សាលាដំបូងខេត្តកោះកុង បានបង្គាប់ឱ្យប្រជាពលរដ្ឋចំនួន៩គ្រួសាររុះរើខ្ទមដែលពួកគាត់លួចសង់ខុសច្បាប់រំលោភបំពានចូលដីរដ្ឋ ស្ថិតនៅឃុំទួលគគីរ ស្រុកមណ្ឌលសីមា ដោយដកហូតដីនោះមកធ្វើជាសម្បត្តិរដ្ឋវិញ។
អ្នកនាំពាក្យសាលាដំបូងខេត្តកោះកុង លោក វ៉ែន ភីរម្យ មានប្រសាសន៍នៅថ្ងៃព្រហស្បតិ៍នេះថា ប្រជាពលរដ្ឋទាំង៩គ្រួសារបានសង់ខ្ទមអនាធិបតេយ្យបំពានលើដីរដ្ឋដោយខុសច្បាប់ ហើយតំណាងអយ្យការបានសហការជាមួយមន្ត្រីជំនាញខេត្ត បង្គាប់ឱ្យពលរដ្ឋទាំងនោះរុះរើខ្ទមទាំងនោះវិញ និងដកហូតដីនោះទុកឱ្យរដ្ឋបាលខេត្តជាអ្នកគ្រប់គ្រង។
បើតាមអ្នកនាំពាក្យរូបនេះ អាជ្ញាធរពាក់ព័ន្ធធ្លាប់បានចុះបង្ក្រាបករណីសង់ខ្ទមខុសច្បាប់នៅលើដីរដ្ឋនៅតំបន់នោះចំនួន២លើករួចមកហើយ ក្នុងនោះក៏មានជនសង្ស័យ២នាក់ត្រូវបានចាប់បញ្ជូនខ្លួនទៅតុលាការ និងមនុស្សជាច្រើននាក់ផ្សេងៗបានរត់គេចខ្លួន។
លោក វ៉ែន ភីរម្យ អំពាវនាវទៅប្រជាពលរដ្ឋឈប់ទៅលួចបំពានយកដីរបស់រដ្ឋមកធ្វើជាកម្មសិទ្ធិខុសច្បាប់បែបនេះបន្តទៀត បើពុំដូច្នេះទេ ពួកគេនឹងប្រឈមមុខនឹងផ្លូវច្បាប់។
លោកមានប្រសាសន៍ថា៖ «ការបំពានដីរដ្ឋ គឺពួកគាត់នឹងប្រឈមមុខចំពោះមុខច្បាប់ហើយ ព្រោះគាត់អត់មានអង្គហេតុនៃការកាន់កាប់តាំងពីដើមមកទេ។ កាលណាគាត់ទៅទន្ទ្រានដីរដ្ឋ កាន់កាប់យកជាកម្មសិទ្ធិ ខុសច្បាប់ហើយ»។
ទោះជាយ៉ាងណា វីអូឌី មិនទាន់សុំការបញ្ជាក់ពីប្រជាពលរដ្ឋចំនួន៩គ្រួសារនោះបានទេ នៅព្រឹកថ្ងៃព្រហស្បតិ៍នេះ៕
