កូដករប្រមាណ១០០នាក់បានព្យាយាមទៅប្រមូលផ្ដុំធ្វើកូដកម្មជាថ្មីទៀត នៅក្បែរក្រុមហ៊ុនកាស៊ីណូណាហ្គាវើលដ៍ ក្នុងខណ្ឌចំការមន រាជធានីភ្នំពេញ នៅថ្ងៃចន្ទនេះ ដើម្បីទាមទារការដោះស្រាយវិវាទការងារ ប៉ុន្តែត្រូវបានសមត្ថកិច្ចជាច្រើននាក់រារាំងនិងចាប់ដាក់រថយន្តក្រុង។
ក្រុមកូដករណាហ្គាវើលដ៍ បានចេញដំណើរពីផ្សារទំនើបអ៊ីអន១ ដោយចងក្រណាត់ខៀវនៅលើក្បាល និងក្នុងដៃមានកាន់បដា ទាមទារឱ្យមានដំណោះស្រាយវិវាទការងារ ហើយពួកគេបានដើរឆ្ពោះទៅកាន់នាគបាញ់ទឹក ក្បែរទីតាំងក្រុមហ៊ុនល្បែងមួយនេះ ប៉ុន្តែត្រូវបានសមត្ថកិច្ចរារាំង ដោយដាក់កងកម្លាំង និងរនាំង មិនឱ្យកូដករធ្វើដំណើរទៅមុខបាន។
ក្នុងពេលជាមួយគ្នា សមត្ថកិច្ចមិនអនុញ្ញាតឱ្យកូដករធ្វើសកម្មភាពស្រែកតវ៉ា និងរារាំងមិនអនុញ្ញាតឱ្យអ្នកសារព័ត៌មានផ្តិតយករូបភាពកូដកម្ម និងមិនអនុញ្ញាតឱ្យមន្ត្រីសង្គមស៊ីវិលផ្នែកសិទ្ធិមនុស្សតាមដានកូដករនោះទេ បើទោះជាសកម្មភាពកូដកម្មនេះកំពុងធ្វើនៅទីសាធារណៈក្តី។
វីអូឌី បានព្យាយាមសុំការបញ្ជាក់ពីហេតុផលដែលមិនអនុញ្ញាតឱ្យអ្នកសារព័ត៌មានថតសកម្មភាពតវ៉ាទៅកាន់ក្រុមសមត្ថកិច្ចដែលឈរជើងនៅទីនោះ ប៉ុន្តែសមត្ថកិច្ចមិនប្រាប់ពីមូលហេតុឡើយ។
គួរបញ្ជាក់ថា វិវាទការងារក្រុមហ៊ុន ណាហ្គាវើលដ៍ នេះបានកើតឡើងអស់រយៈពេលជាង១ឆ្នាំមកហើយ ក្រោយពេលដែលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។
ក្រុមកូដករណាហ្គា បានផ្អាកធ្វើកូដកម្មកាលពីដើមខែមិថុនា ពោលគឺមុនការបោះឆ្នោតជ្រើសរើសក្រុមប្រឹក្សាឃុំសង្កាត់ ដើម្បីទៅបោះឆ្នោតនៅស្រុកកំណើតរបស់ពួកគេ និងបានចាប់ផ្តើមប្រមូលផ្តុំធ្វើកូដកម្មជាថ្មីទៀតនៅថ្ងៃចន្ទនេះ បន្ទាប់ពីពួកគេបាននាំគ្នាទៅដាក់ញត្តិនៅខុទ្ទកាល័យនាយករដ្ឋមន្ត្រី និងរដ្ឋសភា កាលពីសប្តាហ៍មុន។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានប្រាប់វីអូឌីក្នុងពេលដាក់ញត្តិនោះថា ការជួបចរចាជាង១០ដងរវាងតំណាងកូដករ តំណាងសហជីព និងតំណាងក្រុមហ៊ុន ក្រោមការសម្របសម្រួលរបស់ក្រសួងការងារ ក្រោយកូដករចេញធ្វើកូដកម្មរយៈពេល៦ខែមកនេះ គឺពុំមានលទ្ធផលជាផ្លែផ្កានៅឡើយ ទើបពួកគេសម្រេចចិត្តរកការអន្តរាគមន៍ពីស្ថាប័នពាក់ព័ន្ធនានា រួមទាំងលោកនាយករដ្ឋមន្ត្រី ហ៊ុន សែន ផងដែរ៕
