រដ្ឋាភិបាលឥណ្ឌាបានចុះអនុសារណៈយោគយល់គ្នាជាមួយរដ្ឋាភិបាលកម្ពុជា លើគម្រោង «ភូមិអស់មីន» នៅខេត្តកោះកុង នៅភូមិចំនួន៤ ក្នុងចំណោមភូមិចំនួន២៨ ដែលកំពុងរងការគំរាមកំហែងដោយសារមីន និងសំណល់ជាតិផ្ទុះពីសង្គ្រាម។
ពិធីចុះហត្ថលេខាលើអនុសារណៈយោគយល់គ្នា ស្តីពីគម្រោងភូមិអស់មីននៅខេត្តកោះកុងនេះ បានធ្វើឡើងនៅសណ្ឋាគារ Hyatt Regency រាជធានីភ្នំពេញ រវាងលោក ស៊ុយ ជីហ៊ាង អគ្គលេខាធិការអាជ្ញាធរមីនកម្ពុជា និងលោកស្រី Devyani Khobragade ឯកអគ្គរដ្ឋទូតវិសាមញ្ញ និងពេញសមត្ថភាពរបស់សាធារណរដ្ឋឥណ្ឌាប្រចាំនៅកម្ពុជា ក្រោមអធិបតីភាពអនុប្រធានទី១អាជ្ញាធរមីន លោក លី ធុជ និងលោក Rajkumar Ranja Singh រដ្ឋមន្ត្រីការបរទេសនៃសាធារណរដ្ឋឥណ្ឌា (Minister of State of External Affairs of Republic of India) នៅថ្ងៃទី២១ ខែមិថុនា ឆ្នាំ២០២២។ នេះបើតាមការផ្សព្វផ្សាយលើហ្វេសប៊ុករបស់អាជ្ញាធរមីនកម្ពុជា។
អនុប្រធានទី១ នៃអាជ្ញាធរមីនកម្ពុជា លោក លី ធុជ មានប្រសាសន៍ថា ការចុះអនុសារណៈលើគម្រោងនេះ ជាជំហានដ៏រឹងមាំ ដែលនាំឱ្យកម្ពុជាខិតទៅជិតគោលដៅនៃការក្លាយជាប្រទេសគ្មានមីនក្នុងឆ្នាំ២០២៥ និងបង្ហាញពីចំណងមិត្តភាពជាប្រវត្តិសាស្រ្តនិងប្រពៃណីដ៏យូរអង្វែង ក៏ដូចជាចំណងទំនាក់ទំនងការទូតរវាងប្រទេសទាំងពីរ។
លោកបន្តថា អាជ្ញាធរមីនកំពុងដំណើរការយន្តការ «ភូមិអស់មីន» និងកំពុងលុបបំបាត់ការគំរាមគំហែងទាំងអស់ក្នុងភូមិជាក់លាក់ ដែលមិនត្រឹមតែជួយសង្រ្គោះអាយុជីវិតប្រជាពលរដ្ឋប៉ុណ្ណោះទេ ហើយក៏ធ្វើឱ្យជីវភាពពលរដ្ឋក្នុងភូមិទាំងនោះ និងការអភិវឌ្ឍសេដ្ឋកិច្ចសង្គមកាន់តែប្រសើរឡើង។ លោកថា តាមរយៈអនុសារណៈនេះ សាធារណរដ្ឋឥណ្ឌានឹងជួយប្រែក្លាយភូមិចំនួន៤ ក្នុងចំណោមភូមិចំនួន២៨ ក្នុងខេត្តកោះកុង ដែលកំពុងរងការគំរាមគំហែងដោយសារមីន និងសំណល់ជាតិផ្ទុះពីសង្រ្គាម ទៅជាភូមិអស់មីន។
ចំណែកលោក Rajkumar Ranja Signh ត្រូវបានអាជ្ញាធរមីនស្រង់ប្រសាសន៍មកផ្សព្វផ្សាយដែរថា គម្រោងនេះធ្វើឱ្យភូមិចំនួន៤ក្នុងខេត្តកោះកុង ក្លាយជាភូមិអស់មីន ដែលនឹងផ្តល់អត្ថប្រយោជន៍ដោយផ្ទាល់ដល់ប្រជាពលរដ្ឋកម្ពុជាជិត៨ ០០០នាក់ ដែលកំពុងរស់នៅក្នុងភូមិទាំងនេះ ខណៈគម្រោងនេះក៏ជាផ្នែកមួយនៃទំនាក់ទំនងរវាងឥណ្ឌា-កម្ពុជា ក្រោមក្របខណ្ឌកិច្ចសហប្រតិបត្តិការមេគង្គ-គង្គា។
លោកបានបញ្ជាក់ថា៖ «ឥណ្ឌាកំពុងធ្វើការជាមួយអាជ្ញាធរមីន ដើម្បីកំណត់តំបន់បន្ថែមទៀតនៃកិច្ចសហប្រតិបត្តិការសកម្មភាពមីន និងរួមចំណែកដល់កិច្ចខិតខំរបស់កម្ពុជាឱ្យសម្រេចតាមគោលដៅ។ ហើយរដ្ឋាភិបាលឥណ្ឌាបានត្រៀមខ្លួនរួចជាស្រេច ក្នុងការជួយដល់ការងារសកម្មភាពមីននៅកម្ពុជា នៅគ្រប់កម្រិតនិងគ្រប់ពេលវេលា»។
លោក Rajkumar Ranja Signh ក៏បានលើកឡើងអំពីគម្រោងរបស់រដ្ឋាភិបាលឥណ្ឌាក្នុងការជួយសង្គ្រោះជនពិការដោយសារមីន និងសំណល់ជាតិផ្ទុះពីសង្គ្រាម តាមរយៈការផ្តល់នូវអវយវៈសិប្បនិម្មិត ដោយរៀបចំឱ្យមានតំបន់ចំនួនពីរក្នុងខេត្ត២នៃប្រទេសកម្ពុជា ក្រោមកិច្ចប្រតិបត្តិការជាមួយអាជ្ញាធរមីននៅចុងឆ្នាំនេះផងដែរ៕