លោកនាយករដ្ឋមន្ត្រី ហ៊ុន សែន បានប្រកាសពីគម្រោងដំឡើងប្រាក់បៀវត្សជូនដល់មន្រ្តីរាជការ បន្ទាប់ពីរដ្ឋាភិបាលខកខានដំឡើងអស់រយៈពេល២ឆ្នាំមកហើយ។
ក្នុងពិធីប្រគល់សញ្ញាប័ត្រ និងបើកវគ្គសិក្សាថ្មីនៅសាលាភូមិន្ទរដ្ឋបាល ថ្ងៃទី១៣ ខែមិថុនា ឆ្នាំ២០២២នេះ លោកនាយករដ្ឋមន្ត្រី ហ៊ុន សែន បានបញ្ជាក់ថា ការដំឡើងប្រាក់បៀវត្សជូនមន្ត្រីរាជការនេះ មិនគិតជាភាគរយទេ គឺដំឡើងតាមរបៀប ដោយនឹងដំឡើងប្រាក់បៀវត្សច្រើនដល់មន្ត្រីរាជការដែលមានអ្នកមានប្រាក់បៀវត្សតិច និងដំឡើងតិចសម្រាប់មន្ត្រីរាជការដែលមានប្រាក់បៀវត្សខ្ពស់។
លោកថ្លែងថា៖ «ពិតមែនហើយ សម្រាប់សារាចរណែនាំទាក់ទងនឹងការរៀបចំច្បាប់ថវិកាសម្រាប់ឆ្នាំក្រោយ គ្រោងនឹងដំឡើងបៀវត្ស យើងខានដំឡើងបៀវត្សឆ្នាំ២០២០ ក៏មិនបានឡើង! ២០២១ ក៏មិនបានឡើង! ឥលូវ២០២២នេះ យើងនឹងចាប់ផ្តើមឡើង»។
លោកនាយករដ្ឋមន្រ្តី ហ៊ុន សែន បានឱ្យដឹងទៀតថា ការដំឡើងប្រាក់បៀវត្សសម្រាប់គ្រូបង្រៀននិងគ្រូពេទ្យ ទាបបំផុតឱ្យបាន១,៥លានរៀល ដែលកន្លងទៅ ប្រាក់បៀវត្សពួកគាត់មានចំនួន១,៣លានរៀល និងប្រាក់បៀវត្សសម្រាប់មន្រ្តីផ្នែកផ្សេងទៀតនឹងឡើងដល់១,៤លានរៀល ខណៈកន្លងទៅមានចំនួន១,២លានរៀល។
លោកបានបន្តទៀតថា នៅពេលដំឡើងបៀវត្ស ក៏ត្រូវដំឡើងពិដាននៃប្រាក់បៀវត្សដែលត្រូវជាប់ពន្ធផងដែរ ដែលមានន័យថា អ្នកដែលមានប្រាក់បៀវត្សក្រោម១,៥លានរៀល គឺមិនជាប់ពន្ធនោះទេ។
លោកបានបញ្ជាក់ថែមទៀតថា ការធ្វើបែបនេះ គឺចៀសវាងអ្នកមានប្រាក់បៀវត្សទាបជាងគេជាប់ពន្ធ ហើយការដែលធ្វើបែបនេះ គឺគិតទាំងវិស័យរដ្ឋ និងវិស័យឯកជន៕