មន្ត្រីជាន់ខ្ពស់នៃក្រសួងការបរទេសអូស្រ្តាលី បានឱ្យដឹងថា អូស្ត្រាលីប្តេជ្ញាបន្តធ្វើការរួមគ្នាទៅមុខទៀតជាមួយកម្ពុជា ដើម្បីដោះស្រាយបញ្ហាប្រឈមនានាក្នុងតំបន់និងសកលលោក ហើយគាំទ្រដល់កម្ពុជា ដែលជាប្រធានអាស៊ានក្នុងឆ្នាំនេះថែមទៀតផង។
ក្នុងសេចក្តីប្រកាសព័ត៌មានរបស់ស្ថានទូតអូស្ត្រាលីប្រចាំនៅកម្ពុជាបានឱ្យដឹងកាលពីថ្ងៃទី១១ ខែមិថុនានេះថា លោកស្រី Kathryn Campbell រដ្ឋលេខាធិការក្រសួងការបរទេស និងពាណិជ្ជកម្ម របស់ប្រទេសអូស្ដ្រាលី នឹងអញ្ជើញទស្សនកិច្ចប្រទេសកម្ពុជា ចាប់ពីថ្ងៃទី១២ ដល់១៤ ខែមិថុនា ឆ្នាំ២០២២ ខណៈកម្ពុជា និងអូស្ត្រាលីកំពុងប្រារព្ធខួបលើកទី៧០ឆ្នាំ នៃចំណងការទូត ក្នុងពេលដែលកម្ពុជា ជាប្រធានអាស៊ាន។
សេចក្តីប្រកាសព័ត៌មានដដែលបញ្ជាក់ថា ក្នុងដំណើរទស្សនកិច្ចនេះ លោកស្រីរដ្ឋលេខាធិការ Campbell នឹងជួបជាមួយលោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា រួមទាំងមន្ត្រីជាន់ខ្ពស់មួយចំនួនទៀត។
បន្ថែមពីនេះ លោកស្រី Compbell នឹងជួបជាមួយ រដ្ឋមន្ត្រីប្រតិភូអមនាយករដ្ឋមន្ត្រី លោក កៅ គឹមហួន និងទេសរដ្ឋមន្ត្រី និងជាអនុប្រធានទី១ របស់អាជ្ញាធរមីន លោក លី ធុជ ផងដែរ។
លោកស្រី Campbell បានមានប្រសាសន៍ថា៖«អូស្ត្រាលីនិងកម្ពុជាមាន ទំនាក់ទំនងដ៏រឹងមាំ និងយូរអង្វែង រយៈពេល៧០ឆ្នាំ មកហើយ។ យើងទន្ទឹងរង់ចាំបន្តធ្វើការរួមគ្នា ទៅមុខទៀត ដើម្បីដោះស្រាយបញ្ហាប្រឈមនានា ក្នុងតំបន់និងសកលលោក និងគាំទ្រដល់កម្ពុជា ដែលជាប្រធានអាស៊ានក្នុងឆ្នាំនេះ។ ចក្ខុវិស័យរបស់អាស៊ាន ក្នុងការគាំទ្រឥណ្ឌូប៉ាស៊ីហ្វិក ដែលបើក ចំហប្រកបដោយបរិយាបន្ន និងមានភាពធន់ ជាការសំខាន់ណាស់ ចំពោះតំបន់របស់យើង»៕
