រដ្ឋាភិបាលសម្រេចឱ្យកែសម្រួលព្រំប្រទល់តំបន់ការពារធម្មជាតិនីមួយៗឡើងវិញ ដោយកំណត់តំបន់ការពារធម្មជាតិ និងរបៀងអភិរក្សជីវចម្រុះ នៅក្នុងភូមិសាស្រ្ដខេត្តមួយចំនួន។
លិខិតទីស្ដីការគណៈរដ្ឋមន្រ្ដី ចុះថ្ងៃទី១០ ខែមិថុនា ឆ្នាំ២០២២ ដែលវីអូឌីទទួលបាននៅថ្ងៃអង្គារនេះ បានអនុញ្ញាតលើសំណើក្នុងការកំណត់តំបន់គ្រប់គ្រង និងសម្រាប់ប្រើប្រាស់អាស្រ័យផលជាក់ស្ដែង ក្នុងតំបន់ការពារធម្មជាតិ និងរបៀងអភិរក្សជីវចម្រុះ នៅក្នុងភូមិសាស្រ្ដខេត្តចំនួន១៥ រួមមាន ត្បូងឃ្មុំ ក្រចេះ មណ្ឌលគិរី រតនគិរី ស្ទឹងត្រែង កំពង់ធំ សៀមរាប ព្រះវិហារ ឧត្ដរមានជ័យ បន្ទាយមានជ័យ ពោធិ៍សាត់ កំពង់ឆ្នាំង កំពង់ស្ពឺ កំពត និងតាកែវ។
លិខិតនេះបានលើកឡើងថា រដ្ឋាភិបាលបានយល់ព្រមក្នុងការកែសម្រួលព្រំប្រទល់តំបន់ធម្មជាតិនីមួយៗឡើងវិញ ដោយរៀបចំកំណត់ជាបួនតំបន់គ្រប់គ្រង។ ទី១ តំបន់សហគមន៍ ជាដីភូមិករ និងដីស្រែចម្ការចាស់របស់ប្រជាពលរដ្ឋ។ ទី២ តំបន់ប្រើប្រាស់ដោយចីរភាព ជាដីរួមចំណែកក្នុងការអភិវឌ្ឍសេដ្ឋកិច្ច។ ទី៣ តំបន់អភិរក្ស និងទី៤ តំបន់ស្នូល ជាដីព្រៃឈើ ជម្រកសត្វព្រៃ និងសេវាប្រព័ន្ធអេកូឡូស៊ី ស្របតាមច្បាប់ស្ដីពីតំបន់ការពារធម្មជាតិ។
លិខិតដដែលនេះឱ្យអាជ្ញាធរកែសម្រួលព្រំប្រទល់តំបន់របៀងអភិរក្សជីវចម្រុះ ដែលមិនប៉ះពាល់ជាមួយប្រជាជន និងកំណត់ជាតំបន់អភិរក្សនៃតំបន់ការពារធម្មជាតិនីមួយៗ។
នៅក្នុងលិខិតនេះក៏បានបញ្ជាឱ្យអភិបាលខេត្តបន្ដដឹកនាំធ្វើការកំណត់អត្តសញ្ញាណក្បាលដី និងអត្តសញ្ញាណអ្នកកាន់កាប់ក្បាលដីជាក់ស្ដែងក្នុងតំបន់នីមួយៗឱ្យបានច្បាស់លាស់ ដើម្បីឱ្យពលរដ្ឋមានលទ្ធភាពប្រើប្រាស់ដី ស្នើសុំចុះបញ្ជី និងចេញបណ្ណកម្មសិទ្ធិ ស្របតាមច្បាប់ស្ដីពីតំបន់ការពារធម្មជាតិ ច្បាប់ភូមិបាល និងបទប្បញ្ញត្តិ-លិខិតបទដ្ឋានគតិយុត្តជាធរមាន។
លិខិតដដែលក៏បានណែនាំដល់អាជ្ញាធរឱ្យរក្សាទុកនិងចុះបញ្ជីជាទ្រព្យសម្បត្តិសាធារណៈរបស់រដ្ឋ ចំពោះទីតាំងមូលដ្ឋានកងទ័ព តំបន់ប្រវត្តិសាស្ត្រយោធា និងតំបន់ការពារសន្ដិសុខព្រំដែន ដែលស្ថិតក្នុងតំបន់ការពារធម្មជាតិ ដោយមានក្រសួងបរិស្ថានជាអាជ្ញាធរកាន់កាប់ដីរដ្ឋ ដោយមិនអនុញ្ញាតផ្ដល់កម្មសិទ្ធិជូនបុគ្គលឯកជនឡើយ៕