ក្រសួងការងារ និងបណ្ដុះបណ្ដាលវិជ្ជាជីវៈ បានដាក់ចេញនូវកាលវិភាគចរចាប្រាក់ឈ្នួលអប្បបរមាសម្រាប់កម្មករ-កម្មការិនីផ្នែកវាយនភណ្ឌកាត់ដេរ ផលិតស្បែកជើង ផលិតផលធ្វើដំណើរ និងកាបូប សម្រាប់ឆ្នាំ២០២៣ ដោយគ្រោងប្រជុំជាដំណាក់កាលៗចាប់ពីខែកក្កដា ដល់ខែកញ្ញា ឆ្នាំនេះ។
សេចក្តីជូនដំណឹងរបស់ក្រសួងការងារ និងបណ្ដុះបណ្ដាលវិជ្ជាជីវៈ ចុះថ្ងៃទី២៣ ខែមិថុនា ឆ្នាំ២០២២ បានលើកឡើងថា កាលវិភាគនៃការចរចាប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរនិងកាបូប សម្រាប់ឆ្នាំ២០២៣ ធ្វើឡើងដោយយោងតាមច្បាប់ស្តីពីប្រាក់ឈ្នួលអប្បបរមា ដែលប្រកាសឱ្យប្រើប្រាស់កាលពីថ្ងៃទី០៦ ខែកក្កដា ឆ្នាំ២០១៨។
ក្រសួងបន្តថា ការពិភាក្សាប្រាក់ឈ្នួលអប្បបរមាសម្រាប់ឆ្នាំ២០២៣ ត្រូវអនុវត្តតាមប្រតិទិន គឺខែកក្កដា ឆ្នាំ២០២២ ជាការចាប់ផ្តើមពិភាក្សាជាលក្ខណៈផ្ទៃក្នុងរបស់ភាគីនីមួយៗ, ខែសីហា ឆ្នាំ២០២២ ជាការចាប់ផ្ដើមពិភាក្សាជាលក្ខណៈទ្វេភាគី និងត្រីភាគី ខណៈខែកញ្ញា ឆ្នាំ២០២២ បើកកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា ដើម្បីសម្រេចប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប សម្រាប់ឆ្នាំ២០២៣។
ក្រសួងបញ្ជាក់ថា៖ «ថ្ងៃទី១ ខែមករា ឆ្នាំ២០២៣ ជាកាលបរិច្ឆេទចូលជាធរមានប្រាក់ឈ្នួលអប្បបរមា»។
យ៉ាងណា ក្រសួងការងារបានណែនាំឱ្យគ្រប់ភាគីទាំងអស់ត្រូវប្រើប្រាស់ទិន្នន័យផ្លូវការស្របច្បាប់ និងការស្រាវជ្រាវបែបវិទ្យាសាស្ត្រ ដោយយោងលើលក្ខណៈវិនិច្ឆយបែបសង្គម ដូចជា ស្ថានភាពគ្រួសារ អត្រាអតិផរណា និងការចំណាយក្នុងការរស់នៅ ព្រមទាំងលក្ខណៈវិនិច្ឆយបែបសេដ្ឋកិច្ច ដូចជា ផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ ដូចមានកំណត់ក្នុងមាត្រា៥ នៃច្បាប់ស្តីពីប្រាក់ឈ្នួលអប្បបរមា ដើម្បីធ្វើជាមូលដ្ឋានក្នុងការពិភាក្សា សម្របសម្រួលផ្ទៃក្នុង និងទទួលបានគោលជំហររួមមួយ។
ប្រធានសហភាពការងារកម្ពុជា លោក អាត់ ធន់ មានប្រសាសន៍នៅថ្ងៃសុក្រនេះថា សហជីពឯកភាពក្នុងការចូលរួមកិច្ចប្រជុំចរចាប្រាក់ឈ្នួលអប្បបរមារបស់កម្មករ តាមការកំណត់របស់ក្រសួង ខណៈកិច្ចប្រជុំនេះត្រូវបានកំណត់ឱ្យរៀបចំជារៀងរាល់ឆ្នាំ ដោយយោងលើកិច្ចព្រមព្រៀង គោលការណ៍ លក្ខខណ្ឌ និងច្បាប់ក្នុងវិស័យកាត់ដេរ រវាងសហជីព និង GMAC។
ទោះជាបែបនេះក្តី លោករំពឹងថា ប្រាក់ឈ្នួលអប្បបរមារបស់កម្មករនាឆ្នាំ២០២៣ អាចនឹងមានការកើនឡើង ដោយសារស្ថានភាពវិស័យកាត់ដេរមានការរីកចម្រើន ក្រោយងើបពីវិបត្តិកូវីដ-១៩។
លោកថា៖ «សហជីពនឹងសហការជាមួយអង្គការពាក់ព័ន្ធ និងក្រុមសហជីពដទៃទៀត ដើម្បីរៀបចំជាសំណើររួម។ ឥលូវកំពុងធ្វើការងារហ្នឹងហើយ ហើយនឹងត្រៀម ដើម្បីធ្វើការចរចានៅថ្ងៃខាងមុខ។ ប៉ុន្តែឥលូវនេះ គឺយើងត្រូវប្រជុំក្នុងចំណោមភាគីសហជីពសិន ហើយយើងពិនិត្យមើលការស្រាវជ្រាវរបស់យើង និងយើងត្រៀមធ្វើសំណើផ្លូវការ ដែលយើងនឹងធ្វើទៅតាមគោលការណ៍ដែលបានកំណត់ដោយមានលក្ខណៈវិនិច្ឆយ»។
កម្មករធ្វើការនៅរោងចក្រដេរស្បែកជើងមួយ នៅរាជធានីភ្នំពេញ អ្នកស្រី វ៉ិត ដាវីន និយាយថា អ្នកស្រីចង់ឃើញក្រសួងការងារ តំណាងសហជីព និងស្ថាប័នពាក់ព័ន្ធ ជជែកជាមួយថៅកែរោងចក្រ ធ្វើយ៉ាងណាឱ្យមានការដំឡើងប្រាក់ខែអប្បបរមាឱ្យបានសមរម្យដល់កម្មករ។
ស្ត្រីវ័យ២៦ឆ្នាំរូបនេះបន្តថា ដរាបណាប្រាក់ខែកម្មករអប្បបរមាមិនដល់២០០ដុល្លារអាមេរិក នោះពួកគាត់នៅតែរស់នៅក្នុងជីវភាពលំបាក ពីព្រោះពុំអាចបែងចែកលុយកាក់ចំណាយលើការហូបចុក និងផ្គត់ផ្គង់ជីវភាពបានសមរម្យទេ ជាពិសេសកម្មករដែលធ្វើការនៅរាជធានីភ្នំពេញ ហើយជួលផ្ទះស្នាក់នៅ។
អ្នកស្រីថា៖ «ម្ហូបអាហារធ្លាប់រាល់ដង ដូចជា ១ម៉ឺន[រៀល] យើងអាចទិញអីហូបបាន តែឥលូវឡើងដូចថា ១ម៉ឺនទៅជា២ម៉ឺនរៀលអ៊ីចឹង។ ផ្ទះជួលអីឡើងថ្លៃ ដូចថា ១ឆ្នាំឡើងតាម១ឆ្នាំអ៊ីចឹងទៅ។ ហើយអ៊ីចឹងវាពិបាក ចំណូលយើងបានតិច ចំណាយយើងរាងក្រែល។ [បើមានការដំឡើងប្រាក់ខែ តើនឹងជួយអីដល់កម្មករខ្លះ?] បើគេដំឡើងប្រាក់ខែឱ្យ ទី១ យើងបានផ្ញើទៅគ្រួសារ ផ្គត់ផ្គត់ជីវភាពយើងរាងគ្រាន់អ៊ីចឹងណា ណាមួយទោះវា[ថ្លៃទំនិញ]ឡើងមក ហើយយើងចំណាយអីទៅ ក៏វារាងគ្រាន់ជាងមុនអ៊ីចឹងណា»។
គួរបញ្ជាក់ថា ប្រាក់ឈ្នួលអប្បបរមាសម្រាប់កម្មករវិស័យវាយនភណ្ឌកាត់ដេរ ផលិតស្បែកជើង និងសម្ភារធ្វើដំណើរ នៅឆ្នាំ២០២២នេះ មិនមានការដំឡើងឱ្យពីភាគីនិយោជកនោះទេ គឺរក្សាទុកត្រឹម ១៩២ដុល្លារ ដូចឆ្នាំ២០២១ដែរ ប៉ុន្តែលោកនាយករដ្ឋមន្ត្រី ហ៊ុន សែន បានបន្ថែម២ដុល្លារ ដែលធ្វើឱ្យប្រាក់ឈ្នួលកម្មករឆ្នាំ២០២២ កើនដល់១៩៤ដុល្លារ៕