គឺនឹងមិនបោះបង់ជំហរយោធាក្នុងទីក្រុង Sievierodonetsk ចោលឡើយ ខណៈការប្រយុទ្ធគ្នាក្នុងទ្រង់ទ្រាយធំនៅតែបន្តធ្វើឡើង»។
លោក វ្ល៉ាឌីមៀ ហ្សេលេនស្គី កាលពីសប្ដាហ៍មុន ក៏ធ្លាប់បានលើកឡើងពីជោគជ័យមួយចំនួនរបស់កងកម្លាំងរបស់លោក ក្នុងការប្រយុទ្ធជាមួយទ័ពរុស្ស៊ីដើម្បីដណ្ដើមយកទីក្រុង Sievierodonetsk ទាំងមូលមកគ្រប់គ្រងវិញផងដែរ។
ទោះជាយ៉ាងណា កងកម្លាំងរុស្ស៊ីដែលប្រើប្រាស់កាំភ្លើងធុនធ្ងន់ទាំងឡាយ បានគ្រប់គ្រងទីតាំងភាគច្រើននៃទីក្រុងឧស្សាហកម្ម Sievierodonetsk ខណៈការប្រយុទ្ធគ្នានៅតែកំពុងបន្តធ្វើឡើង។ នេះបើតាមការឱ្យដឹងពីមន្រ្តីអ៊ុយក្រែន។
ការបាញ់គ្រាប់ផ្លោងរបស់ រុស្ស៊ី កាលពីពេលថ្មីៗនេះ បានបំផ្លាញហេដ្ឋារចនាសម្ព័ន្ធសំខាន់ៗទាំងអស់ក្នុងទីក្រុង Sievierodonetsk ខណៈលោក វ្ល៉ាឌីមៀ ហ្សេលេនស្គី បានអះអាងថា ការវាយដណ្តើមយកទីក្រុងក្នុងតំបន់ភាគខាងកើតអ៊ុយក្រែនមួយនេះបច្ចុប្បន្នគឺជាគោលដៅដ៏សំខាន់មួយរបស់រុស្ស៊ី។
ទាក់ទិននឹងករណីនេះ ប្រធានាធិបតីអ៊ុយក្រែន បានចោទប្រកាន់កងកម្លាំងរុស្ស៊ីពីការប៉ុនប៉ងសម្លាប់ជនជាតិអ៊ុយក្រែន ធ្វើឱ្យខូចខាតកាន់តែច្រើនតាមដែលអាចធ្វើទៅបាន និងចាត់ទុកសកម្មភាពរបស់រុស្ស៊ីនេះថា ជា«ការប្រព្រឹត្តអំពើប្រល័យពូជសាសន៍»ផងដែរ៕
