មេធាវីការពារក្តីឱ្យកញ្ញា សេង ធារី គឺលោក ជូង ជូងី បានអះអាងថា កូនក្តីលោកត្រូវបានគេបញ្ជូនទៅឃុំខ្លួននៅពន្ធនាគារខេត្តព្រះវិហារ កាលពីថ្ងៃទី១៥ ខែមិថុនា ទាំងមិនបានដឹងពីមូលហេតុ។
លោក ជូង ជូងី បានឱ្យ VOD ដឹងនៅថ្ងៃសុក្រនេះថា កូនក្តីលោកត្រូវបានគេបញ្ជូនទៅឃុំខ្លួននៅពន្ធនាគារមួយនៅខេត្តព្រះវិហារហើយ ខណៈលោកសុំជួបកូនក្តីនៅពន្ធនាគារព្រៃស នៅថ្ងៃសុក្រនេះ។
កញ្ញា សេង ធារី មេធាវីអាមេរិក ត្រូវបានសមត្ថកិច្ចកម្ពុជាបញ្ជូនទៅឃុំខ្លួននៅពន្ធនាគារព្រៃស កាលពីថ្ងៃទី១៤ ខែមិថុនានេះ ក្រោយពីសាលាដំបូងរាជធានីភ្នំពេញ ចេញសាលក្រមផ្តន្ទាទោសដាក់ពន្ធនាគារ៦ឆ្នាំ ចោទពីបទ «រួមគំនិតក្បត់ និងញុះញង់» ក្រោយពីគាត់បង្ហោះសារគាំទ្រគម្រោងធ្វើមាតុភូមិនិវត្តន៍របស់លោក សម រង្ស៊ី កាលពីអំឡុងឆ្នាំ២០១៩។
អ្នកនាំពាក្យស្ថានទូតអាមេរិក លោកស្រី Stephanie Arzate ឱ្យ VOD ដឹងនៅថ្ងៃនេះដែរថា៖ «យើង[អាមេរិក]នៅតែបន្តទំនាក់ទំនងជាមួយ សេង ធារី និងអ្នកតំណាងនានារបស់នាង ហើយនឹងផ្តល់សេវាប្រឹក្សាយោបល់ដ៏សមរម្យដល់នាង»។