រដ្ឋមន្ត្រីក្រសួងការបរទេសកម្ពុជា និងជាប្រេសិតពិសេសរបស់ប្រធានអាស៊ានស្ដីពីមីយ៉ាន់ម៉ា ស្នើយ៉ាងទទូចឱ្យក្រុមប្រឹក្សារដ្ឋបាលរដ្ឋនៃសហភាពមីយ៉ាន់ម៉ាសម្របសម្រួលក្នុងការបញ្ជូនលោកស្រី អោងសាន ស៊ូជី ត្រលប់ទៅលំនៅឋានវិញ បន្ទាប់ពីរបបយោធាបានផ្ទេរលោកស្រីពីលំនៅឋានទៅកាន់ពន្ធនាគារក្នុងទីក្រុងណៃពិដោ។
សេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ចុះថ្ងៃទី២៧ ខែមិថុនា ឆ្នាំ២០២២នេះ បានឱ្យដឹងថា ក្នុងលិខិតផ្ញើជូនលោក Wunna Maung Lwin រដ្ឋមន្ត្រីការបរទេសនៃសាធារណរដ្ឋសហភាពមីយ៉ាន់ម៉ា ក្នុងពេលថ្មីៗនេះ លោក ប្រាក់ សុខន រដ្ឋមន្ត្រីការបរទេសកម្ពុជា និងជាប្រេសិតពិសេសរបស់ប្រធានអាស៊ាន បានលើកឡើងពីកង្វល់របស់សហសេវិកអាស៊ាន ចំពោះការផ្ទេរលោកស្រី អោងសាន ស៊ូជី ពីលំនៅឋានទៅកាន់ពន្ធនាគារក្នុងទីក្រុងណៃពិដោ។
ករណីនេះ ក្រសួងថា សហសេវិកអាស៊ានទទូចឱ្យក្រុមប្រឹក្សារដ្ឋបាលរដ្ឋនៃសហភាពមីយ៉ាន់ម៉ា សម្របសម្រួលដល់ការបញ្ជូនលោកស្រី អោងសាន ស៊ូជី ត្រលប់ទៅលំនៅឋានដែលជាទីតាំងលោកស្រីត្រូវបានឃុំខ្លួនពីដំបូងវិញ ដោយសារសុខភាពរបស់លោកស្រីមានភាពទ្រុឌទ្រោម ក៏ដូចជាការអនុវត្តនីតិរដ្ឋប្រកបដោយយុត្តិធម៌និងសុភវិនិច្ឆយ។
លោក ប្រាក់ សុខុន បានលើកឡើងក្នុងលិខិតនោះថា៖ «ខ្ញុំមិនមានមន្ទិលសង្ស័យទេថា ក្ដីបារម្ភដូចគ្នានេះកើតឡើងហួសពីក្នុងរង្វង់អាស៊ាន ដោយហេតុថា លោកស្រី អោងសាន ស៊ូជី ត្រូវបានចាត់ទុកក្នុងរង្វង់អន្តរជាតិ និងដោយប្រជាជនជាច្រើននៅមីយ៉ាន់ម៉ាថាមានតួនាទីដ៏សំខាន់ក្នុងការវិលត្រលប់ទៅរកប្រក្រតីភាព និងការផ្សះផ្សាជាតិឡើងវិញនៅក្នុងប្រទេសមីយ៉ាន់ម៉ា តាមរយៈដំណោះស្រាយនយោបាយដោយសន្តិវិធីមួយ»។
ប្រេសិតពិសេសរបស់ប្រធានអាស៊ាន លើកឡើងបន្តទៀតថា៖ «យើងទាំងអស់គ្នា [សហសេវិកអាស៊ាន] មានទស្សនៈដូចគ្នាថា ការផ្សះផ្សាជាតិដោយសន្តិវិធីមិនអាចកើតឡើងបានឡើយ នៅពេលដែលភាគីមួយនៃជម្លោះមិនត្រូវបានបញ្ជូនទៅក្នុងសមីការដំណោះស្រាយ […] អាស្រ័យហេតុនេះ សហសេវិកអាស៊ានទាំងអស់ជំរុញយ៉ាងខ្លាំងឱ្យក្រុមប្រឹក្សារដ្ឋបាលរដ្ឋរបស់មីយ៉ាន់ម៉ា ចាប់ផ្តើមដំណើរការប្រកបដោយបរិយាបន្ននៃការផ្សះផ្សាជាតិ ដោយមិនមានការពន្យារពេលបន្ថែមទៀតនោះឡើយ»។
លោក ប្រាក់ សុខុន បានគូសបញ្ជាក់ថា ដំណោះស្រាយនយោបាយដោយសន្តិវិធីចំពោះជម្លោះមួយ ទោះបីមានភាពស្មុគស្មាញយ៉ាងណាក៏ដោយ ត្រូវតែមានការចែករំលែកលំហនយោបាយដោយភាគីពាក់ព័ន្ធទាំងអស់។
អ្នកនាំពាក្យរបបយោធាមីយ៉ាន់ម៉ាមួយរូបបានឱ្យដឹងកាលពីថ្ងៃទី២៤ ខែមិថុនា ថាអាជ្ញាធរបានផ្ទេរអតីតមេដឹកនាំដែលត្រូវបានទម្លាក់ពីតំណែង លោកស្រី អោងសាន ស៊ូជី ទៅកាន់ពន្ធនាគារក្នុងរដ្ឋធានីហើយ។
ទីភ្នាក់ងារសារព័ត៌មាន Reuters បានស្រង់សម្តីអ្នកនាំពាក្យរបបយោធាមីយ៉ាន់ម៉ា លោក Zaw Min Tun មកចុះផ្សាយកាលពីថ្ងៃទី២៤ ខែមិថុនាថ្មីៗនេះថា ម្ចាស់ពានរង្វាន់ណូបែលសន្តិភាព លោកស្រី អោងសាន ស៊ូជី ត្រូវបានបញ្ជូនទៅកាន់ពន្ធនាគារក្នុងទីក្រុងណៃពិដោ (Naypyitaw) កាលពីថ្ងៃពុធ ទី២២ ខែមិថុនា ឆ្នាំ២០២២ កន្លងទៅ បន្ទាប់ពីតុលាការចេញសេចក្តីសម្រេច។
អ្នកនាំពាក្យរូបនេះបន្តឱ្យដឹងក្នុងសេចក្តីថ្លែងការណ៍មួយថា៖ «លោកស្រី [អោងសាន ស៊ូជី] ត្រូវបានផ្ទេរទៅកាន់ពន្ធនាគារហើយ ដែលបច្ចុប្បន្នកំពុងតែដាក់ឱ្យនៅក្នុងការឃុំឃាំងតែម្នាក់ឯង»។
លោកស្រី អោងសាន ស៊ូជី ត្រូវបានតុលាការចោទប្រកាន់ពីបទប្រព្រឹត្តបទល្មើសប្រមាណ២០ករណី ដែលក្នុងនោះរួមមាន ការនាំចូលអាយកូមដោយខុសច្បាប់, បទរំលោភវិធានការទប់ស្កាត់វិបត្តិកូវីដ-១៩, បទទទួលសំណូក រំលោភការសម្ងាត់រដ្ឋ, បទចោទទាក់ទងនឹងការក្លែងបន្លំការបោះឆ្នោត និងបទចោទធ្ងន់ធ្ងរមួយចំនួនទៀត ដែលអាចនឹងជាប់ពន្ធនាគារសរុបប្រមាណ១៩០ឆ្នាំ បើតុលាការកឃើញថា លោកស្រីមានកំហុសក្នុងសំណុំរឿងទាំងនេះ។
ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងកាលពីថ្ងៃទី១ ខែកុម្ភៈ ឆ្នាំមុន និងបានផ្ដួលរំលំរដ្ឋាភិបាលជាប់ឆ្នោតរបស់លោកស្រី អោងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះជនស៊ីវិលរាប់ពាន់នាក់ក៏ត្រូវបានសម្លាប់នៅក្នុងការបង្ក្រាបកូដកម្មនិងបាតុកម្មនានាផងដែរ៕