មន្ត្រីជាន់ខ្ពស់ក្រសួងបរិស្ថានអះអាងថា ក្រុមអ្នកអភិរក្សបន្តកិច្ចខិតខំប្រឹងប្រែងដើម្បីអភិរក្សសត្វត្មាតកម្ពុជាឱ្យបានគង់វង្សសម្រាប់មនុស្សជំនាន់ក្រោយ ស្របពេលក្រសួងរកឃើញថា រយៈពេលប្រមាណ ១០ឆ្នាំចុងក្រោយចំនួនសត្វត្មាត៣ប្រភេទនៅកម្ពុជាមានការធ្លាក់ចុះគួរឱ្យកត់សម្គាល់។
ក្នុងសេចក្តីប្រកាសរបស់ក្រសួងបរិស្ថាននៅលើទំព័រហ្វេសប៊ុករបស់ខ្លួនកាលពីថ្ងៃសុក្រ បានអះអាងថា ក្រុមការងារអភិរក្សសត្វកម្ពុជា បានចាប់ផ្តើមដំណើរការជំរឿនសត្វត្មាតប្រចាំឆ្នាំរបស់ខ្លួន ស្ថិតក្នុងក្របខណ្ឌនៃការធ្វើជំរឿនប្រចាំឆ្នាំចំនួន ៥ដង ដើម្បីតាមដានលើទិន្នន័យវត្តមានរបស់សត្វត្មាត និងការត្រៀមរៀបចំផែនការបន្តក្នុងការការពារ ថែរក្សានិងអភិរក្សប្រភេទសត្វស្លាបកម្រនេះ។
ក្រសួងបញ្ជាក់ថា ទីតាំងជំរឿនចំនួន ៤កន្លែងត្រូវបានបើកក្នុងពេលដំណាលគ្នានាកាលពីថ្ងៃសុក្រនោះ ទី១ដែនជម្រកសត្វព្រៃសម្បូណ៌ក្នុងខេត្តក្រចេះ ទី២ ដែនជម្រកសត្វព្រៃសៀមប៉ាងក្នុងខេត្តស្ទឹងត្រែង ទី៣ ដែនជម្រកសត្វព្រៃឆែប ក្នុងខេត្តព្រះវិហារ និងទី៤ ដែនជម្រកសត្វព្រៃស្រែពក នៅក្នុងខេត្តមណ្ឌលគិរី។
រដ្ឋលេខាធិការក្រសួងបរិស្ថាន លោក នេត្រ ភក្ត្រា បានលើកឡើងក្នុងសេចក្តីប្រកាសនោះថា ការធ្វើជំរឿនសត្វត្មាតប្រចាំឆ្នាំនេះ គឺដើម្បីដឹងពីការវិវត្តនៃចំនួនសត្វត្មាតនៅកម្ពុជាដើម្បីងាយស្រួលក្នុងការគ្រប់គ្រង និងដាក់ ចុះវិធានការផ្សេងៗក្នុងបំណងការពារឱ្យបាននូវប្រភេទសត្វដ៏កម្រនេះ។
លោកបានអះអាងថា ទិន្នន័យជំរឿនសត្វត្មាតកាលពីឆ្នាំ២០២១ កន្លងទៅបង្ហាញថា សត្វត្មាត ៣ប្រភេទដែលមាននៅកម្ពុជា រួមមាន ត្មាតភ្លើង ត្មាតត្នោត និងត្មាតកសផេះ មានវត្តមានសរុបចំនួន ១២១ ក្បាល នៅក្នុងអាហារដ្ឋានត្មាតចំនួន ៤ កន្លែងនៅតំបន់ការពារធម្មជាតិកម្ពុជាក្នុងនោះមានត្មាតភ្លើង ២០ ក្បាលត្មាតផេះ ៦៦ ក្បាល និងត្មាតត្នោត ៣៥ក្បាល។
ដោយឡែក លោកថា លទ្ធផលនៃការរាប់ចំនួនសត្វត្មាតដោយអាហារដ្ឋានត្មាត នៅដែនជម្រកសត្វព្រៃសម្បូណ៌នៃតំបន់ទេសភាពព្រៃលិចទឹកមេគង្គកាលពីឆ្នាំ២០២១ កន្លងទៅមានចំនួន ៤១ ក្បាល និងបានបង្ហាញថា ចំនួនសត្វត្មាតសរុបទាំង ៣ប្រភេទបញ្ចូលគ្នា បានកើនឡើងទ្វេដងសម្រាប់តំបន់នេះពោលគឺពីចំនួន ២០ ក្បាលដល់ចំនួន ៤១ ក្បាលសម្រាប់ចន្លោះចុងខែមិថុនា ដល់ចុងខែសីហាឆ្នាំ ២០២១ កន្លងទៅ។
រដ្ឋលេខាធិការក្រសួងបរិស្ថានរូបនេះបានលើកឡើងថា កម្ពុជា គឺជាក្តីសង្ឃឹមចុងក្រោយសម្រាប់ប្រភេទសត្វត្មាតទាំងនេះនៅក្នុងតំបន់អាស៊ី អាគ្នេយ៍ ប៉ុន្តែចំនួនសត្វត្មាតទាំងនេះបានធ្លាក់ចុះពាក់កណ្តាលក្នុងរយៈពេល ១០ឆ្នាំកន្លងមក។ ជាមួយគ្នានេះ លោកថា ដើម្បីការពារនិងអភិរក្សសត្វត្មាតឱ្យបានគង់វង្ស សកម្មភាពសិក្សាស្រាវជ្រាវ និងអភិរក្សសត្វត្មាតនៅប្រទេសកម្ពុជា បានចាប់ផ្តើមឡើងតាំងពីឆ្នាំ ២០០៤ ដែលនៅពេលនោះចំនួនសត្វត្មាតដែលបានកត់ត្រាពេលធ្វើជំរឿន មានចំនួន ១៦២ក្បាល ដែលជាទិន្នន័យជំរឿនលើកដំបូង។
រីឯទិន្នន័យធ្វើជំរឿនឆ្នាំ២០១០ ចំនួនសត្វត្មាតបានកើនដល់ ២៨៩ក្បាល។ ក៏ប៉ុន្តែចាប់ពីឆ្នាំ ២០១១ ដល់ ២០១៤ ចំនួនសត្វត្មាតមានការថយចុះគួរឱ្យបារម្ភ។ ជាមួយគ្នានេះ មន្ត្រីជាន់ខ្ពស់ក្រសួងបរិស្ថានដដែលបញ្ជាក់ថា ចាប់ពីពាក់កណ្តាល ឆ្នាំ២០១៤ រហូតដល់បច្ចុប្បន្ន ចំនួនសត្វត្មាតទាំង ៣ប្រភេទមានចន្លោះពី ១២០ ទៅ ១៤០ក្បាលប៉ុណ្ណោះ។ ដោយឡែក ចំនួនសម្បុកដែលបានរកឃើញ និងការពារក៏មានការធ្លាក់ចុះពី ២៧សម្បុក នៅក្នុងឆ្នាំ ២០១៥ មកសល់ត្រឹម ១៤សម្បុកក្នុងឆ្នាំ ២០២១។
ប្រភពដដែលបានស្រង់ប្រសាសន៍អ្នកគ្រប់គ្រងផ្នែកស្រាវជ្រាវ និងតាមដានជីវៈចម្រុះរបស់អង្គការ WWF លោក អៀម សំអ៊ន់ បានថ្លែងថា ជំរឿនសត្វត្មាតប្រចាំឆ្នាំគឺធ្វើឡើងចំនួន ៥ដង គឺក្នុងខែមីនា ខែមិថុនា ខែកញ្ញា និងខែធ្នូ។ សម្រាប់ ខែមិថុនាត្រូវធ្វើជំរឿន ២ដង ដើម្បីទទួលបានព័ត៌មានច្បាស់លាស់ដោយសារតែជារដូវពងកូន និងញាស់របស់សត្វត្មាតគឺនៅអំឡុងខែមេសា និងខែឧសភា។
លោក អៀម សំអ៊ន់ បានកត់សម្គាល់ថា នៅក្នុងរយៈពេលប៉ុន្មានឆ្នាំចុងក្រោយនេះ ចំនួនសត្វត្មាតមានចំនួនថេរ និងមិនទាន់មានសញ្ញានៃការកើនឡើងច្រើននៅឡើយ ហើយសកម្មភាពនៃការអភិរក្សសត្វត្មាតនេះត្រូវបន្តដើម្បីការពារប្រភេទសត្វស្លាបកម្រនេះឱ្យបាន។ លោកបន្តថា មានបញ្ហាប្រឈមជាច្រើនក្នុងការអភិរក្សសត្វត្មាត ក្នុងនោះកត្តាចំណីអាហារដែលបច្ចុប្បន្នមានការកាត់បន្ថយដោយសារតែចំនួនសត្វព្រៃ និងសត្វស្រុកដែលស្លាប់ក្នុងព្រៃកាន់តែថយ ដែលតម្រូវឱ្យក្រុមការងារអភិរក្សត្រូវផ្តល់ចំណីបន្ថែមជាប្រចាំខែ។
ក្រសួងបរិស្ថានឱ្យដឹងថា សត្វត្មាតទាំង ៣ប្រភេទនេះ សុទ្ធសឹងតែត្រូវបានចាត់ថ្នាក់ជាប្រភេទសត្វជិតផុតពូជបំផុតក្នុងបញ្ជីក្រហមនៃអង្គការ IUCN៕
