នាយករដ្ឋមន្ត្រី ហ៊ុន សែន អះអាងថា វ៉ាក់សាំងបង្ការនិងប្រយុទ្ធប្រឆាំងជំងឺកូវីដ-១៩មាននៅក្នុងឃ្លាំងចំនួនជាង១១លានដូស ខណៈវ៉ាក់សាំងដែលមិត្តបរទេសសន្យាផ្ដល់ជូនកម្ពុជាមានចំនួនជាង២០លានដូសទៀត។
ថ្លែងក្នុងពិធីប្រគល់សញ្ញាបត្រ និងបើកវគ្គសិក្សាថ្មីនៅសាលាភូមិន្ទរដ្ឋបាល ព្រឹកថ្ងៃចន្ទនេះ លោក ហ៊ុន សែន ថារយៈពេល២ឆ្នាំនៃជំងឺកូវីដ-១៩ កម្ពុជាបានរៀនសូត្រច្រើនពីវិបត្តិជំងឺមួយនេះ ហើយចាត់ទុកថាជាភាពជោគជ័យដែលកម្ពុជាបានធ្វើកន្លងមកក្នុងការប្រយុទ្ធប្រឆាំងជំងឺរាតត្បាតមួយនេះ ដោយមានការចូលរួមយ៉ាងសកម្មពីរដ្ឋាភិបាល មន្រ្តីរាជការ និងប្រជាជន រួមទាំងការដាក់ចេញនូវវិធានការការពារ ពិសេសយុទ្ធនាការចាក់វ៉ាក់សាំងតែម្តង។
លោកក៏បានបញ្ជាក់បន្ថែមពីចំនួនវ៉ាក់សាំងបង្ការជំងឺកូវីដ-១៩ដែលមាននៅក្នុងឃ្លាំងជាង១១លានដូស និងវ៉ាក់សាំងដែលសន្យានឹងមកដល់កម្ពុជា ចំនួន១៥លានដូសពីរដ្ឋាភិបាលចិន ហើយ៥លាន៥សែនដូសរបស់រដ្ឋាភិបាលអូស្រ្តាលី នឹងមកដល់បន្តបន្ទាប់។
ការថ្លែងរបស់លោក ហ៊ុន សែន នេះ ធ្វើឡើងស្របពេលបច្ចុប្បន្ន កម្ពុជាកំពុងដំណើរការចាក់វ៉ាក់សាំងប្រឆាំងជំងឺកូវីដ-១៩ ឈានដល់ដូសទី៥ ដល់មន្រ្តីរាជការជួរមុខ និងក្រុមគោលដៅជាអាទិភាព។
ជាមួយគ្នានេះ លោកក៏បានអំពាវនាវដល់ប្រជាពលរដ្ឋឱ្យបន្តទទួលចាក់វ៉ាក់សាំងបង្ការជំងឺកូវីដ-១៩ឱ្យបានកាន់តែច្រើននិងគ្រប់ចំនួន ព្រមទាំងដូសជំរុញផង ដោយថា រដ្ឋមិនគិតថ្លៃពីប្រជាពលរដ្ឋនោះឡើយ។
លោកបញ្ជាក់ថា៖ «កុំថាឡើយដូសទី៥ ដល់ដូសទី២០ ក៏នៅតែមិនយកលុយដែរ»។
លោកបន្តថា រយៈពេល២ទៅ៣ឆ្នាំខាងមុខ ប្រធានបទកូវីដនៅតែជាបញ្ហាស្មុគស្មាញ ត្បិតជំងឺនេះនៅមិនទាន់ចប់ និងមិនទាន់ទៅណាឆ្ងាយពីប្រជាជននៅឡើយទេ ដែលតម្រូវឱ្យបន្តប្រុងប្រយ័ត្នឱ្យបានខ្ពស់។
ក្រសួងសុខាភិបាលបានចេញសេក្តីប្រកាសព័ត៌មានប្រចាំថ្ងៃ ដោយអះអាងថា កម្ពុជាមិនមានករណីឆ្លងជំងឺកូវីដ-១៩ រយៈពេលជាង១ខែមកហើយ គិតចាប់ពីថ្ងៃទី៧ ខែឧសភាមក។
គិតត្រឹមព្រឹកថ្ងៃទី១៣ ខែមិថុនា ឆ្នាំ២០២២ កម្ពុជារកឃើញអ្នកឆ្លងជំងឺកូវីដ-១៩ សរុបចំនួន១៣៦ ២៦២នាក់ អ្នកជាសះស្បើយសរុបចំនួន១៣៣ ២០៦នាក់ និងស្លាប់សរុបចំនួន៣ ០៥៦នាក់។
ដោយឡែក ចំពោះកំណើនអត្រាចាក់វ៉ាក់សាំងកូវីដ-១៩នៅកម្ពុជា គិតត្រឹមថ្ងៃទី១២ ខែមិថុនា ឆ្នាំ២០២២ លទ្ធផលចាក់វ៉ាក់សាំងធៀបនឹងចំនួនប្រជាជនសរុប១៦លាននាក់ មានចំនួន៩៤,១០%៕