ក្រុមប្រឹក្សានាយកប្រតិបត្តិនៃធនាគារពិភពលោក (World Bank Group ឬWB) បានអនុម័តកញ្ចប់ថវិកាចំនួន២០លានដុល្លារអាមេរិក សម្រាប់ជួយដល់រដ្ឋសមាជិកនៃសមាគមប្រជាជាតិអាស៊ាន លើគម្រោង SEA-MaP ក្នុងការលុបបំបាត់ការបំពុលដោយកាកសំណល់ប្លាស្ទិកទៅក្នុងសមុទ្រនៃតំបន់របស់ខ្លួន។
សេចក្ដីប្រកាសព័ត៌មានរបស់ធនាគារពិភពលោក ចុះថ្ងៃទី២២ ខែមិថុនា ឆ្នាំ២០២២ បានលើកឡើងថា តាមរយៈកញ្ចប់ថវិកានេះ ធនាគារពិភពលោក នឹងសហការជាមួយអគ្គលេខាធិការដ្ឋានអាស៊ាន និងដៃគូនានា នៅកម្រិតតំបន់ និងនៅតាមប្រទេស ក្នុងការងារពង្រឹងគោលនយោបាយ និងក្របខណ្ឌបទប្បញ្ញត្តិដែលគ្រប់គ្រងសកម្មភាពផលិត និងការប្រើប្រាស់វត្ថុប្លាស្ទិកនៅក្នុងតំបន់អាស៊ីអាគ្នេយ៍។
ប្រភពដដែលបញ្ជាក់ថា៖ «គម្រោងនេះមានគោលដៅកាត់បន្ថយការប្រើប្រាស់ប្លាស្ទិក បង្កើនសកម្មភាពកែច្នៃឡើងវិញ និងទប់ស្កាត់ការបំពុលដីនិងក្នុងដែនសមុទ្រ តាមរយៈសកម្មភាពទុកដាក់សំរាមប្លាស្ទិកឱ្យបានត្រឹមត្រូវ។ គម្រោងនេះក៏នឹងជួយផងដែរដល់បណ្តាសកម្មភាពសេដ្ឋកិច្ច ពាក់ព័ន្ធឆ្នេរនិងដែនសមុទ្រដែលរងផលប៉ះពាល់អាក្រក់ខ្លាំងពីសំរាមក្នុងផ្ទៃសមុទ្រ ជាពិសេសវិស័យសំខាន់ៗមួយចំនួនមានដូចជា ផ្នែកនេសាទ ទេសចរណ៍ និងនាវាដឹកជញ្ជូនទំនិញ»។
អនុប្រធានធនាគារពិភពលោកប្រចាំតំបន់អាស៊ីបូព៌ា និងប៉ាស៊ិហ្វិក លោកស្រី ម៉ាអែនឡា ហ្វេរ៉ូ ត្រូវបានស្រង់ប្រសាសន៍ដាក់ក្នុងសេចក្តីប្រកាសព័ត៌មាននោះថា ការកាត់បន្ថយការបំពុលដោយប្លាស្ទិកនៅតាមដងទន្លេ និងមហាសមុទ្ររបស់ពិភពលោក ជារឿងចាំបាច់ដែលត្រូវធ្វើសកម្មភាពនៅកម្រិតប្រទេស និងកិច្ចខិតខំប្រឹងប្រែងរួម ជាមួយនឹងការសម្របសម្រួលគ្នាឱ្យបានល្អ។
លោកស្រីបន្តថា៖ «យើងរីករាយក្នុងការជួយរដ្ឋសមាជិកអាស៊ាន ក្នុងកិច្ចសហការគ្នា ដើម្បីកាត់បន្ថយការបំពុលដោយប្លាស្ទិកទៅក្នុងដែនទឹកទន្លេ និងសមុទ្រ ក៏ដូចជាក្នុងការស្វែងរកដំណោះស្រាយចំពោះឥទ្ធិពលអវិជ្ជមាន ដែលកាកសំណល់ប្លាស្ទិកអាចបង្កដល់សេដ្ឋកិច្ច បរិស្ថាន អាកាសធាតុ និងសុខភាពរបស់ប្រជាជន»។
អគ្គលេខាធិការនៃសមាគមអាស៊ាន លោក Dato Lim Jock Hoi បានលើកឡើងក្នុងសេចក្តីប្រកាសព័ត៌មាននោះដែរថា ដែនសមុទ្រ និងឆ្នេរសមុទ្រ មានសារៈសំខាន់ណាស់សម្រាប់ជីវិតនិងរបរចិញ្ចឹមជិវិតរបស់ប្រជាពលរដ្ឋ ក៏ប៉ុន្តែវាកំពុងតែរងសម្ពាធយ៉ាងខ្លាំង ជាពិសេសពីសំណាក់ការបំពុលដោយកាកសំណល់ប្លាស្ទិក ដែលអាចនាំឱ្យគ្រោះថ្នាក់ដល់សុខភាព និងជះឥទ្ធិពលអវិជ្ជមានទៅលើឧស្សាហកម្មទេសចរណ៍និងនេសាទ។
លោកបន្តថា៖ «គម្រោងថ្នាក់តំបន់មួយនេះជាសក្ខីកម្មបង្ហាញអំពីការតាំងចិត្ត និងការប្ដេជ្ញាចិត្តរបស់រដ្ឋសមាជិកអាស៊ាន ក្នុងការស្វែងរកដោយប្រតិសកម្មនូវដំណោះស្រាយចំពោះបញ្ហាឆ្លងដែនមួយនេះ ដើម្បីកែលម្អឱ្យប្រសើរឡើងវិញនូវសុខភាពរបស់ផ្ទៃដីដែនសមុទ្ររបស់យើង ដែលជាទីពឹងពាក់អាស្រ័យរបស់ប្រជាជនជាច្រើននៅក្នុងតំបន់អាស៊ានយើងនេះ»។
បើតាមសេចក្តីប្រកាសព័ត៌មានរបស់ធនាគារពិភពលោក បណ្តាប្រទេសសមាជិកអាស៊ាន មានទន្លេ និងដែនសមុទ្រ ច្រើនប្រើប្រាស់រួមគ្នា ព្រមទាំងបណ្តាញទីផ្សារសម្រាប់ធ្វើពាណិជ្ជកម្ម ផលិតផល និងសំណល់ប្លាស្ទិក ដែលចាំបាច់ត្រូវមានចំណាត់ការនៅថ្នាក់ជាតិនិងថ្នាក់តំបន់ តាមរយៈការសម្របសម្រួលសកម្មភាពគ្នា។
ប្រភពដដែលបន្តថា អាស៊ីអាគ្នេយ៍បានក្លាយជាចំណុចក្តៅមួយនៃការបំពុលដោយកាកសំណល់ប្លាស្ទិក ដោយសារតែការរីកលូតលាស់របស់ទីក្រុង និងការកើនឡើងនៃចំនួនមនុស្សវណ្ណៈកណ្ដាលយ៉ាងឆាប់រហ័ស។
បញ្ហាបំពុលដោយប្លាស្ទិកនេះ ធនាគារពិភពលោកថាបានបង្កឱ្យមានការខាតបង់ច្រើន ក្នុងនោះគ្រាន់តែនៅឆ្នាំ២០១៥ សកម្មភាពសេដ្ឋកិច្ចពាក់ព័ន្ធនឹងដែនសមុទ្រនៃបណ្តាប្រទេសសមាជិកអាស៊ាន ក្នុងនោះមានកម្ពុជាផងដែរ រងការខូចខាតគិតជាតម្លៃទឹកប្រាក់ប្រហែល២,១ប៊ីលានដុល្លារអាមេរិក។ លើសពីនេះ វដ្តជីវិតទាំងមូលរបស់ប្លាស្ទិក រាប់ទាំងសកម្មភាពផលិត និងការដឹកជញ្ជូនរបស់វា បានបំភាយឧស្ម័នកាបូនិចរាប់ប៊ីលានតោននៅក្នុងស្រទាប់បរិយាកាស៕
