មេធាវីការពារក្តីឱ្យ កញ្ញា សេង ធារី អះអាងថា រូបលោកនឹងដាក់លិខិតទៅក្រសួងមហាផ្ទៃ ដើម្បីស្នើសុំចួបកូនក្ដីរបស់ខ្លួន ដោយបារម្ភខ្លាចមន្ត្រីពន្ធនាគារខេត្តព្រះវិហារ មិនអនុញ្ញាតឱ្យចូលចួបកូនក្ដីជាថ្មីទៀត បន្ទាប់ពីលោកខកខានចួបកូនក្តីម្តងរួចមកហើយ នៅពេលឃុំខ្លួននៅពន្ធនាគារព្រៃស។
ការអះអាងរបសមេធាវីការពារក្ដីឱ្យកញ្ញា សេង ធារី នេះ បន្ទាប់ពីសមត្ថកិច្ចរាជធានីភ្នំពេញបានបញ្ជូនកញ្ញា ចេញពីពន្ធនាគារព្រៃស រាជធានីភ្នំពេញ ទៅឃុំនៅពន្ធនាគារខេត្តព្រះវិហារវិញ កាលពីថ្ងៃទី១៥ ខែមិថុនា ឆ្នាំ២០២២ ដោយមិនបានប្រាប់ពីមូលហេតុទៅកាន់មេធាវីការពារសិទ្ធិឱ្យកញ្ញាឡើយ។
មេធាវីការពារក្តីឱ្យកញ្ញា សេង ធារី គឺ លោក ជូង ជូងី ប្រាប់វីអូឌីនៅថ្ងៃសៅរ៍ថា មូលហេតុដែលលោកគ្រោងដាក់លិខិតទៅក្រសួងមហាផ្ទៃនៅថ្ងៃទី២០ ខែមិថុនា ឆ្នាំ២០២២ ដោយបារម្ភខ្លាចមន្ត្រីពន្ធនាគារខេត្តព្រះវិហារមិនអនុញ្ញាតឱ្យលោកចូលចួបកូនក្ដី នៅពេលដែលលោកទៅដល់ពន្ធនាគារខេត្តព្រះវិហារនោះ។
លោកថា៖«យើងអត់ទុកចិត្តពន្ធនាគារទេ ជួនកាលគាត់អារម្មណ៍អត់ល្អ គាត់ខ្លាចថ្នាក់លើរបស់គាត់! គាត់មិនឱ្យចួបស្រេចចិត្តគាត់ ។ អ៊ីចឹងចង់ឱ្យមានភាពជាក់លាក់ពីប្រធាននាយកដ្ឋានពន្ធនាគារសិទ្ធិ ថា តើគាត់ឱ្យជួប ឬមិនឱ្យចួប ហើយបើគាត់ឱ្យចួបត្រូវមានលិខិតពីគាត់ទៅ ព្រោះជូនកាលពេលទៅដល់អត់ឱ្យចួប។ អាហ្នឹងខកជើងដូចខ្ញុំទៅ(ម២)អ៊ីចឹង គាត់មិនឱ្យចួបស្រេចចិត្តគាត់។ ដល់អ៊ីចឹងយើងធ្វើដំណើររាប់រយគីឡូត្រូវខកជើង»។
លោក ជូង ជូងី បន្តថា ការបញ្ជូនកូនក្ដីទៅឃុំនៅពន្ធនាគារចម្ងាយជាង ៣០០ គីឡូម៉ែត្រ មិនមែនជាការអនុញ្ញាតច្បាប់ទេ ប៉ុន្តែជាការអនុវត្តទៅតាមបទបញ្ជា ដោយសារតុលាការរាជធានីភ្នំពេញ ជាអ្នកកាត់ទោស។ ដូច្នេះ ត្រូវឃុំខ្លួននៅពន្ធនាគាររាជធានីភ្នំពេញ តែបែរជាសមត្ថកិច្ចបញ្ជូនកូនក្ដីទៅឃុំនៅខេត្តព្រះវិហារវិញ។
លោកបញ្ជាក់ថា ការបញ្ជូនទៅកូនក្ដីទៅឃុំនៅពន្ធនាគារឆ្ងាយ នឹងធ្វើឱ្យកញ្ញា សេង ធារី ឯកោ ធ្វើឱ្យសាច់ញាតិពិបាកផ្គត់ផ្គង់អាហារ និងពិបាកក្នុងការផ្ដល់ប្រឹក្សាផ្នែកច្បាប់ដល់កូនក្ដីផងដែរ។ លោកជូង ជូងី ចាត់ទុកការករណីនេះ ជាការបំពានសិទ្ធិ កញ្ញា សេង ធារី ដោយសារ កូនក្ដីរបស់លោកនៅតែជាមនុស្សស្អាតស្អំ កាលណាមិនទាន់សាលក្រមសា្ថពរពីតុលាការនោះ។
យ៉ាងណាក៏ដោយ នៅថ្ងៃសៅរ៍នេះ វីអូឌីមិនអាចសុំការបំភ្លឺពីអ្នកនាំពាក្យអគ្គនាយកនៃអគ្គនាយករដ្ឋានពន្ធនាគារ នៃក្រសួងមហាផ្ទៃ លោក នុត សវនា បានទេ។
កាលពីថ្ងៃសុក្រ មេធាវីការពារក្ដីឱ្យកញ្ញា សេង ធារី គឺ លោក ជូង ជូងឺ អះអាងថា មកទល់ពេលនេះ លោកនៅមិនទាន់បានចួបកូនក្ដីនៅឡើយទេ ព្រោះមន្ត្រីពន្ធនាគារបានរារាំងមិនឱ្យលោកចូលចួបកូនក្ដីទាំងមិនប្រាប់ហេតុផល ខណៈមេធាវីរូបនេះចាត់ទុកការរារាំងខាងលើថា ខុសពីច្បាប់កំណត់ ប៉ះពាល់សិទ្ធិការពារក្តី ក៏ដូចជារំលោភសិទ្ធិមានមេធាវីរបស់ជនត្រូវចោទ។
អ្នកនាំពាក្យអគ្គនាយកដ្ឋានពន្ធនាគារ លោក នុត សវនា ទទួលស្គាល់ថា មន្ត្រីពន្ធនាគារពិតជាមិនអនុញ្ញាតឱ្យមានការចូលចួបជនជាប់ឃុំឈ្មោះ សេង ធារី ប្រាកដមែន។ យ៉ាងណា លោកថា មូលហេតុមន្ត្រីពន្ធនាគារហាមមេធាវីមិនឱ្យចូលចួបកញ្ញា សេង ធារី ក្នុងពន្ធនាគារព្រៃស ដោយសារបញ្ហាសន្តិសុខ និងក្តាប់បានព័ត៌មានថា នឹងមានការត្រៀមធ្វើបាតុកម្មនៅមុខពន្ធនាគារ។
កញ្ញា សេង ធារី មេធាវីអាមេរិក ត្រូវបានសមត្ថកិច្ចកម្ពុជាចាប់បញ្ជូនខ្លួនទៅឃុំនៅពន្ធនាគារព្រៃស (ម២) ភ្លាមៗ កាលពីថ្ងៃទី១៤ ខែមិថុនា ឆ្នាំ២០២២ ក្រោយពីសាលាដំបូងរាជធានីភ្នំពេញចេញសាលក្រមផ្តន្ទាទោសគាត់ដាក់ពន្ធនាគារ៦ឆ្នាំ ចោទពីបទ «រួមគំនិតក្បត់ និងញុះញង់»។
ការចោទប្រកាន់នេះ តុលាការសម្អាងថា កញ្ញា សេង ធារី បានបង្ហោះសារលើបណ្ដាញសង្គមគាំទ្រគម្រោងធ្វើមាតុភូមិនិវត្តន៍របស់លោក សម រង្ស៊ី អតីតប្រធានគណបក្សប្រឆាំង កាលពីអំឡុងឆ្នាំ២០១៩។
ក្រោយតុលាការផ្ដន្ទាទោសកញ្ញា សេង ធារី និងអ្នកនយោបាយប្រឆាំង ប្រមាណ៦០ នាក់នោះ ស្ថានទូតអាល្លឺម៉ង់ប្រចាំកម្ពុជា ជំរុញរដ្ឋាភិបាលគោរពសេរីភាពបញ្ចេញមតិ និងការប្រមូលផ្ដុំ ខណៈស្ថានទូតអាមេរិកប្រចាំកម្ពុជា ចាត់ទុកសាលក្រមកាត់ទោសកញ្ញា សេង ធារី និងក្រុមបក្សប្រឆាំងផ្សេងទៀត ជារឿងអយុត្តិធម៌។ ស្ថានទូតបញ្ជាក់ថា សេរីភាពក្នុងការបញ្ចេញមតិ ការចងក្រងគ្នាជាក្រុម និងការអត់ឱនចំពោះទស្សនៈផ្ទុយ គឺជាផ្នែកដ៏សំខាន់បំផុតនៃលទ្ធិប្រជាធិបតេយ្យ។
ជាមួយគ្នានេះ សហរដ្ឋអាមេរិក ស្នើឱ្យអាជ្ញាធរកម្ពុជាដោះលែងកញ្ញា សេង ធារី ហើយនិងសកម្មជនសិទ្ធិមនុស្សដទៃទៀតពីសាលក្រមដ៏អយុត្តិធម៌នេះ ស្របពេលដែលអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា អះអាងថា ស្ថាប័នអន្តរជាតិមួយនេះកំពុងតាមដានយ៉ាងយកចិត្តទុកដាក់នូវការកាត់ទោសទ្រង់ទ្រាយធំនេះ ដើម្បីធានាការកាត់ក្ដីប្រព្រឹត្តទៅដោយយុត្តិធម៌និងស្របតាមច្បាប់សិទ្ធិមនុស្សអន្តរជាតិ៕