អង្គការអន្តរជាតិដែលធ្វើការលើកកម្ពស់សិទ្ធិកុមារ ជំរុញឱ្យរដ្ឋាភិបាលពង្រឹងការអនុវត្តច្បាប់និងផែនការបន្ថែមទៀត ដើម្បីទប់ស្កាត់អំពើហិង្សាលើកុមារ ស្របពេលផែនការដាក់ចេញនិងការអនុវត្តជាក់ស្ដែងនៅមានកម្រិតនៅឡើយ។
ការជំរុញនេះធ្វើឡើងនៅក្នុងសិក្ខាសាលាស្ដីពី «បទពិសោធន៍នៃការអនុវត្តកម្មវិធីកិច្ចការពារកុមារ និងបញ្ហាប្រឈមថ្មីដែលត្រូវយកចិត្តទុកដាក់» ដែលរៀបចំដោយអង្គការ World Vision International, Save the Children, CRC Cambodia និង Friends International នៅថ្ងៃនេះ។
ប្រធានកម្មវិធីកិច្ចការពារកុមារនៃអង្គការទស្សនៈពិភពលោក លោក ឆាយ វាសនា លើកឡើងថា ចាប់ពីឆ្នាំ២០១៨ ដល់ឆ្នាំ២០២១ អំពើហិង្សាលើកុមារ ដែលអង្គការនេះបានធ្វើការផ្សាយនិងអប់រំដល់ឪពុកម្ដាយនិងភាគីពាក់ព័ន្ធផ្សេងទៀត បានធ្វើឱ្យអំពើហិង្សាលើកុមារថយចុះពី៤៩ភាគរយ មកចំនួន៣៨ភាគរយវិញ។ លោកបន្តថា គម្រោងនេះ អង្គការទស្សនៈពិភពលោក បានធ្វើនៅខេត្តចំនួន១០នៃប្រទេសកម្ពុជា។
លោកបន្តថា ទោះបីអំពើហិង្សាលើកុមារបានថយចុះក៏ពិតមែន ប៉ុន្តែបញ្ហានេះនៅតែកើតមានឡើង ដែលករណីនេះ ទាមទារឱ្យមានការចូលរួមពីភាគីពាក់ព័ន្ធ ជាពិសេសរដ្ឋាភិបាលកម្ពុជាតែម្ដង។
លោកថា៖ «ដំណាក់កាលដំបូង ពី៤៩ភាគរយ ធ្លាក់មក៣៨ភាគរយ។ អ៊ីចឹងយើងឃើញមានការរីកចម្រើនកន្លែងនេះ ប៉ុន្តែយើងទទួលស្គាល់ថា អត្រាហ្នឹងនៅខ្ពស់នៅឡើយ។ មួយទៀត បើយើងសម្ភាសទៅដល់ឪពុកម្ដាយផ្ទាល់ យើងឃើញថា មានការធ្លាក់ចុះពី៨៤ភាគរយ មកដល់៦៦ភាគរយ ហើយចំនួន៦៦ភាគរយ វាគឺជាទិន្នន័យមួយនៅខ្ពស់ច្រើនជាង៥០ភាគរយ។ អ៊ីចឹងឪពុកម្ដាយ គាត់បានឆ្លើយថា គាត់បានប្រើប្រាស់អំពើហិង្សាផ្លូវកាយ ផ្លូវចិត្ត ទៅលើកូនហ្នឹង គឺមានកម្រិតមួយដែលយើងគួរតែយកចិត្តទុកដាក់ និងជាចំណុចមួយដែលយើងត្រូវចូលរួមទាំងអស់គ្នាឆ្លើយតប ព្រោះវាមានផលប៉ះពាល់ធ្ងន់ធ្ងរសម្រាប់សេដ្ឋកិច្ច ក៏ដូចជាសុខុមាលភាពរបស់កុមារ»។
លោក ឆាយ វាសនា បន្តថា ត្បិតរដ្ឋាភិបាលកម្ពុជាបានប្ដេជ្ញាចិត្ត ដោយបានដាក់ផែនការនិងវិធានការច្បាប់ ដើម្បីទប់ស្កាត់អំពើហិង្សាលើកុមារក្ដី ប៉ុន្តែការអនុវត្តជាក់ស្ដែងនៅមិនទាន់មានប្រសិទ្ធភាពឡើយ។ លោកបន្តថា ការអនុវត្តផែនការនិងវិធានការច្បាប់នៅមានកម្រិត ដោយសារខ្វះធនធាន ជំនាញ សមត្ថភាព និងថវិកា ជាដើម។
លោកថា៖ «បើយើងនិយាយពីកិច្ចការកុមារ មិនមែនយើងឆ្លើយតែរឿងអន្តរាគមន៍តែរឿងអំពើហិង្សាតែមួយទេ យើងត្រូវតែមានវិធីបង្ការ កម្មវិធីអប់រំ បណ្ដុះបណ្ដាលទៅដល់ឪពុកម្ដាយ អាណាព្យាបាល អ្នកពាក់ព័ន្ធ ក៏ដូចជាកុមារខ្លួនឯងផ្ទាល់ ដើម្បីឱ្យគាត់មានសមត្ថភាពការពារខ្លួនដែរ។ អ៊ីចឹងយន្តការនៃការបង្ការនិងគោលដៅក៏នៅមានកម្រិតដែរ ដូចលើកឡើងអ៊ីចឹង ដោយសារថវិកា រឿងសមត្ថភាពរបស់គាត់ ហើយជំនាញក្នុងការធ្វើរឿងទាំងអស់ហ្នឹង។ ចំណុចទី២ នៅពេលដែលយើងនិយាយអំពីអន្តរាគមន៍យន្តការនៃការរាយការណ៍ នៅពេលដែលមានករណីការរំលោភបំពានឬអំពើហិង្សាកើតឡើងហ្នឹង តើគាត់យល់ដឹងពីវិធីសាស្ត្រឆ្លើយតបយ៉ាងម៉េច»។
រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងការជួញដូរមនុស្ស លោកស្រី ជូ ប៊ុនអេង មានប្រសាសន៍ថា ក្រសួងបានដាក់ចេញផែនការសម្រាប់អនុវត្តហើយ ប៉ុន្តែទាមទារឱ្យមានការចូលរួមពីគ្រប់ភាគីពាក់ព័ន្ធ ទើបអាចលុបបំបាត់អំពើហិង្សាលើស្ត្រី និងកុមារបាន។ ចំពោះមន្រ្តីដែលចុះអនុវត្តវិញ លោកស្រីថា ក្រសួងកំពុងធ្វើការពង្រឹងនិងបណ្ដុះបណ្ដាលបន្ថែមទៀតដែរ។
លោកស្រីថា៖ «ចំពោះរដ្ឋាភិបាល ដូចបានលើកឡើងអ៊ីចឹង យើងមានច្បាប់ យើងមានគោលនយោបាយ យើងមានផែនការ ដែលយើងត្រូវជំរុញនិងអនុវត្ត រួមទាំងពង្រឹងសមត្ថភាពអ្នកអនុវត្តឱ្យបានល្អប្រសើរ។ យើងកំពុងស្រាវជ្រាវដែរ តើអំពើហិង្សាមានកត្ដារួមផ្សំអីខ្លះ? ព្រោះវាប៉ះពាល់ផ្លូវចិត្ត។ អ៊ីចឹងវានៅ[លើ]ការអប់រំផ្លូវចិត្ត ផ្នែកចិត្តសាស្ត្រ ដែលរាល់ថ្ងៃយើងកំពុងលើកកម្ពស់អប់រំផ្សព្វផ្សាយរឿងហ្នឹងដែរ។ យើងកំពុងបង្កើនគ្រូបង្គោលកន្លែងការងារ ជាពិសេសសក្នុងចំណោមមន្ត្រីជួរមុខនៅតាមមូលដ្ឋាន»។
បើតាមអង្គការទស្សនៈពិភពលោក (World Vision) លើកឡើងថា អំពើហិង្សាលើស្រ្តីភេទនិងកុមារ ជាទម្រង់នៃការរំលោភបំពានលើផ្លូវកាយនិងផ្លូវចិត្ត ដែលធ្វើឱ្យប៉ះពាល់ដល់សិទ្ធិ សុខភាពផ្លូវកាយ របួសរាងកាយ វិបត្តិផ្លូវចិត្ត និងប្រាជ្ញាផងដែរ៕
