ក្រសួងសុខាភិបាល ឱ្យដឹងថា កម្ពុជាបានរកឃើញអ្នកឆ្លងកូវីដ-១៩ចូលក្នុងសហគមន៍ និងនាំចូលថ្មីចំនួន ១០នាក់ ក្រោយពីជិត ២ខែមកនេះ មិនមានអ្នកឆ្លង។
សេចក្ដីប្រកាសព័ត៌មានរបស់ក្រសួងសុខាភិបាល ចុះថ្ងៃទី២៩ ខែមិថុនា ឆ្នាំ២០២២ ឱ្យដឹងថា អ្នកជំងឺកូវីដ-១៩ ទាំង ១០នាក់ ដែលក្រសួងរកឃើញកាលពីថ្ងៃម្សិលមិញ ក្នុងនោះករណីឆ្លងចូលសហគមន៍ ៨នាក់ និងករណីនាំចូល ២នាក់ ខណៈអ្នកជាសះស្បើយ និងស្លាប់ ដោយសារជំងឺនេះ មិនមានឡើយ។
អគ្គនាយកបច្ចេកទេសនៃក្រសួងសុខាភិបាល លោក ហុក គឹមចេង មានប្រសាសន៍ថា វិធានការរបស់ក្រសួងនោះ គឺការក្រើនរំលឹកឱ្យប្រជាពលរដ្ឋទៅចាក់វ៉ាក់សាំងដូសជំរុញ ដើម្បីការពារជំងឺកូវីដ-១៩ ដោយសារជំងឺនេះ មិនទាន់បាត់ទៅវិញនៅឡើយ។
លោកថា៖ «ការចាក់ដូសជំរុញ ដើម្បីពង្រឹងប្រព័ន្ធភាពសុំារបស់យើង ហើយនឹងកាត់បន្ថយក្នុងករណីដែលមានឆ្លងហើយ យើងមិនធ្លាក់ខ្លួនឈឺជាអ្នកធ្ងន់ធ្ងរ ដូចយើងឃើញពេលបច្ចុប្បន្ន គឺដោយសារភាពសុំាក្នុងសហគមន៍ ដែលបានមកពីការចាក់វ៉ាក់សាំងហ្នឹង គឺមានផលប្រយោជន៍សម្រាប់ប្រទេសយើង ក្នុងការបើកសេដ្ឋកិច្ច សង្គមឡើងវិញ។ អ៊ីចឹងយើង បន្តអប់រំ ជំរុញឱ្យប្រជាពលរដ្ឋ អាជ្ញាធរពាក់ព័ន្ធ នឹងជំរុញសហការនៅលើរឿងហ្នឹង»។
តាមរយៈសារពិសេសជាសំឡេងមួយ កាលពីយប់ថ្ងៃទី២៨ ខែមិថុនា ឆ្នាំ២០២២ លោកនាយករដ្ឋមន្ត្រី ហ៊ុន សែន ថ្លែងថា រយៈពេល ៥១ថ្ងៃកន្លងមកនេះ កម្ពុជាមិនបានរកឃើញអ្នកឆ្លង និងស្លាប់ដោយសារជំងឺកូវីដ-១៩ឡើយ។ ប៉ុន្តែកាលពីថ្ងៃអង្គារម្សិលមិញ លោកថា ក្រសួងសុខាភិបាល បានរកឃើញអ្នកឆ្លងជំងឺកូវីដ-១៩ ចូលក្នុងសហគមន៍ជាថ្មីទៀត តាមរយៈការធ្វើតេស្តម៉ាស៊ីន PCR មួយចំនួន ក្នុងនោះមាន អ្នកធ្វើតេស្ត PCR សម្រាប់ធ្វើទម្រង់បែបបទចេញទៅក្រៅប្រទេស និងមួយចំនួនទៀត ជាអ្នកដែលបានវិលត្រឡប់ពីក្រៅប្រទេសមកក្នុងប្រទេសវិញ។
ករណីនេះ លោកនាយករដ្ឋមន្ត្រី ហ៊ុន សែន បានជំរុញឱ្យក្រសួងសុខាភិបាល អាជ្ញាធរពាក់ព័ន្ធតាមដានចំពោះករណីនេះ ដើម្បីបញ្ចៀសការរីករាលដាលដ៏ធ្ងន់ធ្ងរ ដែលអាចកើតឡើងជាយថាហេតុនៅពេលខាងមុខ។ លោកក៏បានអំពាវនាវឱ្យប្រជាពលរដ្ឋប្រុងប្រយ័ត្ន ដោយបន្តអនុវត្តវិធានការសុខាភិបាល និងប្រញាប់ទៅទទួលវ៉ាក់សាំងដូសជំរុញ បើសិនជាមិនទាន់បានចាក់វ៉ាក់សាំងគ្រប់គ្រាន់នោះ។
លោកថា៖ «យើងបានរកឃើញអ្នកដែលឆ្លងក្នុងសហគមន៍តាមរយៈការធ្វើតេស្ត PCR មួយចំនួន អ្នកធ្វើតេស្ត PCR សម្រាប់ទម្រង់បែបបទចេញទៅក្រៅប្រទេសមួយចំនួន និងមួយចំនួនទៀត គឺអ្នកដែលបានវិលត្រឡប់ពីក្រៅប្រទេសចូលក្នុងប្រទេសវិញ។ នេះជាការបញ្ជាក់ដោយម៉ាស៊ីនPCR ដែលយើងបានធ្វើសម្រាប់អ្នកឆ្លងក្នុងសហគមន៍ អ្នកមកពីក្រៅប្រទេស និងអ្នកធ្វើវិញ្ញាបនប័ត្រសម្រាប់ការចេញទៅក្រៅប្រទេស។ ទន្ទឹមនេះ ខ្ញុំព្រះករុណា បានទទួលព័ត៌មានថា នៅតាមទីកន្លែងមួយចំនួន ក្នុងការធ្វើតេស្តរហ័សក៏ឃើញវិជ្ជមាននៃកូវីដ-១៩»។
ទោះបីជា លោកនាយករដ្ឋមន្ត្រី ហ៊ុន សែន ប្រកាសថា កម្ពុជារកឃើញករណីឆ្លងកូវីដ-១៩ ចូលក្នុងសហគមន៍ជាថ្មីក៏ដោយ ប៉ុន្តែលោកមិនបានបញ្ជាក់ថារកឃើញនៅទីតាំងណាខ្លះនោះទេ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព លោក យង់ គិមអេង មានប្រសាសន៍ថា បើសិនជាប្រពលរដ្ឋខ្វះការប្រុងប្រយ័ត្ន និងមិនបានចាក់វ៉ាក់សាំងដូសជំរុញ ដើម្បីការពារទេ លទ្ធភាពនៃការឆ្លងជំងឺកូវីដ-១៩ ចូលសហគមន៍អាចកើតឡើងជាថ្មីទៀត ដែលធ្វើឱ្យប៉ះពាល់ការប្រកបអាជីវកម្ម ឬមុខរបររបស់ប្រជាពលរដ្ឋ។
លោកបន្តថា ក្រសួងសុខាភិបាល គួរធ្វើការអប់រំ និងផ្សព្វផ្សាយអំពីការឆ្លងជំងឺកូវីដ-១៩ចូលក្នុងសហគមន៍ឱ្យបានទូលំទូលាយ ព្រមទាំងលើកទឹកចិត្តឱ្យប្រជាពលរដ្ឋដែលសង្ស័យថាខ្លួនឆ្លងកូវីដ-១៩ ទៅធ្វើតេស្ត ដើម្បីបញ្ជៀសការឆ្លងចូលសហគមន៍ទ្រង់ទ្រាយធំ។
លោកថា៖ «បើសិនជាយើងមិនគិតគូរវិធានការទាំងអស់នឹងទេ វាមានករណីប្រឈមដែរ។ មួយវិញទៀត ក្រសួងសុខាភិបាលគួរតែបង្ហាញព៏ត៌មានថ្មីៗ ដើម្បីឱ្យលោកបានដឹងថា ការឆ្លងវាយ៉ាងម៉េចខ្លះ ហើយតើមានករណីឆ្លងរបៀបណាខ្លះ មានករណីឆ្លងប៉ុន្មាន ឆ្លងពីណាពីណី ហើយឆ្លងពីសហគមន៍របៀបម៉េច? បើប្រជាពលរដ្ឋដឹងព័ត៌មានទាំងអស់ហ្នឹង វាងាយស្រួលសម្រាប់ប្រជាពលរដ្ឋក្នុងការបង្ការនឹងការពារកូវីដ-១៩ ហ្នឹង»។
បើតាមសេចក្ដីប្រកាសរបស់ក្រសួង គិតមកដល់ថ្ងៃទី២៨ ខែមិថុនា ឆ្នាំ២០២២នេះ អ្នកឆ្លងជំងឺកូវីដ-១៩នៅកម្ពុជា មានចំនួន ១៣៦ ២៧២នាក់ ក្នុងនោះ អ្នកបានជាសះស្បើយមានចំនួន ១៣៣ ២០៦នាក់ និងស្លាប់ចំនួន ៣ ០៥៦នាក់។ ចំណែកករណីឆ្លងចូលសហគមន៍វិញ ក្រសួងថា កើនដល់ចំនួន ១៤ ៤៦៧នាក់៕