រដ្ឋាភិបាលប្ដេជ្ញាលុបបំបាត់អំពើហិង្សាគ្រប់ទម្រង់លើកុមារ ដើម្បីធានាឱ្យពួកគេរស់នៅក្នុងបរិយាកាសមួយប្រកបដោយសុវត្ថិភាព ស្របតាមផែនការគោលនយោបាយរបស់រដ្ឋដែលបានដាក់ចេញ។
ក្នុងកិច្ចប្រជុំកំពូលអ្នកដឹកនាំ ស្ដីពី «ដំណោះស្រាយ ដើម្បីបញ្ចប់អំពើហិង្សាលើកុមារ» កាលពីថ្ងៃទី១៤ ខែមិថុនានេះ លោកនាយករដ្ឋមន្ត្រី ហ៊ុន សែន បានថ្លែងថា នៅឆ្នាំ២០២១ ផ្អែកតាមការវាយតម្លៃលើផែនការសកម្មភាព ដើម្បីទប់ស្កាត់ និងឆ្លើយតបចំពោះអំពើហិង្សាលើកុមារ ឆ្នាំ២០១៧-២០២១ ប្រទេសកម្ពុជាបានស្ថិតនៅលើមាគ៌ាដ៏ត្រឹមត្រូវក្នុងការទប់ស្កាត់អំពើហិង្សាលើកុមារ។
ករណីនេះ លោកថា ដើម្បីបញ្ចប់ឱ្យបាននូវអំពើហិង្សាលើកុមារគ្រប់ទម្រង់ កម្ពុជានឹងបន្តកិច្ចខិតខំប្រឹងប្រែងឱ្យកាន់តែសកម្ម ក្នុងការធានាថា កុមារមានសុវត្ថិភាពនៅគ្រប់ទីកន្លែង ដូចជា ផ្ទះ, សាលារៀន និងសហគមន៍ ជាដើម។
លោកថ្លែងថា៖ «រាជរដ្ឋាភិបាលប្ដេជ្ញាយ៉ាងមុតមាំចំពោះការធានាឱ្យបានថា កុមារទាំងអស់នឹងរស់នៅក្នុងបរិយាកាសមួយប្រកបដោយភាពអំណោយផលដល់ការលូតលាស់ ព្រមទាំងទទួលបានការចិញ្ចឹមបីបាច់ និងកិច្ចការពារនានា សំដៅបញ្ចប់ឱ្យបានអំពើហិង្សាលើកុមារក្នុងគ្រប់ទម្រង់ និង សម្រេចឱ្យបាននូវការប្ដេជ្ញារបស់កម្ពុជា ក្នុងក្របខណ្ឌតំបន់ និងសកល តាមរយៈការអនុវត្តនូវផែនការនិងគោលនយោបាយជាតិនានាដែលបានដាក់ចេញ»។
លោកនាយករដ្ឋមន្ត្រី ហ៊ុន សែន ក៏បានអំពាវនាវទៅគ្រប់ភាគីពាក់ព័ន្ធ រួមគ្នាលើកកម្ពស់ស្មារតី ពង្រឹង និងពង្រីកកិច្ចសហប្រតិបត្តិការដែលមានស្រាប់ ទាំងទ្វេភាគី និងពហុភាគី ដើម្បីលើកស្ទួយសុខុមាលភាពកុមារនិងកិច្ចការពារកុមារ ជាពិសេសពង្រឹងយន្តការសម្របសម្រួលក្នុងចំណោមតួអង្គពាក់ព័ន្ធទាំងអស់ សំដៅចែករំលែកទិន្នន័យ រួមទាំងព័ត៌មានសំខាន់ៗ ដើម្បីចាត់វិធានការឱ្យបានទាន់ពេលនិងតឹងរ៉ឹងដាច់ខាតចំពោះសកម្មភាពហិង្សាគ្រប់ទម្រង់លើកុមារ។
បន្ថែមពីនេះ លោកក៏បានជំរុញឱ្យមានការប្តេជ្ញាចិត្តជាសកល តាមរយៈការកៀរគរធនធាន ទាំងហិរញ្ញវត្ថុ និងមិនមែនហិរញ្ញវត្ថុ រួមទាំងគាំទ្រការធានាចីរភាពនៃចលនាបញ្ចប់អំពើហិង្សាលើកុមារ ទាំងក្នុងក្របខណ្ឌអង្គការសហប្រជាជាតិ និងអង្គការអន្តរជាតិ ក៏ដូចជាតំបន់ដទៃទៀត ដើម្បីបញ្ចប់រាល់ទម្រង់ទាំងអស់នៃអំពើហិង្សាលើកុមារនៅត្រឹមឆ្នាំ២០៣០ខាងមុខនេះ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍គាំទ្រនឹងប្រសាសន៍របស់លោកនាយករដ្ឋមន្ត្រី ខណៈកន្លងមក លោកសង្កេតឃើញមានអំពើហិង្សាមួយចំនួនបានលើកឡើងចំពោះកុមារ ដូចជា ហិង្សាផ្លូវភេទ ផ្លូវកាយ ផ្លូវចិត្ត និងការឱ្យកុមារធ្វើការងារធ្ងន់ធ្ងរ ដែលប៉ះពាល់ដល់សិទ្ធិរបស់ពួកគេ ជាដើម។
ករណីនេះ លោកជំរុញទៅស្ថាប័នពាក់ព័ន្ធទាំងអស់ត្រូវអនុវត្តតាមប្រសាសន៍របស់លោកនាយករដ្ឋមន្ត្រី ហើយពង្រឹងការអនុវត្តច្បាប់ឱ្យបានតឹងរ៉ឹងនិងមានតម្លាភាព បើពុំដូច្នេះទេ មិនអាចលុបបំបាត់អំពើហិង្សាលើកុមារបានគ្រប់ទម្រង់នោះទេ។
លោកមានប្រសាសន៍ថា៖ «អ្វីដែលសំខាន់លើការអនុវត្តលើគោលនយោបាយនិងច្បាប់ នៅក្នុងការទប់ស្កាត់ ឬក៏បង្ការ ឬក៏ការជួយលើកកម្ពស់ទៅលើសិទ្ធិនិងផលប្រយោជន៍របស់កុមារឱ្យមានប្រសិទ្ធភាព។ អ៊ីចឹងការចូលរួមការអនុវត្តនេះជារឿងសំខាន់ បើសិនជាការអនុវត្តនិងការចូលរួមមិនទៅព្រមគ្នាទេ អ៊ីចឹងវាអត់សូវមានប្រសិទ្ធភាពទេ ហើយបញ្ហាទៅលើកុមារនៅតែមានការរំលោភបំពាន»។
ប្រធានកម្មវិធីកិច្ចការពារកុមារ នៃអង្គការទស្សនៈពិភពលោក លោក ឆាយ វាសនា បានលើកឡើងកាលពីថ្ងៃទី១០ ខែមិថុនានេះថា ចាប់ពីឆ្នាំ២០១៨ ដល់ឆ្នាំ២០២១ អំពើហិង្សាលើកុមារដែលអង្គការនេះបានធ្វើការផ្សាយនិងអប់រំដល់ឪពុកម្ដាយនិងភាគីពាក់ព័ន្ធផ្សេងទៀត បានធ្វើឱ្យអំពើហិង្សាលើកុមារថយចុះពី៤៩ភាគរយ មកចំនួន៣៨ភាគរយវិញ។ លោកបន្តថា គម្រោងនេះ អង្គការទស្សនៈពិភពលោក បានធ្វើនៅខេត្តចំនួន១០នៃប្រទេសកម្ពុជា។
លោកបន្ថែមថា ទោះបីអំពើហិង្សាលើកុមារបានថយចុះក៏ពិតមែន ប៉ុន្តែបញ្ហានេះនៅតែកើតមានឡើង ដែលករណីនេះ ទាមទារឱ្យមានការចូលរួមពីភាគីពាក់ព័ន្ធ ជាពិសេសរដ្ឋាភិបាលកម្ពុជាតែម្ដង។
បើតាមអង្គការទស្សនៈពិភពលោក (World Vision) អំពើហិង្សាលើស្រ្តី និងកុមារ ជាទម្រង់នៃការរំលោភបំពានលើផ្លូវកាយនិងផ្លូវចិត្ត ដែលធ្វើឱ្យប៉ះពាល់ដល់សិទ្ធិ សុខភាពផ្លូវកាយ របួសរាងកាយ វិបត្តិផ្លូវចិត្ត និងប្រាជ្ញា ជាដើម៕