ប្រធានាធិបតីឥណ្ឌូណេស៊ី លោក Joko Widodo បានឱ្យដឹងនៅថ្ងៃអាទិត្យម្សិលមិញថា រូបលោកគ្រោងនឹងជំរុញដល់សមភាគីរុស្ស៊ី និងអ៊ុយក្រែន ឱ្យពិចារណាចូលតុចរចាស្វែងរកដំណោះស្រាយរួមគ្នា និងស្នើឱ្យប្រធានាធិបតី លោក វ្លាឌីមៀរ ពូទីន បញ្ជាឱ្យមានការឈប់បាញ់ជាបន្ទាន់ ក្នុងអំឡុងពេលដែលលោកបំពេញបេសកកម្មកសាងសន្តិភាពទៅកាន់ប្រទេសទាំងពីរក្នុងសប្ដាហ៍នេះ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងមុនពេលចាកចេញទៅកាន់ប្រទេសអាល្លឺម៉ង់ ដើម្បីចូលរួមកិច្ចប្រជុំកំពូល G7 ដែលធ្វើឡើងនៅថ្ងៃចន្ទនេះ ប្រធានាធិបតីឥណ្ឌូណេស៊ី ថ្លែងថា៖ «សង្រ្គាមគួរតែត្រូវបញ្ឈប់ ហើយខ្សែចង្វាក់ផ្គត់ផ្គង់អាហារសកលត្រូវតែដំណើរការឡើងវិញ»។
ជាមួយគ្នានេះ លោក Joko Widodo បន្ថែមថា រូបលោកក៏នឹងជំរុញលើកទឹកចិត្តដល់ប្រទេសមានសេដ្ឋកិច្ចជឿនលឿនទាំង៧ (G7) ឱ្យស្វែងរកដំណោះស្រាយសន្តិភាពនៅអ៊ុយក្រែន បន្ទាប់ពីប្រទេសមួយនេះរងនូវការលុកលុយដោយរុស្ស៊ី ជាពិសេសស្វែងរកដំណោះស្រាយចំពោះវិបត្តិស្បៀងអាហារ និងថាមពលពិភពលោកផងដែរ។
គួរបញ្ជាក់ថា ការឈ្លានពានរបស់រុស្ស៊ីលើអ៊ុយក្រែន គិតរហូតមកដល់ពេលនេះ បានឈានចូលមកដល់សប្តាហ៍ទី១៧ហើយ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ក៏បានភៀសខ្លួនចេញពីប្រទេសផងដែរ។
ទោះជាយ៉ាងណា រុស្ស៊ីធ្លាប់បានលើកឡើងកាលពីពេលកន្លងទៅថា សកម្មភាពរបស់ខ្លួននេះគឺជាការអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះ ត្រូវបានបណ្ដាប្រទេសមួយចំនួនចាត់ទុកថាជាការលើកឡើងដោយគ្មានមូលដ្ឋានច្បាស់លាស់៕
