រដ្ឋមន្ត្រីក្រសួងមហាផ្ទៃ លោក ស ខេង បង្ហាញការព្រួយបារម្ភខ្លាចអន្តរជាតិដាក់ធនាគារជាតិនៃកម្ពុជាក្នុងបញ្ជីខ្មៅ ជាហេតុធ្វើឱ្យប្រឈមហានិភ័យធំធេងផ្នែកសេដ្ឋកិច្ចនិងនយោបាយ ប្រសិនបើសមត្ថកិច្ចមិនស្រាវជ្រាវឱ្យដល់ឫសគល់ក្នុងការបង្រ្កាបបទល្មើសគ្រឿងញៀននោះទេ។
ការបង្ហាញក្ដីបារម្ភរបស់រដ្ឋមន្ត្រីក្រសួងមហាផ្ទៃនេះ ក្នុងឱកាសលោកចូលរួមក្នុងពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀន ក្រោមប្រធានបទ «ដោះស្រាយបញ្ហាគ្រឿងញៀនក្នុងវិបត្តិសុខភាព និងមនុស្សធម៌» កាលពីថ្ងៃទី២៦ ខែមិថុនា ឆ្នាំ២០២២។
ក្នុងពិធីនោះ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង ថ្លែងថា បញ្ហាគ្រឿងញៀននេះ វាជាបញ្ហាមួយដែលផ្សារភ្ជាប់នឹងការអនុវត្តគោលការណ៍របស់អង្គការសហប្រជាជាតិ ទាក់ទងការប្រយុទ្ធប្រឆាំងអំពើភេរវកម្ម និងសម្អាតប្រាក់ ទប់ស្កាត់កុំឱ្យមានការរីកសាយអាវុធប្រល័យផងដែរ ស្របពេលដែលកម្ពុជាក៏ជាប្រទេសហត្ថលេខីក្នុងការប្រយុទ្ធប្រឆាំងអំពើទាំងនេះ។
លោកថា បទល្មើសគ្រឿងញៀនជាបទល្មើសមួយដែលក្រុមឧក្រិដ្ឋជនស្រូបយកប្រាក់កម្រៃ និងធនធានជាច្រើន ដើម្បីយកទៅបម្រើលើកិច្ចការផ្សេងៗទៀត ក្នុងនោះអាចយកទៅពង្រីកអាវុធមហាប្រល័យ ខណៈបច្ចុប្បន្ន កម្ពុជាត្រូវបានអន្តរជាតិដាក់ក្នុងបញ្ជីប្រផេះ ពាក់ព័ន្ធរឿងហិរញ្ញវត្ថុនៅធនាគារ។
លោក ស ខេង បញ្ជាក់ថា រឿងហិរញ្ញវត្ថុនេះជាដើមចមដែលធ្វើឱ្យអន្តរជាតិដាក់កម្ពុជាក្នុងបញ្ជីប្រផេះរហូតដល់បច្ចុប្បន្ន។ លោកបន្តថា ប្រសិនបើកម្ពុជាមិនអាចដោះស្រាយបញ្ហានៃការលាងលុយកខ្វក់បានទេ អន្តរជាតិនឹងដាក់ធនាគារជាតិនៃកម្ពុជាក្នុងបញ្ជីខ្មៅ ដែលធ្វើឱ្យប្រទេសកំពុងអភិវឌ្ឍន៍មួយនេះប្រឈមហានិភ័យធំ សម្រាប់ផ្នែកសេដ្ឋកិច្ចនិងនយោបាយជាក់ជាមិនខាន។
ករណីនេះ លោកស្នើទៅសមត្ថកិច្ចស្រាវជ្រាវឱ្យដល់ឫសគល់នៃម្ចាស់ក្រុមហ៊ុន ដែលសមត្ថកិច្ចបានបង្រ្កាប និងរឹបអូសគ្រឿងញៀនបាន។
លោកថា៖ «ម្ចាស់ក្រុមហ៊ុនមានរោងចក្រនៅណា មានដីធ្លីប៉ុន្មាន មានផ្ទះសម្បែងប៉ុន្មាន មានលុយកាក់ដាក់ធនាគារអីណាប៉ុន្មាន ព្រោះធនាគារយើងប្រហែសដែរ។ អ៊ីចឹងមានន័យថា ជួនអីអ្នករកស៊ីគ្រឿងញៀនបញ្ជូនលុយក្នុងធនាគារនេះ ដែលនាំឱ្យធនាគារប្រផេះ ហើយបើរឿងហ្នឹង រឿងបណ្ដោយទៀត ធនាគារនឹងទៅជាខ្មៅតែម្ដង។ បើធនាគារជាតិខ្មៅ ធនាគារទាំងអស់គឺខ្មៅទាំងអស់។ បើខ្មៅហើយ យើងប្រើលុយអត់បានទេ ពីមុនយើងធ្លាប់ប្រើមួយម៉ោងឬកន្លះម៉ោងបាន ចុះហត្ថលេខាលើសែកបើកយកលុយយើង ប៉ុន្តែឥលូវអត់។ គេមិនមែនហាមឃាត់យើងទេ ប៉ុន្តែយើងបើកអត់បាន គេត្រូវត្រួតពិនិត្យយ៉ាងហោចមួយអាទិត្យ មួយខែ ឬពីរខែ ដើម្បីដឹងពីប្រភពនៃថវិកានោះ វាត្រឹមត្រូវឬមិនត្រឹមត្រូវ នេះហើយជាបញ្ហា»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា បច្ចុប្បន្ន កម្ពុជាស្ថិតនៅក្នុងបញ្ជីប្រផេះនៅឡើយ។ លោកថា បើទោះរដ្ឋាភិបាលបានជំរុញការអនុវត្តច្បាប់ គោលការណ៍គតិយុត្ត ព្រមទាំងមានកិច្ចសហការរវាងវិស័យសាធារណៈនិងវិស័យឯកជនក្ដី ប៉ុន្តែកម្ពុជានៅមិនទាន់ងើបខ្លួនចេញរួចពីបញ្ជីប្រផេះនោះទេ។
លោកបន្តថា កន្លងមក អនុសាសន៍របស់លេខាធិការដ្ឋានបោសសម្អាតលុយកខ្វក់អន្តរជាតិដែលបានដាក់ចេញ កម្ពុជាបានអនុវត្តមួយចំនួនហើយ ខណៈអនុសាសន៍មួយចំនួនទៀត កម្ពុជានៅមិនទាន់បានអនុវត្តនៅឡើយទេ។
លោក ពិសី បញ្ជាក់ថា កម្ពុជាអាចរួចផុតពីការដាក់ក្នុងបញ្ជីប្រផេះ និងមិនឱ្យធ្លាក់ចូលក្នុងបញ្ជីខ្មៅទៅបាន លុះត្រាតែកម្ពុជាអនុវត្តទៅតាមអនុសាសន៍របស់ក្រុមឃ្លាំមើលការលាងលុយកខ្វក់ពិភពលោក (Financial Action Task force) ហៅកាត់ FATF ដែលបានដាក់ឱ្យកម្ពុជាអនុវត្តក្នុងការទប់ស្កាត់ការលាងលុយកខ្វក់។
លោកថា៖ «សម្រាប់កម្ពុជាជារឿងធំ បើសិនជាកម្ពុជាធ្លាក់ក្នុងបញ្ជីខ្មៅ[ទៀតព្រោះ]បញ្ជីប្រផេះធ្ងន់ធ្ងរទៅហើយ បើយើងធ្លាក់ក្នុងបញ្ជីខ្មៅទៀត យើងនឹងមានបញ្ហារង្គោះរង្គើទាក់ទងនឹងការវិនិយោគទ្រង់ទ្រាយធំ។ ទី២ ការវេរលុយអន្តរជាតិចេញចូលកម្ពុជានឹងត្រូវបានគេរឹតត្បិត ដែលនាំឱ្យមានឧបសគ្គធំធេងក្នុងការធ្វើប្រតិបត្តិការវិនិយោគក្រៅប្រទេស ហើយការទាក់ទាញវិនិយោគមកកម្ពុជាក៏មានបញ្ហាធំ ដោយសារប្រទេសកម្ពុជាអាចត្រូវបានគេចាត់ទុកថាជាដែនដីមួយដែលមានហានិភ័យខ្ពស់នៅក្នុងប្រតិបត្តិការលាងលុយកខ្វក់ ឬហិរញ្ញប្បទានភេរវកម្ម»។
លេខាធិការដ្ឋានបោសសម្អាតលុយកខ្វក់អន្តរជាតិ (Financial Action Task Force-FATF) កន្លងមក បានដាក់ប្រទេសកម្ពុជាចូលក្នុងបញ្ជីប្រផេះរបស់ខ្លួន សម្រាប់តាមដានការលាងលុយកខ្វក់ពីលំហូរហិរញ្ញវត្ថុ វិនិយោគ និងពាណិជ្ជកម្ម ចេញនិងចូលក្នុងប្រទេសនេះ។
អង្គការអន្តរជាតិមួយនេះបន្តថា បច្ចុប្បន្ន ប្រទេសចំនួន២ដែលត្រូវបានដាក់ចូលក្នុងបញ្ជីខ្មៅ រួមមាន ប្រទេសអ៊ីរ៉ង់ និងកូរ៉េខាងជើង ដែលប្រទេសទាំងពីរនេះកំពុងត្រូវបានពិភពលោកហ៊ុមព័ទ្ធសេដ្ឋកិច្ច ខណៈប្រទេសកម្ពុជា និងប្រទេស៩ទៀត ត្រូវបានដាក់ចូលក្នុងបញ្ជីតាមដានថែមទៀតផង៕