សមត្ថកិច្ចខេត្តព្រះសីហនុបានឱ្យដឹងថា ជនជាតិវៀតណាម៤នាក់ត្រូវបានឃាត់ខ្លួន បន្ទាប់ពីពួកគេធ្វើការបាញ់ប្រហារនិងបង្ករបួសស្នាមលើមន្ត្រីនគរបាលក្រុងព្រះសីហនុមួយរូប កាលពីយប់ថ្ងៃពុធកន្លងទៅ ខណៈករណីបាញ់ប្រហារមួយផ្សេងទៀតក៏កើតមានឡើងនៅក្នុងតំបន់ផងដែរ។
យោងតាមអធិការនគរបាលក្រុងព្រះសីហនុ លោក តី វិសាល បានឱ្យដឹងថា សម្រាប់ករណីទី១ អ្នកបើកតាក់ស៊ីមួយរូបបានរាយការណ៍មកកាន់សមត្ថកិច្ចថា ខ្លួនត្រូវបានបុរសម្នាក់យកកាំភ្លើងមកភ្ជង់ដើម្បីគំរាមកំហែង ហើយនៅពេលដែលសមត្ថកិច្ចមកដល់ទីតាំងកើតហេតុ ក្រុមរបស់បុរសបង្កហេតុដែលមានបក្ខពួកសរុបចំនួន៤នាក់ក៏បានបាញ់មកលើក្រុមសមត្ថកិច្ច ដែលបានបណ្ដាលឱ្យមន្រ្តីនគរបាលមួយរូបរងរបួសផងដែរ។
ប្រភពដដែលបន្ថែមថា ហេតុការណ៍នេះបានកើតឡើងកាលពីវេលាម៉ោង៩និង២០នាទីយប់ថ្ងៃពុធ ខណៈជនបង្កហេតុជាជនជាតិវៀតណាម ៤នាក់ ត្រូវបានចាប់សមត្ថកិច្ចចាប់ខ្លួនភ្លាមៗ។
លោក តី វិសាល បន្តថា៖ «សម្រាប់មន្រ្តីនគរបាលរបស់យើង គឺបានរងរបួសចំជើងស្តាំធ្ងន់ធ្ងរ»។
លោកថា៖ «មន្ត្រីរបស់យើងខាងលើនេះបានរងរបួស ដោយសារតែជនដៃដល់មានកាំភ្លើងនៅក្នុងដៃ ហើយបាញ់មកកាន់យើងវិញ»។
ទោះជាយ៉ាងណា អធិការនគរបាលក្រុងព្រះសីហនុរូបនេះបានបញ្ជាក់ថា កាំភ្លើងមួយដើមដែលត្រូវបានប្រើប្រាស់ដោយជនដៃដល់នេះត្រូវបានរឹបអូសយកមករក្សាទុករួចរាល់ហើយ ខណៈសំណុំរឿងនេះកំពុងតែបញ្ជូនទៅតុលាការដើម្បីចាត់ការបន្ត។
ជាមួយគ្នានេះ នាយប៉ុស្តិ៍នគរបាលសង្កាត់លេខ៣ លោក អ៊ុក ផាន់ណារ៉េត បានឱ្យដឹងថា យោងតាមការរាយការណ៍ពីប្រជាពលរដ្ឋនៅក្នុងតំបន់របស់លោក ក្នុងនោះមានបុរសជាជនជាតិចិនម្នាក់ក៏បានរងរបួសក្នុងហេតុការណ៍បាញ់ប្រហារគ្នាមួយផងដែរ នៅវេលាម៉ោង១រំលងអាធ្រាត្រឈានចូលថ្ងៃព្រហស្បតិ៍។
លោកថា៖ «ខ្ញុំបានទទួលរបាយការណ៍អំពីករណីនេះតែប៉ុណ្ណឹងនោះទេ។ សម្រាប់ព័ត៌មានលម្អិតបន្ថែមយ៉ាងណាទៀតនោះ សូមធ្វើការទាក់ទងទៅកាន់ថ្នាក់លើ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Two Shootings in One Night in Sihanoukville