គណបក្សប្រជាជនកម្ពុជាដែលកំពុងបន្តគ្រប់គ្រងអំណាច បានប្ដេជ្ញាជាថ្មីទៀត ក្រោយគណបក្សមួយនេះទទួលបានសំឡេងគាំទ្រតាមរយៈការបោះឆ្នោតជ្រើសរើសក្រុមប្រឹក្សាឃុំ-សង្កាត់ សម្រាប់នីតិកាលទី៥ កន្លងទៅថ្មីៗនេះ ដោយថា ជួយជនក្រីក្រនិងជនដែលងាយរងគ្រោះតាមកម្មវិធីនយោបាយរបស់ខ្លួន ដោយគ្មានការរើសអើងនិន្នការនយោបាយ ឬប្រកាន់បក្ខពួកនិយមណាមួយនោះទេ។
ផ្តល់បទសម្ភាសន៍ផ្តាច់មុខជាមួយ វីអូឌី នៅព្រឹកថ្ងៃចន្ទនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន ឱ្យដឹងថា គណបក្សកាន់អំណាច គឺជាម្លប់សម្រាប់ពលរដ្ឋខ្មែរទូទៅ មិនប្រកាន់គោលការណ៍លាបពណ៌ និងរើសអើងខាងនយោបាយឡើយ។ លោកបន្តថា ដើម្បីបន្តការងារខាងមនុស្សធម៌ រដ្ឋាភិបាលដែលដឹកនាំដោយគណបក្សប្រជាជនកម្ពុជា នឹងនៅតែបន្តផ្ដល់សាច់ប្រាក់សម្រាប់គ្រួសារដែលក្រីក្រនិងងាយរងគ្រោះ តាមរយៈបណ្ណសមធម៌សង្គម ឬបណ្ណក្រីក្រ។
លោកបន្តថា៖ «ខ្ញុំយល់ថា រាជរដ្ឋាភិបាលនៅតែបន្ត ពីព្រោះបញ្ហាដែលកើតឡើងចំពោះប្រជាជនយើងនៅមានជាសំណូមពរសម្រាប់ការដោះស្រាយជូនបងប្អូនប្រជាពលរដ្ឋ។ ការដោះស្រាយរបស់រាជរដ្ឋាភិបាលនេះ យើងដឹងហើយថា គឺជារាជរដ្ឋាភិបាលនៃព្រះរាជាណាចក្រកម្ពុជា។ វាមិនមែនជារាជរដ្ឋាភិបាលតែរបស់គណបក្សប្រជាជនកម្ពុជាតែមួយទេ។ អ៊ីចឹងគឺថារាជរដ្ឋាភិបាលលោកដឹកនាំប្រជាជនទូទាំងប្រទេស»។
នៅចំថ្ងៃដែលគណៈកម្មាធិការជាតិរៀបចំការបោះឆ្នោត ប្រកាសលទ្ធផលឆ្នោតនៃការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ជាផ្លូវការ គណបក្សគ្រប់គ្រងអំណាចក៏បានចេញសេចក្ដីប្រកាសព័ត៌មានបញ្ជាក់ជំហរក្នុងការទទួលយកលទ្ធផលឆ្នោតដែលចេញដោយ គ.ជ.ប នៅពេលនេះ។
ស្របពេលដែលគណបក្សកាន់អំណាចសាទរចំពោះលទ្ធផលដែលខ្លួនទទួលបានពីការបោះឆ្នោតកាលពីថ្ងៃទី៥ ខែមិថុនា ថ្មីៗនេះ ក្នុងសេចក្ដីថ្លែងការណ៍របស់ខ្លួនដែលចេញនៅថ្ងៃទី២៦ ខែមិថុនា គណបក្សចាស់វស្សាមួយនេះក៏បន្តប្តេជ្ញាជាថ្មីទៀតថា នឹងនៅតែគាំទ្រឱ្យមានយន្តការកិច្ចគាំពារសង្គម សម្រាប់ជនក្រីក្រ និងជនដែលងាយរងគ្រោះ ក្នុងចំណោមការប្តេជ្ញាចិត្តទៅលើកម្មវិធីនយោបាយផ្សេងៗដែលគណបក្សប្រជាជនកម្ពុជាបានសន្យាជាមួយពលរដ្ឋ អំឡុងពេលរកសំឡេងគាំទ្រក្នុងថ្ងៃបោះឆ្នោត។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បដិសេធនៅថ្ងៃចន្ទនេះថា មកដល់ពេលនេះ ខាងស្ថាប័នជំនាញរបស់រដ្ឋក្ដាប់ទិន្នន័យមិនទាន់បានអំពីទំហំសាច់ប្រាក់ និងចំនួនប្រជាពលរដ្ឋដែលទទួលបានសេវាគាំពារសង្គមពីរដ្ឋាភិបាលនេះទេ។
ដោយឡែក អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា លោក តូច ចាន់នី ឱ្យដឹងថា ក្នុងរយៈពេល២ឆ្នាំមកនេះ គិតចាប់ពីថ្ងៃទី២៤ ខែមិថុនា ឆ្នាំ២០២០ រដ្ឋាភិបាលបានផ្តល់សាច់ប្រាក់ឧបត្ថម្ភសម្រាប់ជនក្រីក្រ និងជនងាយរងគ្រោះ ប្រមាណ៧រយលានដុល្លារអាមេរិក។ ក្នុងរយៈពេលនេះ មានមនុស្សចំនួន៧៤ម៉ឺនគ្រួសារ ឬស្មើប្រមាណ៣លាននាក់មកហើយបានទទួលគោលការណ៍នេះពីរដ្ឋាភិបាល។
បើទោះជាអ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងការពារនៅថ្ងៃចន្ទនេះថា រដ្ឋាភិបាលមិនដែលបានរើសអើងឬប្រកាន់និន្នាការនយោបាយបែបណាក្តី គេសង្កេតឃើញថា នៅអំឡុងពេលបោះឆ្នោតជ្រើសរើសក្រុមប្រឹក្សាឃុំសង្កាត់កន្លងមកនេះ មានមន្រ្តីរាជការស៊ីវិល និងពលរដ្ឋមួយចំនួន ក្រោយរកឃើញថាពួកគេគាំទ្រគណបក្សភ្លើងទៀន ត្រូវបានដកបណ្ណក្រីក្រ និងមានអ្នកខ្លះទៀតត្រូវបានបណ្តេញចេញពីក្របខណ្ឌរដ្ឋជាដើម។
កាលពីថ្ងៃទី២១ ខែមិថុនា លោក អេង ស្រួយ ប្រធានក្រុមការងារបណ្ដោះអាសន្ន គណបក្សភ្លើងទៀន ខេត្តត្បូងឃ្មុំ ត្រូវបានលុបឈ្មោះចេញពីក្របខណ្ឌចេញពីគ្រូនគរបាលជាតិ។ ក្នុងថ្ងៃតែមួយនោះ លោក កែវ សុមុនី ឈរជាបេក្ខជនចៅសង្កាត់ច្បារអំពៅទី១ ហើយលោកក៏បានជាប់ជាចៅសង្កាត់រងទី២ នៃគណបក្សភ្លើងទៀន ត្រូវបានលុបឈ្មោះចេញពីក្របខណ្ឌនៃក្រសួងសុខាភិបាល។
ចំណែកពលរដ្ឋនៅខេត្តត្បូងឃ្មុំ និងខេត្តកំពង់ចាម ត្រូវបានអាជ្ញាធរដកបណ្ណក្រីក្រ ដោយរកឃើញថា ពួកគេគាំទ្រសកម្មភាពគណបក្សភ្លើងទៀន នៅអំឡុងពេលយុទ្ធនាការបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០២២។
យ៉ាងនេះក្តី អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ឃើញថា តាមពិតទៅ ការខុសឆ្គងនេះមិនមែនមានតែគណបក្សក្រៅរដ្ឋាភិបាលទេ មានមនុស្សមិនតិចនាក់ឡើយពីខាងគណបក្សកាន់អំណាចក៏បានប្រព្រឹត្តកំហុសដូចគ្នានេះដែរ។
លោកបន្តថា ការធ្វើឱ្យមានកំហុសនេះ មូលហេតុសំខាន់ គឺម្នាក់ៗមិនយល់ពីច្បាប់ ហើយការដោះស្រាយរបស់រដ្ឋាភិបាល គឺឈរលើទិដ្ឋភាពនៃច្បាប់ មិនរើសអើងបក្ខពួកនិយមម្តងណានោះទេ។ បើតាមលោក សុខ ឥសាន អ្វីដែលរិះគន់ថា រដ្ឋាភិបាលសម្រេចចិត្តដោយលម្អៀងនេះ ច្រើនតែពីខាងក្រុមប្រឆាំង។
លោកបន្តថា៖ «ខ្ញុំយល់ពីបញ្ហាដែលប្អូនចោទឡើងនេះហើយ។ នេះជាបញ្ហាមួយដែលបងប្អូនដែលមាននិន្នាការប្រឆាំង ច្រើនតែលើកបញ្ហាហ្នឹងឡើង។ ប៉ុន្តែយើងត្រូវយល់ថា តើការដោះស្រាយទៅតាមគោលការណ៍ច្បាប់ហ្នឹង គឺថាអត់មានពាក់ព័ន្ធអីជាមួយនឹងនិន្នាការនយោបាយទេ ពីព្រោះចោរលួច ចោរប្លន់។ ទោះបីគណបក្សប្រជាជនធ្វើខុស ទៅលួចទៅប្លន់គេ ឬមួយទៅជួញដូរគ្រឿងញៀន ក៏នៅតែជាប់ទោសដូចគ្នា។ យើងដឹងហើយថា អ្នកជាប់ពន្ធនាគាររាល់ថ្ងៃនេះ ក្នុងចំណោមមួយម៉ឺនពីរម៉ឺននាក់ដែលពាក់ព័ន្ធនឹងគ្រឿងញៀនហ្នឹង មិនមែនសុទ្ធតែគណបក្សប្រឆាំងទេ ភាគច្រើនគឺចេញពីគណបក្សប្រជាជនហ្នឹងដែរ»។
វីអូឌី មិនអាចទាក់ទងសុំការបំភ្លឺបានទេជុំវិញការលើកឡើងនេះពីលោក ថាច់ សេដ្ឋា អនុប្រធានគណបក្សភ្លើងទៀន នៅថ្ងៃចន្ទនេះ។
សម្រាប់លោក សេក សុជាតិ នាយកប្រតិបត្តិនៃអង្គការអភិវឌ្ឍន៍ផ្នត់គំនិត សាទរចំពោះការប្តេជ្ញាចិត្តជាថ្មីទៀតនៅពេលនេះរបស់រដ្ឋាភិបាលដែលដឹកនាំដោយគណបក្សប្រជាជនកម្ពុជា។ បើទោះបែបណា លោកនៅតែទទូចឱ្យគណបក្សនយោបាយដែលទទួលខុសត្រូវរឿងនេះ អនុវត្តការងារដោយឈរលើគោលការណ៍អព្យាក្រឹត្យនិងតម្លាភាព ព្រោះថា កន្លងទៅ កម្ពុជាធ្លាប់មានពិសោធន៍រួចមកហើយអំពីការរើសអើងនេះ។
លោកបន្តថា៖ «ខ្ញុំមានសំណូមពរវិញថា បើសិនជាមានការប្តេជ្ញាចិត្ត និងការតាំងចិត្តហើយ សូមមេត្តារៀបចំឱ្យមានតម្លាភាព និងមានយុត្តិធម៌ ហើយកុំឱ្យមានការរើសអើង ពីព្រោះបទពិសោធន៍នាពេលកន្លងមកបង្ហាញអំពីរបៀបការធ្វើការសម្រេចចិត្តមួយដែលខ្វះការទទួលខុសត្រូវ។ ហើយយើងឃើញថា បញ្ហានោះវាបានក្លាយទៅជាប្រធានបទមួយធ្វើឱ្យភាគីផ្សេងៗទៀតវាយតម្លៃទៅលើការតាំងចិត្ត ឬការសម្រេចចិត្តការការពារទៅលើបញ្ហាទាំងអស់ហ្នឹង ប៉ុន្តែលទ្ធផល វាមិនឆ្លើយតបជាវិជ្ជមាន»។
លោក សេក សុជាតិ រំពឹងទុកថា ការប្តេជ្ញាចិត្តរបស់គណបក្សប្រជាជនកម្ពុជា នៅពេលនេះ នឹងមិនក្លាយជាកម្មវត្ថុនៃការវាយប្រហារពីភាគីពាក់ព័ន្ធដទៃទៀត អំពីការអនុវត្តគោលនយោបាយរបស់ខ្លួន ក្រោយឈ្នះការបោះឆ្នោតក្នុងកម្រិតឃុំ-សង្កាត់កន្លងទៅនេះ៕
