កម្ពុជា​គ្រោង​ទិញ​អាវុធ​ធុនធ្ងន់​ទំនើបៗ​ដើម្បី​ពង្រឹង​សមត្ថភាព​យោធា

រដ្ឋមន្ត្រីក្រសួងការពារជាតិ លោក ទៀ បាញ់ ក្នុងពិធីបើកការដ្ឋានសាងសង់រោងជាងជួសជុលនាវា ផែសំចត និងស្ដារឃ្លង នៅមូលដ្ឋានសមុទ្ររាម ខេត្តព្រះសីហនុ នាព្រឹកថ្ងៃទី៨ ខែមិថុនា ឆ្នាំ២០២២។ (ហ្វេសប៊ុកលោក ទៀ បាញ់)

ឧបនាយករដ្ឋមន្ត្រី និងជារដ្ឋមន្ត្រីក្រសួងកាពារជាតិ បានបញ្ជាក់ថា កម្ពុជាគ្រោងទិញអាវុធធុនធ្ងន់ទំនើបៗ ដើម្បីការពារពីការគំរាមកំហែងពីប្រទេសនានា​ និង​ពង្រឹងសមត្ថភាពយោធារបស់ខ្លួនបន្ថែមទៀត ប៉ុន្តែលោកថាមិនមានចេតនាប្រឆាំង ឬគំរាមកំហែងដល់ប្រទេសណាមួយឡើយ។

ក្នុងពិធីការបើកការដ្ឋានសាងសង់សំណងមួយចំនួននៅមូលដ្ឋានសមុទ្ររាម ខេត្តព្រះសីហនុ កាលពីព្រឹកថ្ងៃទី៨ ខែមិថុនា ឆ្នាំ២០២២ រដ្ឋមន្រ្តីក្រសួងការពារជាតិ លោក ទៀ បាញ់ បានបញ្ជាក់ថា កម្ពុជាមានការអភិវឌ្ឍសមត្ថភាពកងយោធពលខេមរភូមិន្ទ មិនមែនត្រឹមតែការធ្វើទំនើបកម្មលើកម្រិតក្នុងមូលដ្ឋានសមុទ្ររាមប៉ុណ្ណោះទេ។ ប៉ុន្តែលោកថា កម្ពុជានឹងបន្តធ្វើឱ្យកងយោធពលខេមរភូមិន្ទមានសមត្ថភាពខ្ពស់ អាចធានាដល់ការការពារអធិបតេយ្យ បូរណភាពទឹកដីរបស់ខ្លួន។ ​លើសពីនេះ លោកថា កម្ពុជាថែមទាំងអាចបំពេញករណីយកិច្ចដទៃប្រកបដោយជោគជ័យ ដូចជា ការប្រយុទ្ធប្រឆាំងអំពើភេរវកម្ម និងឧក្រិដ្ឋកម្មឆ្លងដែន ការសង្គ្រោះពីគ្រោះមហន្តរាយ និងប្រតិបត្តិការរក្សាសន្តិភាព ជាដើម។

លោកបានថ្លែងថា៖ «កម្ពុជាបានទទួលជំនួយឥតសំណងពីប្រទេសជាមិត្ត ដូចជា សម្ភារសឹកធុនធ្ងន់និងទំនើប ហើយបច្ចុប្បន្ននេះកំពុងធ្វើការហ្វឹកហ្វឺនជំនាញ បញ្ហាបច្ចេកទេស និងប្រើប្រាស់។ នៅពេលអនាគត កម្ពុជានឹងបន្តទទួលជំនួយឥតសំណងពីប្រទេសជាមិត្ត នឹងទិញសម្ភារសឹកធុនធ្ងន់និងទំនើបៗនៃប្រទេសនានា សម្រាប់ពង្រឹងសមត្ថភាពយោធារបស់ខ្លួន ស្របតាមមាត្រា៥៣ ស្របតាមនៃរដ្ឋធម្មនុញ្ញនៃព្រះរាជាណាចក្រកម្ពុជា»។

រដ្ឋមន្ត្រីក្រសួងការពារជាតិដដែលបន្តថា ​កម្ពុជាគ្មានចេតនាបង្កការគំរាមកំហែងដល់ប្រទេសណាមួយឡើយ ហើយកម្ពុជាក៏មិនដែលជំទាស់រាល់ការចូលរួមអភិវឌ្ឍសមត្ថភាពកងទ័ពរបស់ប្រទេសដទៃដែរ។ លោកបញ្ជាក់ថា កម្ពុជាគ្រាន់តែចង់លើកកម្រិតសមត្ថភាពការពារខ្លួនកាន់តែប្រសើរឡើងថែមទៀត ដើម្បីធានាទប់ទល់នឹងសម្ពាធនិងឥទ្ធិពលនៃការប្រកួតប្រជែងភូមិសាស្ត្រនយោបាយដែលកំពុងកើតមានក្នុងពេលបច្ចុប្បន្ន ដោយធានាដំណើរការទៅមុខនៃសន្តិភាព សន្តិសុខ និងមានលទ្ធភាពចូលរួមកសាងសន្តិភាពក្នុងតំបន់និងសកលលោក។

លោក ទៀ បាញ់ បន្ថែមថា ជាមួយគ្នានេះដែរ កម្ពុជាគ្មានគោលនយោបាយជ្រើសរើសប្រទេសមួយដើម្បីប្រឆាំងនឹងប្រទេសមួយណាឡើយ។ សម្រាប់ការអភិវឌ្ឍសមត្ថភាពកងយោធពលខេមរភូមិន្ទ លោកថា​ កម្ពុជានៅតែបើកចំហចំពោះការជួយឧបត្ថម្ភគាំទ្រពីសំណាក់បណ្តាប្រទេសជាមិត្តនានា ដោយគោរពផលប្រយោជន៍គ្នាទៅវិញទៅមក និងមិនប្រកាន់និន្នាការឬការរើសអើង​ឡើយ៕  ​

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ