ស្នងការនគរបាលខេត្តព្រះសីហនុ បានបញ្ជូនជនជាតិខ្មែរចំនួន៦នាក់បន្ថែមទៀតទៅតុលាការកាលពីថ្ងៃសៅរ៍ ពាក់ព័ន្ធនឹងការកែច្នៃនិងជួញដូរអាវុធខុសច្បាប់ជាង៤០ដើមនៅក្នុងខេត្តនេះ។
ការឃាត់ខ្លួនជនជាតិខ្មែរទាំង៦នាក់ធ្វើឡើង បន្ទាប់ពីសមត្ថកិច្ចមូលដ្ឋានសង្កាត់លេខ៣ ឃាត់ខ្លួនជនជាតិវៀតណាមចំនួន៣នាក់ កាលពីថ្ងៃទី១៥ ខែមិថុនា ពាក់ព័ន្ធនឹងករណីប្រើប្រាស់អាវុធខុសច្បាប់ ហើយបាញ់ប្រហារមួយ បណ្ដាលឱ្យបុរសជាជនជាតិចិនម្នាក់រងរបួស។
ករណីនេះ ស្នងការនគរបាលខេត្តព្រះសីហនុ លោក ជួន ណារិន្ទ បានឱ្យដឹងនៅថ្ងៃទី២៦ ខែមិថុនា ថាក្រោយពីមានករណីបាញ់ប្រហារកាលពីថ្ងៃទី១៥ ខែមិថុនាកន្លងមកនេះ សមត្ថកិច្ចជំនាញបានស្រាវជ្រាវ និងកំណត់មុខសញ្ញារហូតឃាត់ខ្លួនអ្នកពាក់ព័ន្ធដែលជាជនជាតិខ្មែរ៦នាក់ រួមទាំងដកហូតអាវុធពិត១១ដើម ក្នុងនោះមានកាំភ្លើងខ្លី៩ដើម និងកាំភ្លើងប្រភេទវែង២ដើម ខណៈអាវុធកែច្នៃ សមត្ថកិច្ចបានរកឃើញ៣១ដើម រួមទាំងសម្ភារផ្សេងទៀត មានបំពង់ខ្ទប់សំឡេងកាំភ្លើងសម្រាប់បាញ់មិនឱ្យឮសំឡេងចំនួន២០បំពង់ និងគ្រាប់កាំភ្លើងមួយចំនួនទៀត។
ក្រោយពីឃាត់ខ្លួនជនជាតិខ្មែរទាំង៦នាក់នោះ សមត្ថកិច្ចបានបញ្ជូនពួកគេទៅតុលាការកាលពីថ្ងៃសៅរ៍ចុងសប្តាហ៍កន្លងទៅនេះ ដើម្បីឱ្យតុលាការចាត់វិធានការច្បាប់បន្ត ខណៈគូកនផ្សេងៗទៀត សមត្ថកិច្ចកំពុងបន្តស្រាវជ្រាវតាយកមកអនុវត្តតាមនីតិវិធីច្បាប់ផងដែរ។
លោកមានប្រសាសន៍ថា៖ «យើងបានធ្វើការស្រាវជ្រាវការចរាចរ ការចែកចាយ កាន់កាប់អាវុធខុសច្បាប់ គឺយើងបង្ក្រាបបានមនុស្ស៦នាក់ ដែលជាជនជាតិខ្មែរថែមទៀត ហើយយើងបញ្ជូនទៅតុលាការម្សិលមិញហើយ»។
វីអូឌី នៅមិនទាន់អាចសុំការបញ្ជាក់បន្ថែមជុំវិញករណីនេះពីអ្នកនាំពាក្យសាលាដំបូងខេត្តព្រះសីហនុ លោក លី ចាន់ដារ៉ា បានទេ នៅព្រឹកថ្ងៃចន្ទនេះ។
គួរបញ្ជាក់ថា កាលពីយប់ថ្ងៃទី១៤ ខែមិថុនា ឆ្នាំ២០២២ សមត្ថកិច្ចខេត្តព្រះសីហនុបានឃាត់ខ្លួនជនជាតិវៀតណាមចំនួន៣នាក់ ករណីពួកគេបាញ់ប្រហារ និងបង្ករបួសស្នាមលើមន្ត្រីនគរបាលក្រុងព្រះសីហនុមួយរូប។ ជាមួយគ្នានោះ នៅថ្ងៃទី១៤ ខែមិថុនាដដែលនោះ សមត្ថកិច្ចបានចាប់ខ្លួនបុរសជាជនជាតិចិនចំនួន៣នាក់ផ្សេងទៀតដែលបានចាប់ជំរិតមិត្តភក្តិរបស់ខ្លួនដែលជាជនជាតិចិនដូចគ្នា ដើម្បីទារប្រាក់១,២លានដុល្លារអាមេរិកពីគ្រួសារជនរងគ្រោះជាថ្នូរនឹងការដោះលែងវិញ។ បន្ទាប់មក ចៅក្រមស៊ើបសួរសាលាដំបូងខេត្តបានសម្រេចចោទប្រកាន់ពួកគេពីបទ «គំរាមកំហែងថានឹងសម្លាប់ និងកាន់កាប់អាវុធដោយគ្មានការអនុញ្ញាត»។
ដោយសារក្តីបារម្ភចំពោះបញ្ហាទាសភាព ឧក្រិដ្ឋកម្ម ការចាប់ជំរិតជាដើមនោះ កាលពីថ្ងៃទី១០ ខែមីនា ឆ្នាំ២០២២ អង្គការសង្គមស៊ីវិលចំនួន៣៦ បានចេញសេចក្ដីថ្លែងការណ៍រួមមួយអំពាវនាវឱ្យរដ្ឋាភិបាលលុបបំបាត់រាល់ទម្រង់បទល្មើសទាំងនេះ ដើម្បីធានាសន្តិសុខ ស្ថិរភាពសង្គម និងកិត្តិយសកម្ពុជា។
ការស្នើនោះ ក្រោយពេលក្រុមអង្គការសង្គមស៊ីវិលទាំងនោះរកឃើញថា មានមនុស្សរាប់ពាន់នាក់ដែលភាគច្រើនជាជនបរទេស ត្រូវបានជាប់នៅក្នុងស្ថានភាពទាំងអស់នេះ។ ពួកគេត្រូវបានចាប់ជំរិត លក់ ជួញដូរ ឬត្រូវបានបោកបញ្ឆោតឱ្យទទួលបានការងារនៅក្នុងប្រទេសកម្ពុជា។ ប៉ុន្តែនៅពេលមកដល់កម្ពុជា ពួកគេត្រូវបានឃុំខ្លួនក្នុងបរិវេណអគារធំៗ និងត្រូវបង្ខំឱ្យធ្វើការ ដែលជាញឹកញាប់ជាការងារទាក់ទងនឹងប្រតិបត្តិការបោកប្រាស់តាមប្រព័ន្ធអ៊ីនធឺណិត៕