មន្រ្តីក្នុងតំបន់ [អឺរ៉ុប] មួយរូបបានឱ្យដឹងថា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) នៅថ្ងៃចន្ទនេះ បានស្នើដល់ថ្នាក់ដឹកនាំនៃក្រុមប្រទេសមានសេដ្ឋកិច្ចជឿនលឿនទាំង៧ (G7) ឱ្យមានការដាក់ទណ្ឌកម្មកាន់តែខ្លាំងបន្ថែមទៀតលើប្រទេសរុស្ស៊ី។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ប្រភពដដែលបន្ថែមថា ប្រធានាធិបតីអ៊ុយក្រែនរូបនេះ ក៏បានឆ្លៀតឱកាសស្នើដល់ក្រុមប្រទេសទាំងនោះឱ្យមានការផ្ដល់នូវប្រព័ន្ធការពារប្រឆាំងយន្តហោះ និងការធានាសន្តិសុខបន្ថែមទៀតដល់ប្រទេសខ្លួនផងដែរ។
ថ្លែងតាមរយៈប្រព័ន្ធវីដេអូទៅកាន់កិច្ចប្រជុំកំពូលមួយដែលធ្វើឡើងនៅក្នុងប្រទេសអាល្លឺម៉ង់ លោក វ៉ូឡូឌីមៀ ហ្សេលេនស្គី ក៏បានស្នើសុំជំនួយក្នុងការនាំចេញគ្រាប់ធញ្ញជាតិពីអ៊ុយក្រែន និងជំនួយក្នុងការកសាងប្រទេសឡើងវិញផងដែរ។
គួរបញ្ជាក់ថា អ៊ុយក្រែនកាលពីពេលកន្លងទៅ ធ្លាប់នាំចេញគ្រាប់ធញ្ញជាតិរហូតដល់៦លានតោនក្នុងមួយខែ មុនពេលដែលរុស្ស៊ីបើកការឈ្លានពានទ្រង់ទ្រាយធំកាលពីខែកុម្ភៈ។ ទោះជាយ៉ាងណា បរិមាណនេះបានធ្លាក់ចុះមកនៅត្រឹមប្រមាណជា១លានតោនប៉ុណ្ណោះនាពេលបច្ចុប្បន្ន។
ទាក់ទិននឹងករណីនេះ លោកប្រធានាធិបតី វ៉ូឡូឌីមៀ ហ្សេលេនស្គី ធ្លាប់បានព្រមានកាលពីពេលកន្លងទៅថា មនុស្សរាប់លាននាក់អាចនឹងធ្លាក់ចូលទៅក្នុងភាពអត់ឃ្លាន ដោយសារតែការបិទកំពង់ផែសមុទ្រខ្មៅរបស់អ៊ុយក្រែនដោយរុស្ស៊ី។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង បន្ទាប់ពីរុស្ស៊ីបានបើកការឈ្លានពានទ្រង់ទ្រាយធំមកលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន៕
