ក្នុងរយៈពេល៥ខែ ដើមឆ្នាំ២០២២នេះ ការនាំចេញទំនិញរបស់កម្ពុជាទៅកាន់ទីផ្សារសហរដ្ឋអាមេរិក មានការកើនឡើងចំនួន ៥៧,៧% បើធៀបរយៈពេលដូចគ្នាកាលពីឆ្នាំមុន ក្នុងទំហំទឹកប្រាក់ជិត៤ពាន់លានដុល្លារ ខណៈការនាំចូលទំនិញរបស់អាមេរិកមកកម្ពុជាមានទឹកប្រាក់ចំនួន១៣៤លានដុល្លារ។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា ឱ្យដឹងថា គិតត្រឹមខែឧសភា ឆ្នាំ២០២២នេះ ការនាំចេញទំនិញរបស់ប្រទេសកម្ពុជាទៅកាន់សហរដ្ឋអាមេរិក សម្រេចបានទឹកប្រាក់ចំនួន៣ ៧២៩លានដុល្លារ ដែលកើនឡើងចំនួន៥៧,៧ភាគរយ បើធៀបនឹងរយៈពេលដូចគ្នាកាលពីឆ្នាំ២០២១ ដែលមានចំនួន២ ៣៦៤លានដុល្លារប៉ុណ្ណោះ។
ជាមួយគ្នានេះ ទំនិញដែលត្រូវបានបញ្ជាទិញភាគច្រើន គឺជាផលិតផលវាយនភណ្ឌកាត់ដេរ សម្លៀកបំពាក់ ស្បែកជើង និងកាបូបសម្រាប់ធ្វើដំណើរ បន្ទះសូឡា និងផលិតផលកសិកម្ម។
យ៉ាងណាមិញ ប្រភពដដែលបញ្ជាក់ថា ចំពោះអាមេរិក ការនាំចូលទំនិញមកកាន់កម្ពុជា មានទឹកប្រាក់ចំនួន១៣៤លានដុល្លារ ដែលកើនឡើងចំនួន១០,៧ភាគរយ បើធៀបរយៈពេលដូចគ្នាកាលពីឆ្នាំ២០២១ ដែលមានចំនួន១២១លានដុល្លារ។ រីឯប្រភេទទំនិញសំខាន់ៗដែលត្រូវបាននាំចូលមានដូចជា រថយន្ត គ្រឿងចក្រ គ្រឿងអេឡិចត្រូនិច ឱសថ និងគ្រឿងបរិក្ខារពេទ្យ ជាដើម។
របាយការណ៍ដដែលបានឱ្យដឹងថា ប្រទេសដែលកម្ពុជានាំចេញច្រើនបន្ទាប់ពីសហរដ្ឋអាមេរិក គឺប្រទេសវៀតណាម មានចំនួន១ ០៧៩លានដុល្លារ ប្រទេសកាលណាដា មានចំនួន៤៥១លានដុល្លារ និងប្រទេសថៃ មានចំនួន៤៣៨លានដុល្លារ។
តាមសេចក្ដីប្រកាសព័ត៌មានរបស់ ADB កាលពីថ្ងៃទី០៦ ខែមេសា ឆ្នាំ២០២២ បានលើកឡើងថា ការនាំចេញទំនិញនិងសេវាកម្មរបស់កម្ពុជា ត្រូវបានព្យាករថា នឹងកើនឡើងនៅឆ្នាំនេះនិងឆ្នាំក្រោយ ដោយសារកំណើនតម្រូវការក្រៅស្រុកលើផលិតផលកម្ពុជា ព្រមជាមួយនឹងការងើបឡើងវិញជាបណ្ដើរៗនៃវិស័យទេសចរណ៍ ខណៈវិស័យសេវាកម្មត្រូវបានព្យាករថានឹងងើបឡើងវិញនៅកម្រិត ៤,៨% ក្នុងឆ្នាំ២០២២ និងកើនដល់ ៦,៨% ក្នុងឆ្នាំ២០២៣៕
