ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) បានឱ្យដឹងកាលពីថ្ងៃអង្គារម្សិលមិញថា កងកម្លាំងអ៊ុយក្រែនបច្ចុប្បន្នកំពុងតែទទួលរងនូវការខាតបង់យ៉ាងឈឺចាប់ ក្នុងការប្រយុទ្ធតទល់ជាមួយនឹងទាហានរុស្ស៊ី ទាំងនៅក្នុងតំបន់ទីក្រុង Sievierodonetsk ភាគខាងកើត និងតំបន់ Kharkiv ។
ថ្លែងក្នុងសុន្ទរកថាមួយតាមរយៈប្រព័ន្ធវីដេអូ និងត្រូវបានស្រង់យកមកចុះផ្សាយដោយទីភ្នាក់ងារសារព័ត៌មាន Reuters ប្រធានាធិបតីអ៊ុយក្រែនរូបនេះ បន្តថា ខណៈគ្រាប់រ៉ុក្កែតរុស្ស៊ីមួយចំនួនអាចមានសមត្ថភាពគេចផុតចេញពីប្រព័ន្ធការពារ ដែលបណ្តាលឱ្យមានមនុស្សស្លាប់ អ៊ុយក្រែនបច្ចុប្បន្ន គឺពិតជាត្រូវការយ៉ាងចាំបាច់នូវអាវុធប្រឆាំងមីស៊ីលទំនើបនានា។
ទាក់ទិននឹងករណីនេះ លោកបន្ថែមថា ប្រទេសជាដៃគូទាំងឡាយមិនគួរមានការពន្យារពេលដឹកជញ្ជូនអាវុធទាំងនេះមកកាន់ប្រទេសខ្លួនឡើយ។
លោក ហ្សេលេនស្គី បានឱ្យដឹងទៀតថា៖ «ការប្រយុទ្ធគ្នាដ៏សាហាវ [ដូចកាលពីពេលកន្លងទៅ] បច្ចុប្បន្ន ផ្ទុះឡើងនៅក្នុងទីក្រុង Sievierodonetsk ក៏ដូចជាទីប្រជុំជន និងសហគមន៍នៅក្បែរនោះ។ រាល់ការបាត់បង់ទាំងឡាយ គឺពិតជាឈឺចាប់ខ្លាំងណាស់»។
លោកបន្ថែមថា៖ «ទោះជាយ៉ាងណា យើងត្រូវតែរក្សាភាពរឹងមាំ។ ការរក្សាភាពរឹងមាំ គឺមានសារៈសំខាន់ខ្លាំងណាស់ ជាពិសេសសម្រាប់តំបន់ដុនបាស [donbas]»។
យោងតាមលោក វ៉ូឡូឌីមៀ ហ្សេលេនស្គី ក្រៅពីទីក្រុង Sievierodonetsk នេះ អ៊ុយក្រែនបច្ចុប្បន្នក៏កំពុងតែមើលឃើញពីការខាតបង់ដ៏ឈឺចាប់នៅក្នុងតំបន់ Kharkiv ភាគខាងកើតនៃទីក្រុងកៀវ (Kyiv) ផងដែរ ជាកន្លែងដែលរុស្ស៊ីកំពុងតែព្យាយាមពង្រឹងជំហរយោធារបស់ខ្លួន។
លោកថា៖ «សមរភូមិដ៏ក្ដៅគគុកកំពុងតែបន្តនៅទីនោះ ខណៈយើងត្រូវតែបន្តប្រយុទ្ធតទល់ឱ្យកាន់តែខ្លាំងបន្ថែមទៀត»។
គួរបញ្ជាក់ថា ការបាញ់គ្រាប់ផ្លោងនានារបស់រុស្ស៊ីបានបំផ្លាញហេដ្ឋារចនាសម្ព័ន្ធសំខាន់ៗទាំងអស់ក្នុងទីក្រុង Sievierodonetsk ខណៈលោក ហ្សេលេនស្គី ក៏ធ្លាប់បានអះអាងកាលពីពេលកន្លងទៅថា ការវាយដណ្តើមយកទីក្រុងក្នុងតំបន់ភាគខាងកើតអ៊ុយក្រែនមួយនេះ បច្ចុប្បន្នគឺជាគោលដៅដ៏សំខាន់មួយរបស់រុស្ស៊ី៕
