លោកនាយករដ្ឋមន្ត្រី ហ៊ុន សែន ប្រកាសពីការរកឃើញជំងឺកូវីដ-១៩ ឆ្លងចូលសហគមន៍ ជាថ្មីទៀត កាលពីថ្ងៃម្សិលមិញ ក្រោយកម្ពុជា មិនមានករណីឆ្លងថ្មី និងអ្នកស្លាប់ដោយសារជំងឺនេះជិត២ខែមកហើយ។
តាមរយៈសារពិសេសជាសំឡេងមួយ កាលពីយប់ថ្ងៃទី២៨ ខែមិថុនា ឆ្នាំ២០២២ លោកនាយករដ្ឋមន្ត្រី ហ៊ុន សែន ថ្លែងថា រយៈពេល ៥១ថ្ងៃកន្លងមកនេះ កម្ពុជាមិនបានរកឃើញអ្នកឆ្លង និងស្លាប់ដោយសារជំងឺកូវីដ-១៩ឡើយ។ ប៉ុន្តែកាលពីថ្ងៃអង្គារម្សិលមិញ លោកថា ក្រសួងសុខាភិបាល បានរកឃើញអ្នកឆ្លងជំងឺកូវីដ-១៩ ចូលក្នុងសហគមន៍ជាថ្មីទៀត តាមរយៈការធ្វើតេស្តម៉ាស៊ីន PCR មួយចំនួន ក្នុងនោះ អ្នកធ្វើតេស្ត PCR សម្រាប់ធ្វើទម្រង់បែបបទចេញទៅក្រៅប្រទេស និងមួយចំនួនទៀត ជាអ្នកដែលបានវិលត្រឡប់ពីក្រៅប្រទេសមកក្នុងប្រទេសវិញ។
ករណីនេះ លោកនាយករដ្ឋមន្ត្រី ហ៊ុន សែន បានជំរុញឱ្យក្រសួងសុខាភិបាល អាជ្ញាធរពាក់ព័ន្ធតាមដានចំពោះករណីនេះ ដើម្បីបញ្ចៀសការរីករាលដាលដ៏ធ្ងន់ធ្ងរ ដែលអាចកើតឡើងជាយថាហេតុនៅពេលខាងមុខ។ លោកក៏បានអំពាវនាវឱ្យប្រជាពលរដ្ឋប្រុងប្រយ័ត្ន ដោយបន្តអនុវត្តវិធានការសុខាភិបាល និងប្រញាប់ទៅទទួលវ៉ាក់សាំងដូសជំរុញ បើសិនជាមិនទាន់បានចាក់វ៉ាក់សាំងគ្រប់គ្រាន់នោះ។
លោកថា៖ «យើងបានរកឃើញអ្នកដែលឆ្លងក្នុងសហគមន៍តាមរយៈការធ្វើតេស្ត PCR មួយចំនួន អ្នកធ្វើតេស្ត PCR សម្រាប់ទម្រង់បែបបទចេញទៅក្រៅប្រទេសមួយចំនួន និងមួយចំនួនទៀត គឺអ្នកដែលបានវិលត្រឡប់ពីក្រៅប្រទេសចូលក្នុងប្រទេសវិញ។ នេះជាការបញ្ជាក់ដោយម៉ាស៊ីនPCR ដែលយើងបានធ្វើសម្រាប់អ្នកឆ្លងក្នុងសហគមន៍ អ្នកមកពីក្រៅប្រទេស និងអ្នកធ្វើវិញ្ញាបនប័ត្រសម្រាប់ការចេញទៅក្រៅប្រទេស។ ទន្ទឹមនេះ ខ្ញុំព្រះករុណា បានទទួលព័ត៌មានថា នៅតាមទីកន្លែងមួយចំនួន ក្នុងការធ្វើតេស្តរហ័សក៏ឃើញវិជ្ជមាននៃកូវីដ–១៩»។
ទោះបីជា លោកនាយករដ្ឋមន្ត្រី ហ៊ុន សែន ប្រកាសថា កម្ពុជារកឃើញករណីឆ្លងកូវីដ-១៩ ចូលក្នុងសហគមន៍ជាថ្មីក៏ដោយ ប៉ុន្តែលោកមិនបានបញ្ជាក់ថារកឃើញនៅទីតាំងណាខ្លះនោះទេ។ បើតាមរបាយការណ៍របស់ក្រសួងសុខាភិបាល គិតមកដល់ថ្ងៃម្សិលមិញ គឺមានរយៈពេល៥១ថ្ងៃហើយ ដែលកម្ពុជាមិនមានករណីឆ្លងថ្មី និងអ្នកស្លាប់បន្ថែមដោយសារជំងឺកូវីដ-១៩។ ក្រសួងបញ្ជាក់ថា គិតមកដល់ពេលនេះ អ្នកឆ្លងជំងឺកូវីដ-១៩នៅកម្ពុជា មានចំនួន ១៣៦ ២៦២នាក់ ក្នុងនោះបានជាសះស្បើយចំនួន ១៣៣ ២០៦នាក់ និងស្លាប់ចំនួន ៣ ០៥៦នាក់៕