លោកឧបនាយករដ្ឋមន្ត្រី ស ខេង បានសម្រេចបែងចែកស្រាបៀរកម្ពុជា (Cambodia Beer) សរុបចំនួន១២ ០០០កេស ជូនដល់សមាជិកគណបក្សប្រជាជនកម្ពុជាក្នុងខេត្តព្រៃវែង ដែលធ្វើឡើងបន្ទាប់ពីលទ្ធផលបោះឆ្នោតឃុំ-សង្កាត់នៅខេត្តនេះ គណបក្សកាន់អំណាចទទួលបានជោគជ័យ។
យោងតាមលិខិតមួយដែលអ្នកសារព័ត៌មានទទួលបាន បានឱ្យដឹងថា លោក ស ខេង ជាអនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តព្រៃវែងផងដែរនោះ បានប្រកាសផ្តល់ស្រាបៀរចំនួន១ម៉ឺនកេស ជូនដល់គណៈកម្មាធិការគណបក្ស ក្រុង ស្រុក ឃុំ សង្កាត់ និងភូមិនានាទូទាំងខេត្តព្រៃវែង។
ទាក់ទិនករណីនេះ លោក ស្បោង សារ៉ាត់ ប្រធានគណបក្សប្រជាជនកម្ពុជាខេត្តព្រៃវែង បានថ្លែងឱ្យដឹងថា ក្រុមការងារបានទទួលស្រាបៀរកម្ពុជាចំនួន១២ ០០០កេស ដែលជាអំណោយរបស់លោក ស ខេង រួចរាល់ហើយ។
ប្រភពដដែលបន្តថា ស្រាបៀរបានដឹកមកដល់នៅព្រឹកថ្ងៃពុធម្សិលមិញ។
លោកថា៖ «យើងបានបែងចែកដាក់ [ស្រាបៀរ] នៅពីរទីតាំងខុសគ្នា ខណៈទីតាំងមួយសម្រាប់ស្រុកចំនួនប្រាំមួយមកដឹកយកទៅប្រើប្រាស់ និងទីតាំងមួយទៀតគឺសម្រាប់ស្រុកដែលនៅសល់ចំនួនប្រាំពីរផ្សេងទៀតមកយក។ ផ្លូវមានទំហំតូច ហើយឡាន [ដឹកជញ្ជូនស្រាបៀរ] របស់យើងធំ។ ដូច្នេះហើយវាមានការពិបាកក្នុងការដឹកជញ្ជូន»។
លោក ស្បោង សារ៉ាត់ បានបញ្ជាក់ឱ្យដឹងទៀតថា អាជ្ញាធរនឹងបែងចែកស្រាបៀរដល់សមាជិកគណបក្សនៅទូទាំងស្រុកនិងឃុំទាំងអស់។
លោកបន្ថែមថា៖ «ពួកគេកំពុងតែរង់ចាំទទួលអំណោយនេះ ដែលផ្ដល់ដោយថ្នាក់ដឹកនាំដល់សមាជិកគណបក្សដែលបានខិតខំប្រឹងប្រែងបំពេញការងារ។ បើទោះបីជាវាចំនួនតិចតួចក្ដី ប៉ុន្តែពួកគេសប្បាយចិត្តនឹងទទួលយក ហើយពួកគេអាចប្រើប្រាស់សម្រាប់ការជួបជុំគ្នានៅតាមមូលដ្ឋានរបស់ពួកគេរៀងៗខ្លួន»។
ជាមួយគ្នានេះ លោកបានឱ្យដឹងទៀតថា លោក ស ខេង ក៏បានបែងចែកអំណោយជាស្រាបៀរដូចគ្នានេះចំនួន១២ ០០០កេសទៀតដល់ក្រុមការងារគណបក្សប្រជាជនខេត្តបាត់ដំបងផងដែរ។
ទោះជាយ៉ាងណា អភិបាលខេត្តបាត់ដំបង លោក សុខ លូ បានបដិសេធមិនធ្វើអត្ថាធិប្បាយទាក់ទិននឹងករណីនេះ ដោយលោកថ្លែងយ៉ាងខ្លីថា៖ «ព័ត៌មានហ្នឹងមិនអាចផ្ដល់ឱ្យវីអូឌីបានទេ»។
គួរបញ្ជាក់ថា យោងតាមលទ្ធផលបណ្ដោះអាសន្ននៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ សម្រាប់ខេត្តព្រៃវែង គណបក្សប្រជាជនកម្ពុជានាំមុខដាច់លើគណបក្សផ្សេងទាំងអស់ ដោយសំឡេងចំនួន ៧១% ខណៈនៅទូទាំងខេត្តបាត់ដំបង ក៏នាំមុខក្នុងចំនួន ៧៦% ផងដែរ៕
