គណៈកម្មាធិការជាតិរៀបចំការបោះឆ្នោត (គ.ជ.ប) សម្រេចប្តឹង អនុប្រធានគណបក្សភ្លើងទៀន លោក សុន ឆ័យ ជាផ្លូវការពីបទ «បរិហារកេរិ៍្តជាសាធារណៈ» និងទាមទារឱ្យលោក សុន ឆ័យ ធ្វើលិខិតសុំទោស គ.ជ.ប ជាសាធារណៈ។
ពាក្យបណ្តឹងដាក់ទៅកាន់ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ចុះនៅថ្ងៃទី១៧ ខែមិថុនានេះ ត្រូវបានធ្វើឡើងដោយលោក ឌឹម សុវណ្ណារុំ សមាជិក គ.ជ.ប និងលោក សោម សូរីដា អគ្គលេខាធិការរងនៃ គ.ជ.ប។
នៅក្នុងពាក្យបណ្តឹងប្រឆាំងលោក សុន ឆ័យ គ.ជ.ប បានយោងអង្គហេតុតាមរយៈបទសម្ភាសន៍របស់លោក សុន ឆ័យ នៅក្នុងកម្មវិធី Idea Talk របស់សារព័ត៌មាន ឌឹ ខេមបូឌា ដេលី (The Cambodia Daily) កាលពីថ្ងៃទី៧ ខែមិថុនា ពោលគឺ ២ថ្ងៃ នៅក្រោយការបោះឆ្នោតជ្រើសរើសក្រុមប្រឹក្សាឃុំសង្កាត់។
គ.ជ.ប បានស្រង់សម្តីលោក សុន ឆ័យ ដែលបានថ្លែងនៅលើសារព័ត៌មាន The Cambodia Daily រិះគន់ទៅលើការរៀបចំការបោះឆ្នោត និងភាពមិនប្រក្រតីមួយចំនួនផ្សេងទៀត រួមមាន ការបំភិតបំភ័យពលរដ្ឋម្ចាស់ឆ្នោត ការទិញសន្លឹកឆ្នោត ការលួចសន្លឹកឆ្នោត និងភាពមិនឯករាជ្យរបស់ គ.ជ.ប ជាដើម។ គ.ជ.ប ចាត់ទុកការលើកឡើងរបស់លោក សុន ឆ័យ ថា បានធ្វើឱ្យប៉ះពាល់ធ្ងន់ធ្ងរដល់ស្ថាប័នជាតិមួយនេះ។
ការចេញមុខប្តឹងរបស់ គ.ជ.ប នៅពេលនេះ គឺក្រោយពី គណបក្សប្រជាជនកម្ពុជា តាមរយៈមេធាវី លោក គី តិច បានដាក់ពាក្យបណ្តឹងទៅកាន់តុលាការប្រឆាំងលោក សុន ឆ័យ កាលពីថ្ងៃទី១៤ ខែមិថុនា ដោយទាមទារសំណងពីអ្នកនយោបាយប្រឆាំងចាស់វស្សាប្រកបដោយថ្វីមាត់រូបនេះ ចំនួន ១លានដុល្លារអាមេរិក ដោយយោងលើអង្គហេតុប្រហាក់ប្រហែលទៅនឹងបណ្តឹងរបស់ គ.ជ.ប នៅពេលនេះដែរ។
បណ្តឹងប្រឆាំងនឹងលោក សុន ឆ័យ ដោយ គ.ជ.ប និងគណបក្សប្រជាជនកម្ពុជា ធ្វើឡើងក្នុងពេលដែលលោក សុន ឆ័យ បានចាកចេញពីប្រទេសកម្ពុជាទៅកាន់ប្រទេសអូស្ត្រាលី កាលពីថ្ងៃទី១៣ ខែមិថុនា។ រហូតមកទល់ពេលនេះ គេមិនទាន់ឃើញលោក សុន ឆ័យ ចេញមកប្រតិកម្មចំពោះបណ្តឹងប្រឆាំងរូបលោកនៅឡើយទេ។
គួររម្លឹកថា ការបោះឆ្នោតជ្រើសរើសក្រុមប្រឹក្សាឃុំសង្កាត់ កាលពីថ្ងៃទី៥ ខែមិថុនា លទ្ធផលបណ្តោះអាសន្នបង្ហាញថា គណបក្សប្រជាជនកម្ពុជាទទួលបានសំឡេងឆ្នោតគាំទ្រប្រមាណ ៧៥ភាគរយ ខណៈបក្សភ្លើងទៀន ទទួលបានសំឡេងឆ្នោតគាំទ្រប្រមាណ ២២ភាគរយនៃសំឡេងឆ្នោតសរុប។ ទោះជាយ៉ាងណា ការបោះឆ្នោតនេះត្រូវបានគណបក្សភ្លើងទៀន និងគណបក្សនយោបាយមួយចំនួនទៀត ព្រមទាំងអង្គការសង្គមស៊ីវិលធ្វើការងារលើវិស័យបោះឆ្នោត រិះគន់ថា បានប្រព្រឹត្តទៅដោយគ្មានភាពត្រឹមត្រូវនិងយុត្តិធម៌ពិតប្រាកដនោះទេ៕