ប្រជាពលរដ្ឋ និងសង្គមស៊ីវិលក្នុងខេត្ត ស្នើទៅអាជ្ញាធរខេត្តព្រះសីហនុ ឱ្យពង្រឹងវិធានការទប់ស្កាត់ការជួញដូរ និងប្រើប្រាស់អាវុធខុសច្បាប់បន្ថែមទៀត ដោយពួកគេបារម្ភពីបញ្ហាអសន្តិសុខសង្គម នឹងជះផលប៉ះពាល់ដល់វិស័យទេសចរណ៍ និងការរស់នៅរបស់ពលរដ្ឋថែមទៀតផង។
ការស្នើនេះ ធ្វើឡើងបន្ទាប់ពីសមត្ថកិច្ចខេត្តព្រះសីហនុ បានឃាត់ខ្លួនជនជាតិវៀតណាមចំនួន ៤នាក់ ករណីដែលពួកគេបាញ់ប្រហារនិងបង្ករបួសស្នាមលើមន្ត្រីនគរបាលក្រុងព្រះសីហនុមួយរូប កាលពីយប់ថ្ងៃទី១៤ ខែមិថុនា ឆ្នាំ២០២២។ ជាមួយគ្នានោះ សមត្ថកិច្ចមូលដ្ឋានសង្កាត់លេខ៣ ក៏បានអះអាងថា នៅយប់ថ្ងៃទី១៤ ឈានចូលថ្ងៃទី១៥ ខែមិថុនា ក៏មានករណីបាញ់ប្រហារមួយផ្សេងទៀតបានឡើងបណ្តាលឱ្យបុរសជាជនជាតិចិនម្នាក់រងរបួសផងដែរ។
ប្រជាពលរដ្ឋរស់នៅសង្កាត់លេខ៤ ក្រុងព្រះសីហនុលោក ធឹម ធន ប្រាប់វីអូឌីថា សកម្មភាព បាញ់ប្រហារក្នុងខេត្តនេះ បានកើតឡើងជាថ្មីទៀត បន្ទាប់ពីស្ងាប់ស្ងាត់អំឡុងពេលផ្ទុះកូវីដ-១៩ ។ លោកបន្តថា បើសិនជាការបាញ់ប្រហារដោយអាវុធនៅតែកើតឡើងមានក្នុងមូលដ្ឋានខេត្តនេះ វានឹងបង្កផលប៉ះពាល់ដល់វិស័យទេសចរណ៍ និងការរបរមុខរស់ប្រជាពលរដ្ឋ ពិសេសបញ្ហាអសន្តិសុខតែម្តង។
លោក ធឹម ធន ស្នើទៅអាជ្ញាធរព្រះសីហនុ ឱ្យពង្រឹងផ្នែកសន្តិសុខ និងវិធានការបង្រ្កាបការជួញដូរអាវុធដោយខុសច្បាប់ ដើម្បីទប់ស្កាត់បញ្ហានេះ។ បើពុំដូច្នេះលោកថា ភ្ញៀវទេសចរលែងហ៊ានមកកម្សាន្តនៅខេត្តជាប់មាត់សមុទ្រមួយនេះទៀត ហើយប្រជាពលរដ្ឋក៏មិនហ៊ានចេញដើរហើនោះដែរ ដោយបារម្ភពីសុវត្ថិភាព។
លោកថា៖«ព្រួយបារម្ភស្រុកយើងបានសុខសាន្តប៉ុណ្ណឹងហើយ នៅឱ្យមានអាវុធនាំចូលខុសច្បាប់ អីមកបាញ់ប្រហារអ៊ីចឹង ក៏មិនសូវសប្បាយចិត្តដែរហ្នឹង។ វាប៉ះពាល់សន្តិសុខជាតិយើងដែរហ្នឹង ប្រជាពលរដ្ឋយើងដល់ពេលអ៊ីចឹង មានការភ័យព្រួយ។ យើងមិនមែនសមត្ថកិច្ចណា ដែលមានស្អីការពារណា»។
មន្ត្រីសម្របសម្រួលសមាគមអាដហុក (Adhoc) ប្រចាំខេត្តព្រះសីហនុ លោកស្រី ជៀប សុធារី កត់សម្គាល់ថា ចាប់តាំងពីរដ្ឋាភិបាលបើកឱ្យមានភ្ញៀវទេសចរ និងអ្នកវិនិយោគអាចចូលមករកស៊ីនៅកម្ពុជាបានវិញនោះ ជនជាតិបរទេស មានទាំង ចិន វៀតណាម និងជនជាតិដទៃបានចូលមកខេត្តព្រះសីហនុ កាន់តែច្រើន។ លោកស្រីថា នៅខែមិថុនានេះ ករណីបាញ់ប្រហារគ្នាបានកើតឡើងញឹកញាប់ បើទោះបីជាមានការបង្ក្រាបពីសំណាក់សមត្ថកិច្ចជាបន្តបន្ទាប់ក្ដី។
លោកស្រីថា ជនដែលបង្កភាគច្រើនជាជនបរទេស ប៉ុន្តែពួកគេមានប្រើប្រាស់អាវុធ ខណៈកន្លងមក សមត្ថកិច្ចដែលចុះបង្រ្កាបនោះ តែងតែចាប់បានអាវុធលាក់ទុក និងដកហូតពីជនទាំងនោះ ប៉ុន្តែរកប្រភពនាំចូលមិនឃើញ។
លោកស្រីថា៖«តាំងពីកាលមុនរហូតដល់ឥឡូវ យើងនៅតែរកមិនទាន់ឃើញថា ជនបរទេសដែលគាត់បានកាន់កាប់អាវុធ តាមរបៀបណា ហើយយកពីកន្លែងមក យើងរកមិនទាន់ឃើញទេ។ នៅពេលបង្រ្កាបបទល្មើស សមត្ថកិច្ចយើងតែងតែដកហូត យកវត្ថុតាងដែលពាក់ព័ន្ធសំណុំរឿងរក្សាទុកអស់ហើយ ប៉ុន្តែនៅតាមកន្លែងផ្សេងៗ។[ …]។ អ៊ីចឹងធ្វើឱ្យយើងមានការព្រួយបារម្ភមិនថា អ្នកដែលមករកស៊ីទេ សូម្បីតែប្រជាពលរដ្ឋធម្មតាដែលលោករស់នៅខេត្តព្រះសីហនុរាល់ថ្ងៃ ក៏លោកនៅមានការព្រួយបារម្ភដែរ ដោយសារ យើងមើលទៅចេះតែឃើញមានបញ្ហា ការប្រើប្រាស់អាវុធ ឬការឈ្លោះទាស់គ្នា កើតឡើង ហើយភាគច្រើនភាគីជម្លោះ មានអាវុធ ដែលធ្វើឱ្យយើងចេះតែមានការភ័យព្រួយបារម្ភ ក្នុងការពារសុវត្ថិភាពផ្ទាល់ខ្លួន»។
លោកស្រី ជៀប សុធារី ស្នើទៅអាជ្ញាធរពង្រឹងការអនុវត្តច្បាប់ និងវិធានការចុះបង្រ្កាប ដើម្បីទប់ស្កាត់ការជួញដូរ និងប្រើប្រាស់អាវុធ កុំឱ្យកើតឡើងជាបន្តទៀត បើមិនដូច្នេះទេ លោកស្រីថា ករណីនេះ នឹងបង្កផលប៉ះពាល់វិស័យទេសចរណ៍ ការវិនិយោគផ្សេងៗ រួមទាំងប៉ះពាល់ដល់មុខរាជរដ្ឋាភិបាលផងដែរ។
លោកថា៖«ខ្ញុំសូមថា ឱ្យមានការបង្រ្កាបបទល្មើសហ្នឹងដោយយកចិត្តទុកដាក់បំផុត ហើយគួរតែបង្រ្កាបអំពើពុករលួយនៅក្នុងនឹងដែរ។ តាមពិតច្បាប់កម្ពុជាគឺជាច្បាប់ដែលមានលក្ខណៈស្ដង់ដារអន្តរជាតិ ប៉ុន្តែបុគ្គលអ្នកអនុវត្តច្បាប់ តើគាត់បានអនុវត្តច្បាប់តឹងរឹង ឬគាត់ បណ្ដែតបណ្ដោយភាពចង់មានចង់បាន អ៊ីចឹងច្បាប់កម្ពុជាវាអន់ថយទៅតាមហ្នឹង »។
មួយថ្ងៃក្រោយកើតហេតុការណ៍ផ្ទុះអាវុធបណ្តាឱ្យមន្ត្រីនគរបាលម្នាក់ ដែលមានតួនាទីជាអធិការរងនៃអធិការដ្ឋានក្រុងព្រះសីហនុ រងរបួសជើងខាងស្តាំ កាលពីយប់ថ្ងៃទី១៥ ខែមិថុនា ឆ្នាំ២០២២ នៅក្នុងភូមិសាស្ត្រ សង្កាត់លេខ៤ ក្រុងព្រះសីហនុ អាជ្ញាធរខេត្តបានបើកកិច្ចប្រជុំគណៈបញ្ជាការឯកភាពខេត្តបន្ទាន់មួយនៅថ្ងៃទី ១៦ ខែមិថុនា។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានឱ្យដឹងថា ក្នុងកិច្ចប្រជុំគណៈបញ្ជាឯកភាពរដ្ឋបាលខេត្តព្រះសីហនុ អភិបាលខេត្ត លោក គួច ចំរើន អះអាងថា កិច្ចប្រជុំបន្ទាន់នេះ បន្ទាប់ពីមានករណីបទល្មើសប្រើប្រាស់អាវុធខុសច្បាប់ ការបង្ករបួសស្នាម និងក្មេងទំនើង នៅក្នុងក្រុងព្រះសីហនុ រហូតដល់សមត្ថកិច្ច បានទទួលរងរបួសពេលកំពុងប្រតិបត្តិការបង្រ្កាបថែមទៀតផង។
ក្នុងកិច្ចប្រជុំនោះ អភិបាលខេត្តបានបញ្ជាក់ថា ការធ្វើចរាចរ លក់ដូរ និងបញ្ចេញអាវុធដោយខុសច្បាប់ ទាមទារឱ្យមានការស្រាវជ្រាវរកប្រភពដើម ដើម្បីឈានទៅបង្ក្រាបបានទាន់ពេលវេលា និងគ្មានការលើកលែងដល់អ្នកពាក់ព័ន្ធការជួញដូរអាវុធនេះឡើយ។
អ្នកនាំពាក្យលើកឡើងថា៖ «ឯកឧត្តម[អភិបាលខេត្ត]ក៏បានបញ្ជាក់ជំហរយ៉ាងម៉ឺងម៉ាត់ថា យើងគ្មានការលើកលែងជាដាច់ខាត ចំពោះអ្នកចរាចរ ជួញដូរ ប្រើប្រាស់ និងផ្តល់អាវុធដោយខុសច្បាប់ ហើយត្រូវស្រាវជ្រាវឱ្យដល់ឫសគល់ និងចាត់វិធានការតាមផ្លូវច្បាប់»។
កាលពីថ្ងៃទី៩ ខែមីនា ឆ្នាំ២០២២ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងដោយទទួលស្គាល់ពីករណីចាប់ជំរិត ឆក់ ប្លន់ ឃាតកម្ម ការធ្វើទារុណកម្ម និងឧក្រិដ្ឋកម្មគ្រឿងញៀន ក្នុងភូមិសាស្ត្រខេត្តជាប់មាត់សមុទ្រមួយនេះ។ បញ្ហាទាំងនេះ លោកក៏បានបញ្ជាទៅអាជ្ញាធរពាក់ព័ន្ធទាំងអស់ ចាំបាច់ត្រូវតែលុបបំបាត់ឱ្យអស់ មុនការបោះឆ្នោតឃុំ-សង្កាត់ ឈានចូលមកដល់ក្នុងខែមិថុនា។
រដ្ឋមន្ត្រីក្រសួងមហាផ្ទៃរូបនេះបន្តថា៖ «ពេលខ្លះ ខ្ញុំមិនចង់មើលនោះទេ ប៉ុន្តែចៀសមិនរួច ដោយខ្ញុំត្រូវតែពិនិត្យលើករណីទាំងនោះ។ រូបភាពទាំងអស់នោះពិតជាសាហាវខ្លាំងណាស់ ហើយករណីទាំងនេះក៏កំពុងតែត្រូវបានផ្សព្វផ្សាយដល់ពិភពលោកទាំងមូលផងដែរ ថាកម្ពុជាមិនល្អ ដោយមានការលួច ឆក់ ប្លន់ ចាប់ជំរិត គំរាមគំហែង និងហិង្សាគ្រប់កន្លែង។ វាមិនប៉ះពាល់ត្រឹមតែកេរ្តិ៍ឈ្មោះរបស់ខេត្តព្រះសីហនុតែមួយប៉ុណ្ណោះទេ»។
ប្រមាណ១ខែក្រោយមក ពោល គឺនៅខែមេសា លោក ស ខេង អះអាងវិញថា បទល្មើសផ្សេងៗក្នុងខេត្តព្រះសីហនុ ហាក់ស្ងប់ស្ងាត់ បន្ទាប់ពីលោកបានអំពាវនាវឱ្យមានការបង្ក្រាបបទល្មើសនៅក្នុងខេត្តជាប់មាត់សមុទ្រមួយនេះ ប៉ុន្តែលោកមិនច្បាស់ទេថា តើការស្ងប់ស្ងាត់បទល្មើសនោះដោយសារគ្មានបទល្មើសពិតមែន ឬដោយសារការធ្វើរបាយការណ៍ភូតកុហក់លោក?